ಬೆಳಗಾದ್ರೆ ಮದುವೆ... ಅಷ್ಟರಲ್ಲೇ ವರ ನೇಣಿಗೆ ಶರಣು!

ಮನೆಯಲ್ಲಿ ಮದುವೆ ತಯಾರಿ ಭರ್ಜರಿಯಿಂದ ನಡೆದಿತ್ತು. ಇನ್ನೇನು ಮದುವೆ ಬೆಳಗ್ಗೆ ಇದೆ ಎಂದು ಸಂತೋಷದಿಂದ ಇದ್ದ ಕುಟುಂಬದಲ್ಲಿ ಮೌನ ಆವರಿಸಿತು. ಈ ಘಟನೆ ತೆಲಂಗಾಣದ ರಂಗಾರೆಡ್ಡಿ ಜಿಲ್ಲೆಯಲ್ಲಿ ನಡೆದಿದೆ.

ರಂಗಾರೆಡ್ಡಿ: ಬೆಳಗ್ಗೆ ಮದುವೆ ಇಟ್ಕೊಂಡು ರಾತ್ರೋರಾತ್ರಿ ವರ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ತಲಕೊಂಡಪಲ್ಲಿ ತಾಲೂಕಿನಲ್ಲಿ ನಡೆದಿದೆ.

ಮೆದಕ್​ಪಲ್ಲಿ ನಿವಾಸಿ ಯಾದಮ್ಮ ಮತ್ತು ಲಿಂಗಯ್ಯನ ಮಗ ಶ್ರೀಕಾಂತ್​ ಗೌಡ (25) ಕಂದಕೂರು ತಾಲೂಕಿನ ಗ್ರಾಮವೊಂದರ ಯುವತಿಯೊಂದಿಗೆ ಜೂನ್​ 4 ಅಂದ್ರೆ ಇಂದು ಮದುವೆ ನಿಶ್ಚಯವಾಗಿತ್ತು. ಹೊಸದಾಗಿ ನಿರ್ಮಿಸಿದ ಮನೆಯಲ್ಲಿ ಮದುವೆ ಸಂಭ್ರಮ ಜೋರಾಗಿತ್ತು. ಗುರುವಾರ ಬೆಳಗ್ಗೆ ಹೊಸ ಮನೆಯ ಮುಂದೆ ಕುಟುಂಬಸ್ಥರು ಚಪ್ಪರ ಹಾಕುತ್ತಿದ್ದರು. ಹಳೆಯ ಮನೆಯಲ್ಲಿ ವರ ಶ್ರೀಕಾಂತ್​ ವಿಶ್ರಾಂತಿ ಪಡೆಯುತ್ತಿದ್ದು, ಶ್ರೀಕಾಂತ್​ ಬಳಿ ಸಹೋದರ ರಾಜು ​ತೆರಳಿದ್ದಾನೆ. ಸ್ವಲ್ಪ ಸಮಯದ ನಂತರ ರಾಜು ಕೆಲಸದ ನಿಮಿತ್ತ ಬೈಕ್​ ಮೇಲೆ ತೆರಳಿದ್ದಾನೆ. ರಾಜು ಮತ್ತೆ ವಾಪಸಾಗುವಷ್ಟರಲ್ಲಿ ಶ್ರೀಕಾಂತ್​ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾನೆ. ಇದನ್ನು ನೋಡಿದ ಕುಟುಂಬಸ್ಥರು ದಿಗ್ಭ್ರಾಂತರಾಗಿದ್ದಾರೆ. ಮಗನನ್ನು ಕಳೆದುಕೊಂಡ ಕುಟುಂಬದ ಆಕ್ರಂದನ ಮುಗಿಲು ಮುಟ್ಟಿತ್ತು.

ವರ ಶ್ರೀಕಾಂತ್​ ಆತ್ಮಹತ್ಯೆಗೆ ಕಾರಣ ನಿಗೂಢವಾಗಿದ್ದು, ಮೃತನ ತಾಯಿ ಪೊಲೀಸ್​ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಈ ಘಟನೆ ಕುರಿತು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.