ಮೇ 3ರವರೆಗೆ ಭಾರತದಿಂದ ತೆರಳುವ ವಿಮಾನಗಳಿಗೆ ಹಾಂಗ್‌ಕಾಂಗ್ ನಿರ್ಬಂಧ

ಕೋವಿಡ್ ಪ್ರಕರಣಗಳು ಉಲ್ಬಣಿಸಿದ್ದು ಭಾರತ ಸೇರಿದಂತೆ ಕೆಲ ರಾಷ್ಟ್ರಗಳ ವಿಮಾನಗಳಿಗೆ ಹಾಂಗ್‌ಕಾಂಗ್ ಸರ್ಕಾರ ನಿರ್ಬಂಧ ಹೇರಿದೆ.

ನವದೆಹಲಿ: ದೇಶದಲ್ಲಿ ಕೋವಿಡ್ -19 ಪ್ರಕರಣಗಳು ಹೆಚ್ಚುತ್ತಿದ್ದು ಮಂಗಳವಾರದಿಂದ ಮೇ 3 ರವರೆಗೆ ಭಾರತದೊಂದಿಗೆ ಸಂಪರ್ಕ ಕಲ್ಪಿಸುವ ಎಲ್ಲಾ ವಿಮಾನಗಳ ಹಾರಾಟವನ್ನು ಹಾಂಗ್‌ಕಾಂಗ್ ಸ್ಥಗಿತಗೊಳಿಸಿದೆ.

ಭಾರತ ಮಾತ್ರವಲ್ಲದೆ ಪಾಕಿಸ್ತಾನ ಮತ್ತು ಫಿಲಿಪೈನ್ಸ್‌ಗೆ ಹೋಗುವ ಮತ್ತು ಅಲ್ಲಿಂದ ಬರುವ ವಿಮಾನಗಳಿಗೂ ಈ ನಿಯಮ ಅನ್ವಯಿಸಲಿದೆ. ಈ ತಿಂಗಳಿನಲ್ಲಿ ಎರಡು ವಿಸ್ಟಾರಾ ವಿಮಾನಗಳ 50 ಪ್ರಯಾಣಿಕರಲ್ಲಿ ಕೋವಿಡ್ ಪಾಸಿಟಿವ್ ಕಂಡುಬಂದ ನಂತರ ಅಲ್ಲಿನ ಆಡಳಿತ ಎಚ್ಚೆತ್ತುಕೊಂಡಿದೆ.

ಹೊಸ ನಿಯಮದ ಪ್ರಕಾರ, ಮೇಲೆ ತಿಳಿಸಿದ ರಾಷ್ಟ್ರಗಳನ್ನು ಹೊರತುಪಡಿಸಿ ಇತರ ದೇಶಗಳಿಂದ ಹಾಂಕ್​ ಕಾಂಗ್​ಗೆ ತೆರಳುವವರು ಪ್ರಯಾಣಕ್ಕೆ 72 ಗಂಟೆಗಳ ಮೊದಲು ಮಾಡಿದ ಆರ್​​ಟಿ-ಪಿಸಿಆರ್​ ನೆಗೆಟಿವ್ ವರದಿ ಹೊಂದಿರಬೇಕು.

ಇದನ್ನೂ ಓದಿ: ಕೋವಿಡ್​ ವಿರುದ್ಧ ಹೋರಾಡಲು 'ಆಕ್ಸಿಜನ್​​ ಎಕ್ಸ್​ಪ್ರೆಸ್' ಹಳಿಗೆ..

ಮುಂಬೈ-ಹಾಂಗ್‌ಕಾಂಗ್ ನಡುವಿನ ವಿಮಾನ ಹಾರಾಟವನ್ನು ಮೇ 2 ರವರೆಗೆ ನಿಲ್ಲಿಸಿರುವುದಾಗಿ ಹಾಂಗ್‌ಕಾಂಗ್ ಸರ್ಕಾರ ಭಾನುವಾರ ಪ್ರಕಟಿಸಿತ್ತು. ಮುಂಬೈ-ಹಾಂಗ್‌ಕಾಂಗ್ ವಿಮಾನದಲ್ಲಿ ತೆರಳಿದ ಮೂವರು ಪ್ರಯಾಣಿಕರಲ್ಲಿ ಕೋವಿಡ್ ಪಾಸಿಟಿವ್ ಕಂಡು ಬಂದ ಬಳಿಕ ಈ ನಿರ್ಧಾರ ಎಂದು ತಿಳಿಸಿತ್ತು.

ಕಳೆದ ಭಾನುವಾರದವರೆಗೆ, ಏಪ್ರಿಲ್ 4 ರಂದು ದೆಹಲಿ-ಹಾಂಕ್‌ಕಾಂಗ್ ವಿಸ್ಟಾರ ವಿಮಾನದಲ್ಲಿ ಪ್ರಯಾಣಿಸಿದವರ ಪೈಕಿ 47 ಮಂದಿಗೆ ಕೋವಿಡ್ ಪಾಸಿಟಿವ್ ಬಂದಿದೆ. ದೆಹಲಿ-ಹಾಂಗ್‌ ಕಾಂಗ್​ ನಡುವಿನ ವಿಮಾನ ಹಾರಾಟಕ್ಕೆ ಈ ಹಿಂದೆಯೇ ಏಪ್ರಿಲ್​ 6 ರಿಂದ 19 ರವರೆಗೆ ನಿರ್ಬಂಧ ಹೇರಲಾಗಿದೆ.