ನವದೆಹಲಿ: ಫುಡ್ ಡೆಲಿವರಿ ಆ್ಯಪ್ ಅಥವಾ ಹೋಟೆಲ್ಗಳಲ್ಲಿ ಫುಡ್ ಆರ್ಡರ್ ಮಾಡಿದಾಗ ತಪ್ಪಾದ ಆಹಾರ ಒದಗಿಸಿರುವ ಘಟನೆಗಳು ಸಾಕಷ್ಟು ವರದಿಯಾಗಿವೆ. ಯಾವುದೋ ಗಡಿಬಿಡಿ, ಮತ್ತಿತರ ಕಾರಣದಿಂದಾಗುವ ಇಂತಹ ಅಭಾಸಗಳು ಗ್ರಾಹಕರು ಸಿಟ್ಟಿಗೇಳುವಂತೆ ಮಾಡುತ್ತವೆ. ಈ ಸಂಬಂಧ ಗಲಾಟೆ, ಆಕ್ರೋಶ ಸಹಜ. ಆದರೆ, ಇದಕ್ಕಿಂತ ಭಿನ್ನವಾದ ಪ್ರಕರಣ ಇದೀಗ ವರದಿಯಾಗಿದೆ.
ತಾಜ್ಮಹಲ್ನ ಅದ್ಬುತ ಸೌಂದರ್ಯ ಆಹ್ಲಾದಿಸಲು ಬಂದಿಳಿದ ಅತಿಥಿಗೆ ಹೋಟೆಲ್ನವರು ತಪ್ಪಾದ ಆಹಾರ ನೀಡಿದ್ದಾರೆ. ಸಸ್ಯಾಹಾರಿಯಾದ ವ್ಯಕ್ತಿಗೆ ಮಾಂಸಾಹಾರ ನೀಡಲಾಗಿದೆ. ಇದರಿಂದ ಉಗ್ರ ಪ್ರತಾಪಿಯಾದ ಗ್ರಾಹಕ ಇದೀಗ 1 ಕೋಟಿ ರೂ ಪರಿಹಾರಕ್ಕೆ ಬೇಡಿಕೆ ಇಟ್ಟಿದ್ದಾರೆ.
ಈ ಸಂಬಂಧ ಹೇಳಿಕೆ ನೀಡಿರುವ ವ್ಯಕ್ತಿ, ಮಾಂಸಾಹಾರ ನೀಡುವ ಮೂಲಕ ಅವರು ನನ್ನ ಧಾರ್ಮಿಕ ಭಾವನೆ ಮಾತ್ರ ಧಕ್ಕೆ ತಂದಿಲ್ಲ, ಇದರಿಂದ ನನ್ನ ಜೀವಕ್ಕೂ ಕುತ್ತು ತಂದಿದ್ದಾರೆ ಎಂದಿದ್ದಾರೆ. ಪ್ರತಿಷ್ಠಿತ ಅಂತಾರಾಷ್ಟ್ರೀಯ ಲಕ್ಸೂರಿ ಹೊಟೇಲ್ನಲ್ಲಿ ಘಟನೆ ನಡೆದಿದೆ. ಮಾಂಸಾಹಾರವನ್ನು ತಿಂದ ಬಳಿಕ ಗ್ರಾಹಕನಿಗೆ ವಿಚಾರ ಗೊತ್ತಾಗಿದೆ. ಆಹಾರ ಸೇವನೆಯಿಂದ ತಮ್ಮ ಆರೋಗ್ಯ ಕೂಡ ಹದಗೆಟ್ಟಿದ್ದು, ಆಸ್ಪತ್ರೆಗೆ ದಾಖಲಾಗುವಂತಾಯಿತು ಎಂದು ತಿಳಿಸಿದ್ದಾರೆ.
ಗ್ರಾಹಕನನ್ನು ಅರ್ಪಿತ್ ಗುಪ್ತಾ ಎಂದು ಗುರುತಿಸಲಾಗಿದೆ. ಹೋಟೆಲ್ ವಿರುದ್ಧ ನ್ಯಾಯಕ್ಕಾಗಿ ಇವರು ಹೋರಾಟಕ್ಕಿಳಿದಿದ್ದು, ಒಂದು ಕೋಟಿ ರೂ ಪರಿಹಾರ ಪಾವತಿಸುವಂತೆ ಹೋಟೆಲ್ ಮ್ಯಾನೇಜ್ಮೆಂಟ್ಗೆ ನೋಟಿಸ್ ಕೂಡ ಕಳುಹಿಸಿದ್ದಾರೆ.
ಚಿಕನ್ ರೋಲ್ ಯಡವಟ್ಟು:ಗ್ರಾಹಕನವಕೀಲ ನರೊತ್ತಮ್ ಸಿಂಗ್ ಮಾತನಾಡಿ, ಆಗ್ರಾದ ಫತೇಹಾಬಾದ್ ರಸ್ತೆಯಲ್ಲಿರುವ ಹೋಟೆಲ್ನಲ್ಲಿ ಏಪ್ರಿಲ್ 14ರಂದು ತಮ್ಮ ಕಕ್ಷಿದಾರ ಮತ್ತು ಆತನ ಸ್ನೇಹಿತರು ಸನ್ನಿ ಗಾರ್ಗ್ ಉಳಿದುಕೊಂಡಿದ್ದರು. ಈ ವೇಳೆ ಗುಪ್ತಾ, ವೆಜಿಟೇರಿಯನ್ ರೋಲ್ ಆರ್ಡರ್ ಮಾಡಿದ್ದರು. ಆಹಾರ ಬಂದಾಗ ಸೇವಿಸಿದ್ದಾರೆ. ಬಳಿಕ ರುಚಿಯಲ್ಲಿ ವ್ಯತ್ಯಾಸ ಬಂದಾಗ ಹೊಟೇಲ್ ಸಿಬ್ಬಂದಿಯನ್ನು ವಿಚಾರಿಸಿದ್ದಾರೆ. ಈ ಸಂದರ್ಭದಲ್ಲಿ ಆತನಿಗೆ ಚಿಕನ್ ರೋಲ್ ಸರ್ವ್ ಮಾಡಿರುವುದು ತಿಳಿದು ಬಂದಿದೆ.
ಇದನ್ನು ತಿಳಿದ ಗುಪ್ತಾ ವಾಂತಿ ಮಾಡಲು ಆರಂಭಿಸಿದರು. ಆಸ್ಪತ್ರೆಗೆ ದಾಖಲಾಗಿದ್ದು, ಆರೋಗ್ಯ ದುರ್ಬಲಗೊಂಡಿದೆ ಎಂದು ವಾದ ಮಂಡಿಸಿದ್ದಾರೆ. ತಮ್ಮ ತಪ್ಪನ್ನು ಮರೆಮಾಚುವ ಉದ್ದೇಶದಿಂದ ಹೊಟೇಲ್ನವರು ತಮ್ಮ ಕಕ್ಷಿದಾರರ ಊಟದ ಬಿಲ್ ಕೂಡ ನೀಡಿಲ್ಲ. ಈ ಎಲ್ಲ ಘಟನೆಯನ್ನು ಅವರ ಫೋನ್ನಲ್ಲಿ ದಾಖಲಿಸಲಾಗಿದೆ. ಹೊಟೇಲ್ನವರ ಸರಳ ಕ್ಷಮಾಪಣೆ ನಮಗೆ ಸರಿ ಹೊಂದುವುದಿಲ್ಲ. ಈ ಸಂಬಂಧ ಕಠಿಣ ಕ್ರಮ ಜರುಗಿಸಲೇಬೇಕು ಎಂದಿದ್ದಾರೆ.
ಈ ಕುರಿತು ಪ್ರತಿಕ್ರಿಯೆ ವ್ಯಕ್ತಪಡಿಸಿರುವ ಹೊಟೇಲ್ ಆಡಳಿ ಮಂಡಳಿ, ಈಗಾಗಲೇ ಗುಪ್ತಾ ಅವರಲ್ಲಿ ಕ್ಷಮಾಪಣೆ ಕೇಳಿದ್ದು, ಇದು ಅಚಾತುರ್ಯದ ಘಟನೆ ಎಂದು ತಿಳಿಸಿದೆ.
ಇಂತಹ ಪ್ರಕರಣದಲ್ಲಿ ಧಾರ್ಮಿಕ ಭಾವನೆಗೆ ಧಕ್ಕೆ ತಂದಿದ್ದು, ಆಹಾರ ಸುರಕ್ಷತಾ ಕಾಯ್ದೆ, ಕಲುಷಿತ ಆಹಾರ ಸೇವನೆಯ ಸೆಕ್ಷನ್ ಅಡಿಯಲ್ಲಿ ಪ್ರಕರಣ ದಾಖಲಿಸಬಹುದು ಎಂದು ವಕೀಲ ಅಶೋಕ್ ಗುಪ್ತಾ ತಿಳಿಸಿದ್ದಾರೆ. ಇದೇ ವೇಳೆ, ಪ್ರಕರಣ ಸಾಬೀತಾದಲ್ಲಿ ಮೂರರಿಂದ ಹತ್ತು ವರ್ಷ ಜೈಲು ಶಿಕ್ಷೆಕೂಡ ವಿಧಿಸಬಹುದು ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ:ಜಗತ್ತಿನ ಶ್ರೀಮಂತ ನಗರಗಳಿವು: ಬೆಂಗಳೂರಿಗೂ ಮಿಲಿಯನೇರ್ ಸಿಟಿಗಳ ಪಟ್ಟಿಯಲ್ಲಿ ಸ್ಥಾನ!
