ಜ್ಞಾನವಾಪಿ ಕೇಸ್​ ಜಡ್ಜ್​ಗೆ ನಿಲ್ಲದ ಅನಾಮಧೇಯ ಕರೆಗಳು.. ತನಿಖೆಗಾಗಿ ಪೊಲೀಸ್​ ಆಯುಕ್ತರಿಗೆ ಪತ್ರ

ವಾರಣಾಸಿ ಜ್ಞಾನವಾಪಿ ಮಸೀದಿ ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಧೀಶರಿಗೆ ಅನಾಮಧೇಯ ಕರೆಗಳು ಹೆಚ್ಚುತ್ತಿದ್ದು, ಈ ಬಗ್ಗೆ ತನಿಖೆ ನಡೆಸಬೇಕು ಎಂದು ನ್ಯಾಯಾಧೀಶರು ಪೊಲೀಸ್ ಆಯುಕ್ತರಿಗೆ ಪತ್ರ ಬರೆದಿದ್ದಾರೆ.

ವಾರಣಾಸಿ(ಉತ್ತರ ಪ್ರದೇಶ):ಜ್ಞಾನವಾಪಿ-ಶೃಂಗಾರ್​ ಗೌರಿ ಪ್ರಕರಣದ ವಿಚಾರಣೆ ನಡೆಸಿದ್ದ, ಮಸೀದಿ ಸಮೀಕ್ಷೆಗೆ ಸೂಚಿಸಿದ್ದ ಸಿವಿಲ್​ ನ್ಯಾಯಾಧೀಶರಿಗೆ ಅಪರಿಚಿತ ಕರೆಗಳು ನಿಂತಿಲ್ಲ. ಈ ಬಗ್ಗೆ ತನಿಖೆ ನಡೆಯುತ್ತಿರುವ ಮಧ್ಯೆಯೇ ಇಂಟರ್​ನೆಟ್​ ಕಾಲ್​ ಮೂಲಕ ಮತ್ತೊಂದು ಬೆದರಿಕೆ ಹಾಕಲಾಗಿದೆ. ಈ ಬಗ್ಗೆ ತನಿಖೆ ನಡೆಸಲು ನ್ಯಾಯಾಧೀಶರು ಪೊಲೀಸ್ ಇಲಾಖೆಗೆ ಪತ್ರ ಬರೆದಿದ್ದಾರೆ.

ಹಿರಿಯ ಸಿವಿಲ್‌ ನ್ಯಾಯಾಧೀಶ ರವಿಕುಮಾರ್‌ ದಿವಾಕರ್‌ ಅವರು ಜ್ಞಾನವಾಪಿ ಮಸೀದಿ ಸಮೀಕ್ಷೆಗೆ ಆದೇಶಿಸಿದ್ದರು. ಆಗಿನಿಂದ ಅವರಿಗೆ ಬೆದರಿಕೆ ಕರೆಗಳು ಬರುತ್ತಿವೆ. ಮೇ 29 ರಂದು ಇಂಟರ್​ನೆಟ್​​ ಕಾಲ್​ ಮೂಲಕ ಬೆದರಿಕೆ ಹಾಕಲಾಗಿದೆ. ಈ ಬಗ್ಗೆ ತನಿಖೆ ನಡೆಸಬೇಕು ಎಂದು ಗೃಹ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಮತ್ತು ಡಿಜಿಪಿ, ವಾರಣಾಸಿ ಪೊಲೀಸ್ ಆಯುಕ್ತರಿಗೆ ಅವರು ಲಿಖಿತ ದೂರು ನೀಡಿದ್ದಾರೆ.

ಮೇ 29 ರಂದು ಕುಟುಂಬದೊಂದಿಗೆ ಲಖನೌದಿಂದ ವಾರಣಾಸಿಗೆ ಬರುತ್ತಿದ್ದಾಗ ತಮ್ಮ ವೈಯಕ್ತಿಕ ಮೊಬೈಲ್ ಸಂಖ್ಯೆಗೆ ಅಪರಿಚಿತ ವ್ಯಕ್ತಿಯಿಂದ ನಿರಂತರ ಕರೆ ಬರುತ್ತಿತ್ತು. ಬಳಿಕ ಕರೆಯನ್ನು ಸ್ವೀಕರಿಸಿದಾಗ ಒಂದು ಕೋಮಿನ ವ್ಯಕ್ತಿ ಮಾತನಾಡಿದ್ದರ ಬಗ್ಗೆ ನ್ಯಾಯಾಧೀಶರು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.

ಬೆದರಿಕೆ ಕರೆಗಳ ಬಗ್ಗೆ ಡಿಸಿಪಿ ವರುಣಾ ತನಿಖೆ ನಡೆಸುತ್ತಿದ್ದಾರೆ. ತಾಂತ್ರಿಕ ತಂಡದ ಸಹಾಯದಿಂದ ಕರೆಗಳ ಬಗ್ಗೆ ಮಾಹಿತಿ ಕಲೆ ಹಾಕಲಾಗುತ್ತಿದೆ ಎಂದು ವಾರಣಾಸಿ ಪೊಲೀಸ್ ಆಯುಕ್ತರು ತಿಳಿಸಿದ್ದಾರೆ.

ಓದಿ:107ರ ವಯೋವೃದ್ಧೆಗೆ ಹೃದಯಾಘಾತ: ಆಂಜಿಯೋಪ್ಲ್ಯಾಸ್ಟಿ ಶಸ್ತ್ರಚಿಕಿತ್ಸೆಯಿಂದ ಜೀವ ಉಳಿಸಿದ ವೈದ್ಯರು!