ಜುಲೈ 15, 16ರಿಂದ ಗುಜರಾತ್​, ಹರಿಯಾಣದಲ್ಲಿ ಶಾಲಾ-ಕಾಲೇಜು​ ಪುನಾರಂಭ

ಹರಿಯಾಣ ಹಾಗೂ ಗುಜರಾತ್​ ಸರ್ಕಾರ ಇದೀಗ ಅಲ್ಲಿನ ಶಾಲಾ-ಕಾಲೇಜ್​ ಪುನಾರಂಭ ಮಾಡಲು ನಿರ್ಧರಿಸಲಾಗಿದ್ದು, ವಿದ್ಯಾರ್ಥಿಗಳು ತರಗತಿಗಳಿಗೆ ಹಾಜರಾಗಬಹುದಾಗಿದೆ.

ಚಂಡೀಗಢ/ಅಹಮದಾಬಾದ್​: ದೇಶಾದ್ಯಂತ ಎರಡನೇ ಹಂತದ ಕೋವಿಡ್ ಅಲೆ ಕಡಿಮೆಯಾಗ್ತಿದ್ದು, ಇದರ ಬೆನ್ನಲ್ಲೇ ಎಲ್ಲವೂ ಸಹಜ ಸ್ಥಿತಿಯತ್ತ ಮರಳುತ್ತಿದೆ. ಇದೀಗ ಕೆಲವೊಂದು ರಾಜ್ಯಗಳಲ್ಲಿ ಶಾಲಾ-ಕಾಲೇಜು ಪುನಾರಂಭ ಮಾಡಲು ನಿರ್ಧರಿಸಲಾಗುತ್ತಿದ್ದು, ಅಲ್ಲಿನ ಶಿಕ್ಷಣ ಇಲಾಖೆ ಸಕಲ ರೀತಿಯ ತಯಾರಿ ಮಾಡಿಕೊಳ್ಳುತ್ತಿವೆ.

ಇದೀಗ ಹರಿಯಾಣ ಸರ್ಕಾರ ಆಫ್‌ಲೈನ್‌ ತರಗತಿ ಆರಂಭ ಮಾಡಲು ಮುಂದಾಗಿದ್ದು, 9 ಹಾಗೂ 10ನೇ ತರಗತಿ ಜುಲೈ 16ರಿಂದ 6 ರಿಂದ 8ನೇ ತರಗತಿ ಕ್ಲಾಸ್​ ಜುಲೈ 23ರಿಂದ ಆರಂಭ ಮಾಡಲು ಮುಂದಾಗಿದೆ. ಇದಕ್ಕೆ ಸಂಬಂಧಿಸಿದಂತೆ ಎಲ್ಲ ಜಿಲ್ಲೆಯ ಜಿಲ್ಲಾಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ. 1ರಿಂದ 5ನೇ ತರಗತಿ ಆರಂಭ ಮಾಡುವ ಬಗ್ಗೆ ಶೀಘ್ರದಲ್ಲೇ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ತಿಳಿಸಲಾಗಿದೆ.

ಗುಜರಾತ್​ನಲ್ಲೂ ಕಾಲೇಜ್​ ಆರಂಭ

ಗುಜರಾತ್​ನಲ್ಲೂ ಕೋವಿಡ್​ ಸೋಂಕಿತ ಪ್ರಕರಣ ಕಡಿಮೆಯಾಗಿದ್ದು, ಇದೀಗ ಜುಲೈ 15ರಿಂದ 12ನೇ ತರಗತಿ ಕಾಲೇಜ್​ ಪುನಾರಂಭ ಮಾಡಲು ನಿರ್ಧರಿಸಲಾಗಿದೆ. ಶೇ. 50ರಷ್ಟು ವಿದ್ಯಾರ್ಥಿಗಳೊಂದಿಗೆ ತರಗತಿ ಆರಂಭಿಸಬಹುದಾಗಿದೆ. ಆದರೆ ಆನ್​ಲೈನ್ ಮೂಲಕ ತರಗತಿಗಳಿಗೆ ಹಾಜರಾಗಲು ಕೂಡ ಅವಕಾಶ ನೀಡಲಾಗಿದೆ. ಕಾಲೇಜ್​ಗೆ ಬರುವಾಗ ಸಾಮಾಜಿಕ ಅಂತರ, ಸ್ಯಾನಿಟೈಸ್ ಕಡ್ಡಾಯಗೊಳಿಸಲಾಗಿದೆ. ಇನ್ನು ಆಂಧ್ರದಲ್ಲೂ ಆಗಸ್ಟ್​ ತಿಂಗಳಲ್ಲಿ ಶಾಲಾ-ಕಾಲೇಜು ಪುನಾರಂಭ ಮಾಡಲು ಅಲ್ಲಿನ ಸರ್ಕಾರ ನಿರ್ಧಾರ ಕೈಗೊಂಡಿದೆ.