ಮದುವೆಯಾಗಿ ಎರಡೇ ತಿಂಗಳಿಗೆ ಮನಸ್ತಾಪ.. ಬಿ.ಟೆಕ್ ವಿದ್ಯಾರ್ಥಿನಿ ಕೊಂದು ಕಥೆ ಕಟ್ಟಿದ ಗಂಡ!

ವಿವಾಹೇತರ ಸಂಬಂಧಕ್ಕೆ ಅಡ್ಡಿಯಾಗಬಹುದು ಎಂಬ ಕಾರಣದಿಂದಾಗಿ ಕಟ್ಟಿಕೊಂಡ ಹೆಂಡತಿಯನ್ನೇ ಕೊಲೆ ಮಾಡಿರುವ ಪಾಪಿ ಗಂಡ, ಇದೊಂದು ಆತ್ಮಹತ್ಯೆ ಪ್ರಕರಣ ಎಂದು ಬಿಂಬಿಸುವ ನಾಟಕವಾಡಿದ್ದಾನೆ.

ಹೈದರಾಬಾದ್​(ತೆಲಂಗಾಣ):ನವವಿವಾಹಿತೆಯನ್ನು ಬರ್ಬರವಾಗಿ ಕೊಲೆ ಮಾಡಿರುವ ಪ್ರಕರಣ ತೆಲಂಗಾಣದ ಖಮ್ಮಮ್ ಎಂಬಲ್ಲಿ ನಡೆದಿದ್ದು, ಗಂಡನೇ ಈ ಕೃತ್ಯವೆಸಗಿರುವುದು ಬೆಳಕಿಗೆ ಬಂದಿದೆ.

ನವ್ಯಾ ರೆಡ್ಡಿ(22) ಪತಿಯಿಂದಲೇ ಕೊಲೆಯಾಗಿರುವ ಮಹಿಳೆ. ದ್ವಿತೀಯ ವರ್ಷದ ಬಿ.ಟೆಕ್​ ವಿದ್ಯಾರ್ಥಿನಿಯಾಗಿದ್ದ ನವ್ಯಾ ಸಾಫ್ಟವೇರ್ ಇಂಜಿನಿಯರ್​ ನಾಗಿಶೆಶು ರೆಡ್ಡಿ ಜೊತೆ ಕಳೆದ ಡಿಸೆಂಬರ್ 9ರಂದು ವಿವಾಹವಾಗಿದ್ದಳು. ಮದುವೆಯಾದ ಬಳಿಕ ನಾಗಿಶೆಶುಗೆ ಬೇರೆ ಮಹಿಳೆವೋರ್ವಳಿಂದ ಮೇಲಿಂದ ಮೇಲೆ ಫೋನ್ ಕರೆ, ಮೆಸೇಜ್​​ ಬರುತ್ತಿದ್ದವು. ಇದರಿಂದ ನವ್ಯಾ ವಿಚಲಿತಗೊಂಡಿದ್ದಳು. ಜತೆಗೆ ಇದು ಇಬ್ಬರ ನಡುವೆ ಮನಸ್ತಾಪಕ್ಕೆ ಕಾರಣವಾಗಿತ್ತು ಎನ್ನಲಾಗ್ತಿದೆ. ತನ್ನ ವಿವಾಹೇತರ ಸಂಬಂಧಕ್ಕೆ ನವ್ಯಾ ಅಡ್ಡಿಯಾಗಬಹುದು ಎಂಬ ಕಾರಣದಿಂದಲೇ ಪತ್ನಿಯ ಕೊಲೆ ಮಾಡಿದ್ದಾನೆ.

ಹೆಂಡತಿ ಕೊಲೆ ಮಾಡಿದ ಪಾಪಿ ಗಂಡ

ಫೆ.2ರಂದು ಕಾಲೇಜ್​ಗೆ ಹೋಗಲು ಸಜ್ಜಾಗಿದ್ದ ನವ್ಯಾಳನ್ನ ನಾಗಶೆಶು ಬಿಟ್ಟು ಬರಲು ಮುಂದಾಗುತ್ತಾನೆ. ಸ್ಕೂಟರ್​ ಮೇಲೆ ಕರೆದುಕೊಂಡು ಹೋಗುತ್ತಿದ್ದ ವೇಳೆ ಮಾರ್ಗ ಮಧ್ಯೆ ಜ್ಯೂಸ್ ಕುಡಿಯಲು ವಾಹನ ನಿಲ್ಲಿಸಿದ್ದಾರೆ. ಜ್ಯೂಸ್​ನಲ್ಲಿ ನಿದ್ದೆ ಮಾತ್ರೆ ಬೆರೆಸಿ ನೀಡಿದ್ದು, ಈ ವೇಳೆ ಮೂರ್ಛೆ ಹೋಗಿರುವ ನವ್ಯಾಳನ್ನ ಮರಕ್ಕೆ ನೇಣು ಬಿಗಿದು ಕೊಲೆ ಮಾಡಿದ್ದಾನೆ.

ಇದಾದ ಬಳಿಕ ಇದೊಂದು ಆತ್ಮಹತ್ಯೆ ಎಂದು ಬಿಂಬಿಸುವ ಯತ್ನ ನಡೆಸಿದ್ದು, ನವ್ಯಾಳ ಫೋನ್​ನಿಂದಲೇ ಆಕೆಯ ತಂದೆಗೆ ಆತ್ಮಹತ್ಯೆ ಮಾಡಿಕೊಳ್ಳುವ ಬಗ್ಗೆ ಮೆಸೇಜ್ ಮಾಡಿದ್ದಾನೆ. ತಕ್ಷಣವೇ ಮೊಬೈಲ್​ ಸ್ವಿಚ್​ ಆಫ್​ ಮಾಡಿದ್ದಾನೆ. ಘಟನೆ ಬಳಿಕ ಖುದ್ದಾಗಿ ಪೊಲೀಸ್ ಠಾಣೆಯಲ್ಲಿ ಹೆಂಡತಿ ಕಾಣೆಯಾಗಿರುವ ಬಗ್ಗೆ ದೂರು ನೀಡಿದ್ದಾನೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಫೆ. 2ನೇ ತಾರೀಖಿನ ಸ್ಥಳೀಯ ಸಿಸಿಟಿವಿ ವಿಡಿಯೋ ತಪಾಸಣೆ ನಡೆಸಿದಾಗ ಸತ್ಯಾಂಶ ಹೊರಬಿದ್ದಿದೆ. ಇದೀಗ ಆತನ ಬಂಧನ ಮಾಡುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.