ಲೋನ್​ ಟು ವ್ಯಾಲ್ಯು ನಿಯಮಗಳ ಸಡಿಲಿಕೆ ವಿಸ್ತರಣೆ: ಗೃಹ ಸಾಲ ಇನ್ನೂ ಅಗ್ಗ

ವೈಯಕ್ತಿಕ ಗೃಹ ಸಾಲದ ಹೊಣೆಗಾರಿಕೆಯನ್ನು 2020ರ ಅಕ್ಟೋಬರ್​ನಲ್ಲಿ ಸಡಿಲಿಕೆ ಮಾಡಲಾಗಿದೆ. ಇದನ್ನು ಲೋನ್​ ಟು ವ್ಯಾಲ್ಯು ಅನುಪಾತಕ್ಕೆ ಜೋಡಿಸುವುದನ್ನು 2023ರ ಮಾರ್ಚ್​​ 31ರವರೆಗೆ ವಿಸ್ತರಿಸುವ ಬಗ್ಗೆ ಆರ್​ಬಿಐ ಘೋಷಿಸಿದೆ.

ಮುಂಬೈ(ಮಹಾರಾಷ್ಟ್ರ): ರೆಪೋ ದರ ಏರಿಕೆ ಮಾಡದೆ ಯಥಾಸ್ಥಿತಿ ಕಾಯ್ದುಕೊಂಡಿರುವ ಭಾರತೀಯ ರಿಸರ್ವ್​ ಬ್ಯಾಂಕ್ (ಆರ್​ಬಿಐ) ಗೃಹ ಸಾಲವನ್ನು ತಗ್ಗಿಸುವ ನಿರ್ಣಯ ತೆಗೆದುಕೊಂಡಿದೆ. ಹೊಸ ಗೃಹ ಸಾಲಗಳಿಗೆ ಸಂಬಂಧಿಸಿದಂತೆ ಸಾಲದ ಹೊಣೆಗಾರಿಕೆಯನ್ನು (ರಿಸ್ಕ್ ವೇಯ್ಟ್​) ಸಡಿಲಗೊಳಿಸಿ ಅದನ್ನು ಸಾಲದ ಮೌಲ್ಯದ ಅನುಪಾತ (loan-to-value, LTV) ಕ್ಕೆ ಜೋಡಿಸುವುದನ್ನು 2023ರ ಮಾರ್ಚ್​​ 31ರವರೆಗೆ ವಿಸ್ತರಿಸುವ ಬಗ್ಗೆ ಆರ್​ಬಿಐ ಘೋಷಿಸಿದೆ.

ವೈಯಕ್ತಿಕ ಗೃಹ ಸಾಲದ ಹೊಣೆಗಾರಿಕೆಯನ್ನು 2020ರ ಅಕ್ಟೋಬರ್​ನಲ್ಲಿ ಸಡಿಲಿಕೆ ಮಾಡಲಾಗಿದೆ. ಇದನ್ನು ಲೋನ್​ ಟು ವ್ಯಾಲ್ಯು ಅನುಪಾತಕ್ಕೆ ಮಾತ್ರ ಜೋಡಿಸಲಾಗುತ್ತದೆ. ಇದರಿಂದ ಗೃಹ ನಿರ್ಮಾಣ ವಲಯಕ್ಕೆ ಅನುಕೂಲವಾಗಲಿದೆ ಎಂದು ಆರ್​ಬಿಐ ಗರ್ವನರ್​ ಶಕ್ತಿಕಾಂತ್ ದಾಸ್​ ತಿಳಿಸಿದ್ದಾರೆ.

ಆರ್​ಬಿಐನ ಈ ನಿರ್ಧಾರವನ್ನು ತಜ್ಞರು ಸಹ ಸ್ವಾಗತಿಸಿದ್ದಾರೆ. ಕೊರೊನಾ ಸಾಂಕ್ರಾಮಿಕ ಹಾವಳಿ ಮತ್ತು ಜಾಗತಿಕ ಬಿಕ್ಕಟ್ಟಿನ ನಡುವೆ ರಿಯಲ್​ ಎಸ್ಟೇಟ್​ ಉದ್ಯಮಕ್ಕೆ ಬೆಳ್ಳಿಗೆರಿ ಮೂಡಿಸಿದಂತೆ ಆಗಿದೆ. ಸಾರ್ವಜನಿಕರು ರಿಯಲ್ ಎಸ್ಟೇಟ್​ನಲ್ಲಿ ಸುರಕ್ಷಿತವಾಗಿ ಹೂಡಿಕೆಯನ್ನು ಮುಂದುವರೆಸಲು ಇದು ಸಹಕಾರಿಯಾಗಲಿದೆ. ಗೃಹ ಸಾಲ ಅಗ್ಗವಾಗಲಿದೆ ಎಂದು ರಾಮ್​ ರಾಹೇಜ್​ ಹೇಳಿದ್ದಾರೆ.

ಏನಿದು ಲೋನ್​ ಟು ವ್ಯಾಲ್ಯು ಅನುಪಾತ? ಲೋನ್​ ಟು ವ್ಯಾಲ್ಯು ಅನುಪಾತ ಎಂದರೆ ಗ್ರಾಹಕರು ಮಾಡುವ ಸಾಲ ಮತ್ತು ಖರೀದಿಸುವ ಆಸ್ತಿಯ ಮೌಲ್ಯಕ್ಕೆ ಹೋಲಿಸುವ ಆರ್ಥಿಕ ಅನುಪಾತವಾಗಿದೆ.