ಮಥುರಾ ( ಉತ್ತರ ಪ್ರದೇಶ): ಬಣ್ಣ ಬಣ್ಣದ ರಂಗಿನ ಹೋಳಿ ಹಬ್ಬ ಎಂದರೆ ಎಲ್ಲರಿಗೂ ಅಚ್ಚು ಮೆಚ್ಚು. ಅದರಲ್ಲೂ ಉತ್ತರ ಪ್ರದೇಶದಲ್ಲಿ ಈ ಹಬ್ಬ ಬಲು ವಿಶೇಷ. ಇಲ್ಲಿನ ಮಥುರಾ, ವೃಂದಾವನ ಸೇರಿದಂತೆ ಹಲವು ಕಡೆ ವಾರನುಗಟ್ಟಲೇ ಹಬ್ಬ ಆಚರಿಸುವ ಜೊತೆಗೆ ಪ್ರತಿ ನಿತ್ಯವೂ ವಿಶೇಷ ಹೋಳಿ ಆಚರಣೆಗಳು ನಡೆಯುತ್ತವೆ. ಅದರಲ್ಲಿ ಒಂದು ಈ 'ಲಾತ್ ಮಾರ್ ಹೋಳಿ' (ಕೋಲಿನಿಂದ ಹೊಡೆಯುವ ಹೋಳಿ).
ಕೃಷ್ಣನ ಪ್ರೇಯಸಿಯಾದ ರಾಧಾ ರಾಣಿಯ ಊರಾದ ಬರ್ಸಾನದಲ್ಲಿ ಈ ಹೋಳಿಯನ್ನು ವಿಶೇಷವಾಗಿ ಆಚರಿಸಲಾಗುವುದು. ಮಹಿಳೆಯರಿಗೆ ಬಣ್ಣ ಹಾಕಲು ಅವರ ಹಿಂದೆ ಪುರುಷರು ಹೋದಾಗ, ಈ ಬಣ್ಣದಿಂದ ತಪ್ಪಿಸಿಕೊಳ್ಳಲು, ಮಹಿಳೆಯರು ಕೋಲಿನಿಂದ ಹೊಡೆಯುತ್ತಾರೆ. ಇದೇ ಕಾರಣಕ್ಕೆ ಇದನ್ನು ಲಾತ್ ಮಾರ್ ಹೋಳಿ ಎಂದು ಕರೆಯುತ್ತಾರೆ. ಪ್ರತಿ ವರ್ಷ ಈ ಸಂಭ್ರಮದ ಲಾತ್ಮಾರ್ ಹೋಳಿ ಆಚರಣೆಗೆ ಸಾವಿರಾರು ಭಕ್ತರು ಮತ್ತು ಪ್ರವಾಸಿಗರು ಇಲ್ಲಿ ಸೇರುತ್ತಾರೆ. ಈ ಹಬ್ಬ ರಾಧೆ ಮತ್ತು ಕೃಷ್ಣರಿಗೆ ಸಮರ್ಪಣೆಯಾಗಿ ಆಚರಿಸಲಾಗುವುದು
ದ್ವಾಪರ ಯುಗದ ಮೆಲುಕು: ಬರ್ಸಾನದಲ್ಲಿ ನಡೆಯುವ ಈ ಹೋಳಿ ಆಚರಣೆ ಮೂಲಕ ದ್ವಾಪರ ಯುಗದ ಆಟದ ಮೆಲುಕು ಹಾಕಲಾಗುವುದು. ದ್ವಾಪರ ಯುಗದಲ್ಲಿ ಕೃಷ್ಣ, ರಾಧಾ ಮತ್ತು ಆಕೆಯ ಗೆಳತಿಗೆ ಬಣ್ಣ ಬಳಿಯಲು ಬರುತ್ತಿದ್ದ. ಕೃಷ್ಣದ ಈ ಬಣ್ಣದೊಕುಳಿಯಿಂದ ತಪ್ಪಿಸಿಕೊಳ್ಳಲು ಅವರು ಅವನಿಗೆ ಕೋಲಿನಿಂದ ಹೊಡೆಯಲು ಮುಂದಾಗುತ್ತಿದ್ದರು. ಈ ಘಟನೆಯನ್ನು ಲಾತ್ ಮಾರ್ ಹೋಲಿ ಮೂಲಕ ಮತ್ತೆ ನೆನಪಿಸಲಾಗುವುದು ಎನ್ನುತ್ತಾರೆ ಬರ್ಸಾನದ ಲಾಲ್ಡಿ ದೇಗುಲದ ಅರ್ಚಕರಾದ ರಾಸ್ ಬಿಹಾರಿ.
ಮಥುರಾದಲ್ಲಿ 25 ದಿನಗಳ ಕಾಲ ಹೋಳಿಯನ್ನು ಆಚರಿಸಲಾಗುವುದು. ವಿವಿಧ ಸ್ಥಳದಲ್ಲಿ, ವಿವಿಧ ಶೈಲಿಯಲ್ಲಿ ಈ ಹೋಳಿ ಆಚರಣೆ ನಡೆಯುತ್ತದೆ. ಗೋಕುಲದ ರಾಮನ್ರೆತಿಯಲ್ಲಿ 'ಹೂವಿನ ಹೋಳಿ' ಆಡಲಾಗುವುದು. ಬರ್ಸನದ ಬಳಿಕ ನಂದಾಗವ್ನಲ್ಲಿ 'ಲಾತ್ ಮಾರ್ ಹೋಳಿ' ಆಡಲಾಗುವುದು. ಇದಾದ ಬಳಿಕ ವೃಂದಾವನದಲ್ಲಿ 'ರಂಗ್ಭರಾನಿ' ಆಚರಿಸಲಾಗುವುದು. ಹೀಗೆ ಜಿಲ್ಲೆಯಲ್ಲಿ ವಿವಿಧ ರೀತಿಯ ರಂಗೋತ್ಸವ ಆಚರಣೆ ಮಾಡಲಾಗುವುದು ಎಂದು ಪುಲ್ಕೇಟ್ ಖೇರ್ ಜಿಲ್ಲಾ ಮ್ಯಾಜಿಸ್ಟ್ರೇಟರ್ ತಿಳಿಸಿದ್ದಾರೆ.
ಬಿಗಿ ಬಂದೋಬಸ್ತ್: ಇನ್ನು ಮಂಗಳವಾರ ಬರ್ಸಾನದಲ್ಲಿ ನಡೆಯುವ ಈ ಲಾತ್ ಮರ್ ಹೋಳಿ ವೀಕ್ಷಣೆಗೆ ಅಪಾರ ಪ್ರಮಾಣದ ಭಕ್ತರು ಆಗಮಿಸುತ್ತಾರೆ. ಈ ವೇಳೆ ಯಾವುದೇ ರೀತಿಯ ಅವಘಡ ನಡೆಯದಂತೆ ತಡೆಯಲು, ಆರು ಹೆಚ್ಚುವರಿ ಎಸ್ಪಿ, 12 ಸರ್ಕಲ್ ಅಧಿಕಾರಿ, 60 ಇನ್ಸ್ಪೆಕ್ಟರ್, 300 ಸಬ್ ಇನ್ಸ್ಪೆಕ್ಟರ್, 1,200 ಕಾನ್ಸಟೇಬಲ್, 40 ಮಹಿಳಾ ಸಬ್ ಇನ್ಸ್ಪೆಕ್ಟರ್, 130 ಮಹಿಳಾ ಕಾನ್ಸಟೇಬಲ್, 4 ಟ್ರಾಫಿಕ್ ಇನ್ಸ್ಪೆಕ್ಟರ್, 50 ಟ್ರಾಫಿಕ್ ಸಬ್ ಇನ್ಸ್ಪೆಕ್ಟರ್ಗಳ ನಿಯೋಜನೆ ಮಾಡಲಾಗಿದೆ.
ಮಹಿಳೆಯರ ಜೊತೆ ನಡೆಯುವ ಅಸಭ್ಯ ವರ್ತನೆ ತಡೆಯುವ ಉದ್ದೇಶದಿಂದ ಸಾಮಾನ್ಯ ಉಡುಪಿನಲ್ಲೂ ಗುಂಪಿನ ಬಳಿ ಕೂಡ ಪೊಲೀಸರನ್ನು ನಿಯೋಜಿಸಲಾಗಿದೆ. ಈ ಹಬ್ಬವನ್ನು ಆರು ವಲಯದಲ್ಲಿ 14 ಸೆಕ್ಟರ್ಗಳಲ್ಲಿ ಆಚರಿಸಲಾಗುವುದು. 40 ಕಡೆ ಪಾರ್ಕಿಂಗ್ ವ್ಯವಸ್ಥೆ ಮಾಡಲಾಗಿದೆ ಎಂದು ಎಸ್ಪಿ ಶೈಲೇಶ್ ಕುಮಾರ್ ಪಾಂಡೆ ತಿಳಿಸಿದ್ದಾರೆ.
ಇದನ್ನೂ ಓದಿ:ಗುಜರಾತ್ ಜೈಂಟ್ಸ್ ತಂಡದ ಜರ್ಸಿ ಅನಾವರಣ : ನಾಯಕಿಯ ಪಟ್ಟಕ್ಕಾಗಿ ಹುಡುಕಾಟ
