ಕೊರೊನಾದಿಂದ ಏಳೇ ದಿನಕ್ಕೆ ಗಂಡನನ್ನು ಕಳೆದುಕೊಂಡ ಪತ್ನಿ!

ದೇಶಾದ್ಯಂತ ಕೊರೊನಾ ಹಾವಳಿ ಹೆಚ್ಚಾಗ್ತಿದೆ. ಅನೇಕರು ಈ ಮಹಾಮಾರಿಗೆ ಬಲಿಯಾಗುತ್ತಿದ್ದಾರೆ. ಅದರಲ್ಲಿ ಯುವಕರೇ ಹೆಚ್ಚು ಸಾವನ್ನಪ್ಪುತ್ತಿರುವುದು ದುರದೃಷ್ಟಕರ ಸಂಗತಿ. ಈಗ ಕೆಲ ದಿನಗಳ ಹಿಂದೆ ಮದುವೆಯಾಗಿದ್ದ ಯುವಕನೊಬ್ಬನನ್ನು ಕೊರೊನಾ ಬಲಿ ಪಡೆದಿದೆ. ಈ ಘಟನೆ ಜಾರ್ಖಂಡ್​ನ ಹಜಾರಿಬಾಗ್​ನಲ್ಲಿ ನಡೆದಿದೆ.

ಹಜಾರಿಬಾಗ್​:ಕೊರೊನಾ ಹಾವಳಿ ದಿನದಿಂದ ದಿನಕ್ಕೆ ಹೆಚ್ಚಾಗ್ತಿದ್ದು, ಅನೇಕರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಈ ಕೊರೊನಾ ಮಹಾಮಾರಿ ಸೋಂಕು ಏಳು ದಿನಗಳ ಹಿಂದೆ ಮದುವೆಯಾಗಿದ್ದ ನವವಿವಾಹಿತನನ್ನು ಬಲಿ ಪಡೆದಿದೆ.

ಕೊರೊನಾದಿಂದ ಏಳೇ ದಿನಕ್ಕೆ ಗಂಡನನ್ನು ಕಳೆದುಕೊಂಡ ಪತ್ನಿ

ಜಿಲ್ಲೆಯ ಝರ್ಪೈ ಗ್ರಾಮದ ನಿವಾಸಿ ಕೈಲೇಶ್ವರ್​ ಮಹತೊ ಪುತ್ರಿ ಪ್ರಿಯಾಂಕಾ ಮದುವೆ ಏಪ್ರಿಲ್​ 28ರಂದು ಹಜಾರಿಬಾಗ್​ ಹುಟ್ಪಾ ನಿವಾಸಿ ಅನಿಲ್​ ಮಹತೊ ಜೊತೆ ನಡೆದಿತ್ತು. ಪ್ರಿಯಾಂಕಾ ನೂರೊಂದು ಕನಸುಗಳನ್ನು ಹೊತ್ತುಕೊಂಡು ಗಂಡ ಅನಿಲ್​ ಮನೆಗೆ ತೆರಳಿದ್ದಳು. ಆದ್ರೆ ಮದುವೆಯಾಗಿ ಏಳೇ ದಿನಕ್ಕೆ ಅನಿಲ್​ ಕೊರೊನಾದಿಂದ ಮೃತಪಟ್ಟಿದ್ದಾನೆ.

ಮದುವೆಗೂ ಮುನ್ನ ಅನಿಲ್​ಗೆ ಕೊರೊನಾ ಲಕ್ಷಣಗಳಿದ್ದವು. ಆದ್ರೆ ಮದುವೆ ಹತ್ತಿರ ಬಂದ ಹಿನ್ನೆಲೆ ಆರೋಗ್ಯದ ಬಗ್ಗೆ ನಿರ್ಲಕ್ಷ್ಯ ವಹಿಸಿದ್ದಾನೆ ಎನ್ನಲಾಗಿದೆ. ಮದುವೆ ಮಾಡಿಕೊಂಡ ಬಳಿಕ ದಿನದಿಂದ ದಿನಕ್ಕೆ ಆರೋಗ್ಯ ಕ್ಷೀಣಸುತ್ತಲೇ ಇದ್ದಾಗ ಆಸ್ಪತ್ರೆಗೆ ದಾಖಲಾಗಿದ್ದಾನೆ. ಚಿಕಿತ್ಸೆ ಫಲಿಸದೇ ಗುರುವಾರ ಅನಿಲ್​ ಕೊರೊನಾಗೆ ಬಲಿಯಾಗಿದ್ದಾನೆ.

ಒಂದು ಸಣ್ಣ ತಪ್ಪಿನಿಂದ ಒಂದು ಹೆಣ್ಣಿನ ಜೀವನ ಹಾಳಾದಂತಾಗಿದೆ. ನವವಿವಾಹಿತೆಯ ನೂರೊಂದು ಕನಸಿಗೆ ವಿಧಿ ವಿರಾಮ ಇಟ್ಟಿದೆ.

ಈಟಿವಿ ಭಾರತ ಮನವಿ...

ಎಷ್ಟೋ ಘಟನೆಗಳು ನಮಗೆ ಪಾಠ ಕಲಿಸುತ್ತಿವೆ. ಕೋವಿಡ್​ನಿಂದಾಗಿ ಅನೇಕರು ಅಕಾಲಿಕ ಮರಣ ಹೊಂದುತ್ತಿದ್ದಾರೆ. ಕೊರೊನಾ ಬಗ್ಗೆ ನಿರ್ಲಕ್ಷ್ಯ ಬೇಡ. ಸಾಮಾಜಿಕ ಅಂತರ, ಸ್ಯಾನಿಟೈಸರ್​ ಬಳಕೆ ಮುಖ್ಯ. ಅನಗತ್ಯವಾಗಿ ಹೊರಗಡೆ ಬಂದು ಮತ್ತು ನಿರ್ಲಕ್ಷ್ಯ ತೋರುವುದರಿಂದ ಅಮೂಲ್ಯವಾದ ಪ್ರಾಣ ಕಳೆದುಕೊಳ್ಳುವ ಸಂಭವವಿರುತ್ತೆ. ಅಷ್ಟೇ ಅಲ್ಲ ನಿಮ್ಮನ್ನು ನಂಬಿ ಜೀವನ ಮಾಡುತ್ತಿರುವ ಕುಟುಂಬಸ್ಥರು ಸಹ ಬೀದಿಗೆ ಬರುವ ಸ್ಥಿತಿ ಎದುರಾಗಬಹುದು. ಹೀಗಾಗಿ ಕೊರೊನಾ ಬಗ್ಗೆ ಜಾಗೃತರಾಗಿರಿ.