ಪ್ರತಿ ಕಿ.ಮೀಗೆ ಕೇವಲ 2 ರೂ ಖರ್ಚು! ಹೈಡ್ರೋಜನ್​ ಕಾರು ಬಳಕೆಗೆ ನಾಂದಿ ಹಾಡಿದ ನಿತಿನ್ ಗಡ್ಕರಿ

ಜಪಾನ್​ನ ಟೋಕಿಯೋ ಕಂಪನಿ ನಿರ್ಮಿಸಿರುವ ಹೈಡ್ರೋಜನ್​ ಇಂಧನ ಚಾಲಿತ ಕಾರನ್ನು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಸ್ವತಃ ಬಳಸುವ ಮೂಲಕ ಹೈಡ್ರೋಜನ್​ ಕಾರುಗಳ ಬಳಕೆ ಶುರು ಮಾಡಿದ್ದಾರೆ. ಪರಿಸರ ಸ್ನೇಹಿ ಕಾರು ಇದಾಗಿದ್ದು, ಕಡಿಮೆ ಪ್ರಯಾಣ ವೆಚ್ಚ ಇದರ ವಿಶೇಷತೆ.

ನವದೆಹಲಿ:ಇಂಧನ ಬೆಲೆಗಳು ಗಗನಕ್ಕೇರಿದ್ದು, ಇದರ ವಿರುದ್ಧ ಎಲ್ಲೆಡೆ ಅಸಮಾಧಾನದ ಕೂಗು ಕೇಳಿಬರುತ್ತಿದೆ. ಇದ ಬೆನ್ನಲ್ಲೇ ಜಗತ್ತಿನಲ್ಲಿ ನವೀಕರಣಗೊಳ್ಳದ ಇಂಧನಕ್ಕೆ ಪರ್ಯಾಯವಾಗಿ ಹೈಡ್ರೋಜನ್​ ಕಾರುಗಳನ್ನು ರೂಪಿಸಲಾಗುತ್ತಿದೆ. ನಿನ್ನೆ ಕೇಂದ್ರ ಸಚಿವ ನಿತಿನ್​ ಗಡ್ಕರಿ ಅವರೇ ಸ್ವತಃ ಹೈಡ್ರೋಜನ್​ ಕಾರಿನಲ್ಲಿ ಸಂಸತ್ತಿಗೆ ಆಗಮಿಸುವ ಮೂಲಕ ಹೈಡ್ರೋಜನ್​ ಕಾರುಗಳ ಬಳಕೆಗೆ ನಾಂದಿ ಹಾಡಿದ್ದಾರೆ.

ಭಾರತದಲ್ಲಿ ಇದೇ ಮೊದಲ ಬಾರಿಗೆ ಹೈಡ್ರೋಜನ್​ ಕಾರನ್ನು ಟೊಯೋಟಾ ಕಂಪನಿ ಪರಿಚಯಿಸಿದೆ. ಟೊಯೋಟಾ ಮಿರಾಯ್​ ಎಂದು ಹೆಸರಿಡಲಾದ ಈ ಪ್ರಾಯೋಗಿಕ ಕಾರಿನಲ್ಲಿ ಗಡ್ಕರಿ ಅವರು ತಮ್ಮ ನಿವಾಸದಿಂದ ಪ್ರಯಾಣ ಬೆಳೆಸಿ ಸಂಸತ್ತಿಗೆ ಬಂದಿದ್ದಾರೆ.

ಈ ಹಿಂದೆ ಗಡ್ಕರಿ ಅವರು ಹೈಡ್ರೋಜನ್​ ಆಧರಿತವಾದ ಸುಧಾರಿತ 'ಫ್ಯುಯೆಲ್ ಸೆಲ್ ಎಲೆಕ್ಟ್ರಿಕ್ ವೆಹಿಕಲ್' (ಎಫ್‌ಸಿಇವಿ) ಟೊಯೋಟಾ ಮಿರಾಯ್ ಅನ್ನು ಭಾರತಕ್ಕೆ ಮೊದಲ ಬಾರಿಗೆ ಪರಿಚಯಿಸಿದ್ದರು. ಹಸಿರು ಹೈಡ್ರೋಜನ್ ಇಂಧನವು ಕಾರಿಗೆ ಹೇಗೆ ಶಕ್ತಿ ತುಂಬುತ್ತದೆ ಎಂಬ ವಿಡಿಯೋವನ್ನೂ ಅವರು ಹಂಚಿಕೊಂಡಿದ್ದರು.

ಹಸಿರು ಇಂಧನ ಚಾಲಿತ ತಂತ್ರಜ್ಞಾನ ಅಳವಡಿಸಿಕೊಂಡಿರುವ ಈ ಕಾರುಗಳು ಎಲೆಕ್ಟ್ರಾನಿಕ್​ ಕಾರುಗಳಿಗಿಂತಲೂ ಕಡಿಮೆ ವೆಚ್ಚದ್ದಾಗಿವೆ. ಇವುಗಳ ಪ್ರಯಾಣ ದರವೂ ತೀರಾ ಕಡಿಮೆ. ಇವು ಮುಂದಿನ ದಿನಗಳಲ್ಲಿ ಪೆಟ್ರೋಲ್​ ಚಾಲಿತ ಕಾರುಗಳಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಅಭಿವೃದ್ಧಿ ಕಾಣಲಿವೆ ಎಂದು ಹೇಳಿದ್ದರು.

ಕಾರಿನ ವಿಶೇಷತೆಗಳಿವು..

• ಹೈಡ್ರೋಜನ್​ ಚಾಲಿತ ಈ ಕಾರು 600 ಕಿಲೋಮೀಟರ್​ ಕ್ರಮಿಸುವ ಶಕ್ತಿ ಇದೆ.
• ಇಂಧನಕ್ಕೆ ಹೋಲಿಸಿದರೆ ಇದರ ಪ್ರಯಾಣ ವೆಚ್ಚ ಭಾರಿ ಕಡಿಮೆ.
• ಪ್ರತಿ ಕಿ.ಮೀ. ಪ್ರಯಾಣ ವೆಚ್ಚ ಕೇವಲ 2 ರೂ. ಮಾತ್ರ ಆಗಲಿದೆ.
• ಟ್ಯಾಂಕ್​ ಅನ್ನು ಕೇವಲ 5 ನಿಮಿಷದಲ್ಲಿ ಭರ್ತಿ ಮಾಡಬಹುದು.
• ನವೀಕರಿಸಬಹುದಾದ ಮತ್ತು ಹಸಿರು ಪರಿಸರ ಸ್ನೇಹಿ ವಾಹನ ಇದಾಗಿದೆ.

ಇದನ್ನೂ ಓದಿ:ಮುಂದಿನ ಹಣಕಾಸು ವರ್ಷದಲ್ಲಿ ಅಣುಸ್ಥಾವರಗಳಿಗಾಗಿ 100 ಟನ್ ಯುರೇನಿಯಂ ಆಮದು