ಶರದ್​ ಯಾದವ್‌ರಿಂದ ಅನೇಕ ರಾಜಕೀಯ ವಿಚಾರಗಳನ್ನು ಕಲಿತಿದ್ದೇನೆ: ರಾಹುಲ್​ ಗಾಂಧಿ

ರಾಜಕೀಯ ನಾಯಕರು ಪಕ್ಷಾತೀತವಾಗಿ ​ಜೆಡಿಯು ನಾಯಕ, ಸಮಾಜವಾದಿ ಚಿಂತನೆಗಳ ಧುರೀಣ ಶರದ್‌ ಯಾದವ್‌ ಅವರಿಗೆ ಅಂತಿಮ ಗೌರವ ಸಲ್ಲಿಸುತ್ತಿದ್ದಾರೆ.

ನವದೆಹಲಿ​: ​ಜೆಡಿಯು ಹಿರಿಯ ನಾಯಕ ಶರದ್​ ಯಾದವ್ ಗುರುವಾರ​ ನಿಧನ ಹೊಂದಿದ್ದು, ಕಾಂಗ್ರೆಸ್​ ಸಂಸದ ರಾಹುಲ್​ ಗಾಂಧಿ ಗೌರವ ನಮನ ಸಲ್ಲಿಸಿದ್ದಾರೆ. ​ಜೆಡಿಯು ನಾಯಕನೊಂದಿಗೆ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಹಾಗೂ ಕಾಂಗ್ರೆಸ್​ ನಾಯಕಿ ಸೋನಿಯಾ ಗಾಂಧಿಯವರಿಗಿದ್ದ ಒಡನಾಟವನ್ನು ಅವರು ಸ್ಮರಿಸಿದ್ದಾರೆ. ಇದೇ ವೇಳೆ ರಾಜಕೀಯ ಜೀವನದ ಅನೇಕ ಪಟ್ಟುಗಳನ್ನು ಶರದ್​ ಯಾದವ್​ ಅವರಿಂದ ಕಲಿತಿರುವುದಾಗಿ ತಿಳಿಸಿದ್ದಾರೆ.

'ತುಂಬಲಾರದ ನಷ್ಟ'- ಬಿಹಾರ ಸಿಎಂ ನಿತೀಶ್ ಕುಮಾರ್: ಶರದ್​ ಯಾದವ್​ ಅವರ ಸಾವು ಸಾಮಾಜಿಕ ಮತ್ತು ರಾಜಕೀಯ ಕ್ಷೇತ್ರಕ್ಕಾದ ಅತಿದೊಡ್ಡ ನಷ್ಟ ಎಂದು ಬಿಹಾರ ಮುಖ್ಯಮಂತ್ರಿ ನಿತೀಶ್​ ಕುಮಾರ್​ ತಿಳಿಸಿದ್ದಾರೆ. ಶರದ್​ ಯಾದವ್​ ಅವರ ಜೊತೆ ದೀರ್ಘ ಸಂಬಂಧವನ್ನು ನಾನು ಹೊಂದಿದ್ದೇನೆ. ಅವರ ಸಾವು ಬೇಸರ ಮತ್ತು ಆಘಾತ​ ಮೂಡಿಸಿದೆ. ಅವರೊಬ್ಬ ದೊಡ್ಡ ಸಮಾಜವಾದಿ ನಾಯಕ. ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಟ್ವೀಟ್​ ಮಾಡಿದ್ದಾರೆ.

ರಾಷ್ಟ್ರಪತಿಗಳಿಂದ ಸಂತಾಪ: ಪ್ರಜಾಪ್ರಭುತ್ವದ ಮೌಲ್ಯಗಳಿಗಾಗಿ 70ರ ದಶಕದಲ್ಲಿ ಹೋರಾಡಿದ ವಿದ್ಯಾರ್ಥಿ ನಾಯಕ ಎಂದು ಶರದ್​ ಯಾದವ್​ ಅವರನ್ನು ರಾಷ್ಟ್ರಪತಿ ದ್ರೌಪದಿ ಮುರ್ಮು ನೆನಪಿಸಿಕೊಂಡು ಸಂತಾಪ ಸೂಚಿಸಿದ್ದಾರೆ. ಮಾಜಿ ಕೇಂದ್ರ ಸಚಿವ ಶರದ್​ ಯಾದವ್​ ಅವರ ಸಾವು ಬೇಸರ ಮೂಡಿಸಿದೆ. ಸಂಸತ್ತಿನಲ್ಲಿ ರಾಷ್ಟ್ರ ಧ್ವನಿಯಾಗಿದ್ದರು. ಕುಟುಂಬಕ್ಕೆ ನನ್ನ ಸಂತಾಪಗಳು ಎಂದು ಟ್ವೀಟ್​ ಮಾಡಿದ್ದಾರೆ.

ಉಪರಾಷ್ಟ್ರಪತಿ ಜಗದೀಪ್​ ಧನ್​ಕರ್​​ ಅವರು ಕೂಡ ಅಗಲಿದ ನಾಯಕರಿಗೆ ಸಂತಾಪ ತಿಳಿಸಿದ್ದಾರೆ. ಚಾಣಾಕ್ಷ ಆಡಳಿತಗಾರ, ಸಾರ್ವಜನಿಕ ಜೀವನದ ಅಪರೂಪದ ವ್ಯಕ್ತಿ. ಅವರ ಕುಟುಂಬಕ್ಕೆ ನನ್ನ ತೀವ್ರ ಸಂತಾಪಗಳು ಎಂದು ತಿಳಿಸಿದ್ದಾರೆ.

ಶರದ್‌ ಯಾದವ್‌ ರಾಜಕೀಯ ಹಾದಿ ಹೀಗಿದೆ..: ಶರದ್​ ಯಾದವ್​ ಅವರು 1947 ಜುಲೈ 1ರಂದು ಮಧ್ಯಪ್ರದೇಶದ ಬಾಬೈ ಗ್ರಾಮದಲ್ಲಿ ಜನಿಸಿದ್ದರು. ಕೇಂದ್ರ ಸಚಿವರಾಗಿ ಕಾರ್ಯ ನಿರ್ವಹಿಸಿದ್ದಾರೆ. ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ ಸಂಚಾಲಕ ಮತ್ತು ಜನತಾ ದಳ-ಯುನೈಟೆಡ್ ಅಧ್ಯಕ್ಷ ಸಂಚಾಲಕರಾಗಿದ್ದವರು. 70ರ ದಶಕದ ಬಳಿಕ ಅವರು ರಾಜಕೀಯ ಜೀವನ ಪ್ರವೇಶ ಮಾಡಿದ್ದರು. ಮಧ್ಯಪ್ರದೇಶ ಜಬಲ್​ಪುರ್​ನಲ್ಲಿ ಲೋಕಸಭಾ ಉಪ ಚುನಾವಣೆ ಗೆಲ್ಲುವ ಮೂಲಕ ಸಂಸತ್​ ಪ್ರವೇಶ ಮಾಡಿದ್ದರು. ಕಿಡ್ನಿ ಹಾಗೂ ಇತರೆ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದ ಅವರು ಗುರುವಾರ ಖಾಸಗಿ ಆಸ್ಪತ್ರೆಯಲ್ಲಿ ನಿಧನರಾದರು.

ಇದನ್ನೂ ಓದಿ: ಮಾಜಿ ಕೇಂದ್ರ ಸಚಿವ, 7 ಸಲ MP, ಹಿರಿಯ ಸಮಾಜವಾದಿ ನಾಯಕ ಶರದ್ ಯಾದವ್ (75) ಇನ್ನಿಲ್ಲ