ಆಕ್ಸಿಜನ್​ ಪೂರೈಕೆಗಾಗಿ 1400 ಗಂಟೆ ಹಾರಾಟ ನಡೆಸಿದ ವಾಯುಪಡೆ ವಿಮಾನಗಳು!

ಭಾರತೀಯ ವಾಯುಪಡೆ ಏಪ್ರಿಲ್​ 21ರಿಂದ ದೇಶದೊಳಗೆ ಹಾಗೂ ಹೊರಗಡೆಯಿಂದ ಆಮ್ಲಜನಕ ತೆಗೆದುಕೊಂಡು ಬರುವ ಉದ್ದೇಶದಿಂದ ವಿಮಾನ ಹಾರಾಟ ನಡೆಸಿವೆ.ಈ ಕಾರ್ಯಾಚರಣೆಯಲ್ಲಿ ವಿವಿಧ ತಂಡಗಳು ಭಾಗಿಯಾಗಿದ್ದವು.

ನವದೆಹಲಿ:ವೈದ್ಯಕೀಯ ಆಮ್ಲಜನಕ ಮತ್ತು ಕೋವಿಡ್​ ಪರಿಹಾರ ಕಾರ್ಯಾಚರಣೆಯಲ್ಲಿ ತೀವ್ರವಾಗಿ ತೊಡಗಿಸಿಕೊಂಡಿರುವ ಭಾರತೀಯ ವಾಯುಪಡೆ ತನ್ನ 732 ಬಗೆಯ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳನ್ನು ಬಳಕೆ ಮಾಡಿಕೊಂಡಿದೆ.

ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡಲು ದೇಶದೊಳಗೆ ಮತ್ತು ವಿದೇಶಗಳಿಂದ 498 ಆಮ್ಲಜನಕ ಟ್ಯಾಂಕರ್‌ಗಳನ್ನು ಸ್ಥಳಾಂತರಿಸಿ, ಜನರ ನೆರವಿಗೆ ನಿಂತಿವೆ. ಈ ಮೆಗಾ ಕಾರ್ಯಾಚರಣೆಗಾಗಿ ವಾಯುಪಡೆಯು ತಲಾ ಆರು ಸಿ -17 ಮತ್ತು ಇಲ್ಯುಶಿನ್ -76 ಪ್ರಯಾಣಿಕ ವಿಮಾನಗಳು ಮತ್ತು 30 ಮಧ್ಯಮ - ಲಿಫ್ಟ್ ಸಿ -130 ಜೆ ಮತ್ತು ಎಎನ್ - 32 ವಿಮಾನಗಳನ್ನು ಒಳಗೊಂಡಂತೆ 42 ಸಾರಿಗೆ ವಿಮಾನಗಳನ್ನು ನಿಯೋಜಿಸಿದೆ.

403 ಆಮ್ಲಜನಕ ಟ್ಯಾಂಕರ್​ ಮತ್ತು 163.3 ಮೆಟ್ರಿಕ್ ಟನ್ ಇತರ ಸಾಧನಗಳನ್ನು ಸಾಗಿಸಲು 939 ಗಂಟೆಗಳ ಕಾಲ ಭಾರತೀಯ ಸೇನಾ ಹೆಲಿಕಾಪ್ಟರ್​ ಹಾಗೂ ವಿಮಾನಗಳು ಹಾರಾಟ ನಡೆಸಿವೆ ಎಂದು ಸೇನಾ ವಕ್ತಾರರು ಮಾಹಿತಿ ನೀಡಿದ್ದಾರೆ. ಐಎಎಫ್ ವಿಮಾನಗಳು ಜರ್ಮನಿ, ಇಂಡೋನೇಷ್ಯಾ, ಆಸ್ಟ್ರೇಲಿಯಾ, ಬ್ರಿಟನ್ ಮತ್ತು ಸಿಂಗಾಪುರ ಸೇರಿದಂತೆ ಒಂಬತ್ತಕ್ಕೂ ಹೆಚ್ಚು ದೇಶಗಳಿಗೆ ತೆರಳಿ ಆಮ್ಲಜನಕವನ್ನು ತೆಗೆದುಕೊಂಡು ಬಂದಿವೆ.