104ರ ಗಡಿ ದಾಟಿದ 'ಪವರ್ ಪೆಟ್ರೋಲ್'​.. ತೈಲ ಬೆಲೆಯಲ್ಲಿ ಸತತ ಏರಿಕೆ

ಮಹಾರಾಷ್ಟ್ರದ ಪರಭಾನಿಯಲ್ಲಿ ಪೆಟ್ರೋಲ್ ಬೆಲೆ 104ರ ಗಡಿ ದಾಟ್ಟಿದ್ದು, ಇದರಿಂದ ಗ್ರಾಹಕರು ಮತ್ತಷ್ಟು ಸಂಕಷ್ಟಕ್ಕೊಳಗಾಗಿದ್ದಾರೆ.

ಪರಭಾನಿ(ಮಹಾರಾಷ್ಟ್ರ):ಒಂದು ಕಡೆ ಕೊರೊನಾ ಹಾವಳಿ ಮತ್ತೊಂದು ಕಡೆ ಪೆಟ್ರೋಲ್ - ಡೀಸೆಲ್​​ ಏರಿಕೆ ತಲೆ ಬಿಸಿ. ದೇಶದಲ್ಲಿ ಕಳೆದ ಕೆಲ ದಿನಗಳಿಂದ ಪೆಟ್ರೋಲ್​-ಡೀಸೆಲ್​ ಬೆಲೆ ಮತ್ತೊಮ್ಮೆ ಗಗನಕ್ಕೇರುತ್ತಿದ್ದು, ಇದೀಗ ಮತ್ತೊಮ್ಮೆ ಇಂಧನ ಬೆಲೆ 100 ರ ಗಡಿ ದಾಟಿದೆ.

ಮಹಾರಾಷ್ಟ್ರದ ಪರಭಾನಿಯಲ್ಲಿ ಪವರ್​ ಪೆಟ್ರೋಲ್ ಬೆಲೆ ಪ್ರತಿ ಲೀಟರ್​ಗೆ 104.11 ರೂ. ಮಾರಾಟವಾಗುತ್ತಿದ್ದು, ನಾರ್ಮಲ್​ ಪೆಟ್ರೋಲ್ ಬೆಲೆ ಪ್ರತಿ ಲೀಟರ್​ಗೆ 100.70 ಪೈಸೆ ತಲುಪಿದೆ.

ಡೀಸೆಲ್​ ಬೆಲೆ ಕೂಡ 90.67 ರೂ. ಆಗಿದೆ. ದೇಶದಲ್ಲಿ ಕಳೆದ ನಾಲ್ಕೈದು ದಿನಗಳಿಂದ ತೈಲ ಬೆಲೆಯಲ್ಲಿ ಸತತ ಏರಿಕೆಯಾಗುತ್ತಿರುವ ಕಾರಣ 100 ರೂ ಗಿಂತಲೂ ಕಡಿಮೆ ಇದ್ದ ಪೆಟ್ರೋಲ್ ಬೆಲೆ ಇದೀಗ ಮತ್ತೊಮ್ಮೆ ಶತಕದ ಗಡಿ ದಾಟಿದೆ.

ದೇಶದಲ್ಲಿ ಲಾಕ್​ಡೌನ್ ಹೇರಿಕೆ ಮಾಡಿರುವುದರಿಂದ ಜನರು ಕೆಲಸವಿಲ್ಲದೇ ಸಮಸ್ಯೆಗೊಳಗಾಗಿದ್ದಾರೆ. ಇದರ ಮಧ್ಯೆ ಕೂಡ ಇಂಧನ ಬೆಲೆ ಏರಿಕೆಯಾಗುತ್ತಿರುವುದು ನಿಜಕ್ಕೂ ನಮಗೆ ಸಂಕಷ್ಟವಾಗಿದೆ ಎಂದು ಅನೇಕರು ತಮ್ಮ ಕಷ್ಟ ಹೊರಹಾಕಿದ್ದಾರೆ. ಪಂಚರಾಜ್ಯ ಚುನಾವಣೆ ವೇಳೆ ತೈಲ ಬೆಲೆ ಏರಿಕೆಗೆ ಬ್ರೇಕ್​ ಬಿದ್ದಿತ್ತು. ಫಲಿತಾಂಶ ಬಹಿರಂಗಗೊಂಡ ದಿನದಿಂದಲೇ ದೇಶದಲ್ಲಿ ತೈಲ ಬೆಲೆ ಏರಿಕೆ ಮತ್ತೊಮ್ಮೆ ಆರಂಭಗೊಂಡಿದೆ.

ಈಗಾಗಲೇ ಮಧ್ಯಪ್ರದೇಶ, ರಾಜಸ್ಥಾನದ ಕೆಲವು ಭಾಗಗಳಲ್ಲಿ ಪೆಟ್ರೋಲ್‌ ದರ 100ರ ಗಡಿ ದಾಟಿದ್ದು, ಇದೀಗ ಮಹಾರಾಷ್ಟ್ರ ಕೂಡ ಸೇರ್ಪಡೆಯಾಗಿದೆ.