ಶೌಚಾಲಯದಲ್ಲಿ ಸಿಕ್ಕ ಚಿನ್ನವನ್ನ ಅಧಿಕಾರಿಗಳಿಗೆ ಹಸ್ತಾಂತರಿಸಿದ ಕೆಲಸಗಾರ

ವಿಮಾನ ನಿಲ್ದಾಣದ ಶೌಚಾಲಯದಲ್ಲಿ 800 ಗ್ರಾಂ ಚಿನ್ನ ಪತ್ತೆ - ಸಿಕ್ಕ ಚಿನ್ನವನ್ನು ಕಸ್ಟಮ್​ ಅಧಿಕಾರಿಗಳಿಗೆ ಹಸ್ತಾಂತರಿಸಿದ ನಿಲ್ದಾಣದ ಸಿಬ್ಬಂದಿ - ಕೆಲಸಗಾರನ ಪ್ರಾಮಾಣಿಕತೆಗೆ ಅಧಿಕಾರಿಗಳಿಂದ ಶ್ಲಾಘನೆ

ಅಹಮದಾಬಾದ್(ಗುಜರಾತ್): ಅಹಮದಾಬಾದ್​ನ ಸರ್ದಾರ್​ ವಲ್ಲಾಭಾಯಿ ಪಟೇಲ್​ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಹೌಸ್​ ಕೀಪಿಂಗ್ ಕೆಲಸಗಾರರೊಬ್ಬರಿಗೆ ಶೌಚಾಲಯದಲ್ಲಿ ಸುಮಾರು 45 ಲಕ್ಷ ರೂಪಾಯಿ ಮೌಲ್ಯದ ಚಿನ್ನ ಸಿಕ್ಕಿದ್ದು, ಅದನ್ನು ಕಸ್ಟಮ್​ ಅಧಿಕಾರಿಗೆ ಹಸ್ತಾಂತರಿಸಿ ಪ್ರಾಮಾಣಿಕತೆ ಮೆರೆದಿದ್ದಾರೆ.

ವಿಮಾನ ನಿಲ್ದಾಣದಲ್ಲಿ ಹೌಸ್​ ಕೀಪಿಂಗ್ ಮೇಲ್ವಿಚಾರಕರಾಗಿ ಕಾರ್ಯನಿರ್ವಹಿಸುತ್ತಿರುವ ಹರ್ವಿಂದರ್​ ನರುಕಾ ಅವರು ಟರ್ಮಿನಲ್​ 2ನಲ್ಲಿ ಸಿಬ್ಬಂದಿಗಳು ಶೌಚಾಲಯವನ್ನು ಸರಿಯಾಗಿ ಸ್ವಚ್ಛಗೊಳಿಸಿದ್ದಾರೆಯೇ ಎಂದು ಪರಿಶೀಲಿಸುತ್ತಿದ್ದರು. ಇದೇ ವೇಳೆ, ಶೌಚಾಲಯದ ಫ್ಲಶ್​ ಟ್ಯಾಂಕ್​ ತೆರೆದಿರುವುದನ್ನು ಗಮನಿಸಿದರು. ಹೋಗಿ ಪರಿಶೀಲಿಸಿದಾಗ ತಲಾ 400 ಗ್ರಾಂ ತೂಕದ ಚಿನ್ನದ ಬಳೆಗಳಿರುವ ಎರಡು ಪ್ಲಾಸ್ಟಿಕ್​ ಚೀಲಗಳು ಪತ್ತೆಯಾಗಿವೆ.

ನಾನು ಶೌಚಾಲಯಗಳನ್ನು ಪರೀಶಿಲಿಸುವ ಮೊದಲು ನಿಲ್ದಾಣಕ್ಕೆ ಅಬುಧಾಬಿಯಿಂದ ವಿಮಾನ ಬಂದಿದೆ. ಆ ವಿಮಾನದಲ್ಲಿ ಬಂದಿರುವ ಪ್ರಯಾಣಿಕರೊಬ್ಬರು ಶೌಚಾಲಯದಲ್ಲಿ ಚಿನ್ನವನ್ನು ಬಿಟ್ಟು ಹೊಗಿದ್ದಾರೆ ಎಂದು ಶಂಕಿಸಲಾಗಿದೆ.

ಆದರೆ, ಈ ಚಿನ್ನವನ್ನು ತಂದವರು ಯಾರು, ಶೌಚಾಲಯದಲ್ಲಿ ಬಿಟ್ಟು ಹೋದವರು ಯಾರು ಎಂಬುದರ ಬಗ್ಗೆ ಯಾವುದೇ ಮಾಹಿತಿ ಬಹಿರಂಗವಾಗಿಲ್ಲ ಎಂದು ಎಂದು ಹರ್ವಿಂದರ್​ ನರುಕಾ ಹೇಳಿದರು. ಹರ್ವಿಂದರ್​ ಅವರ ಪ್ರಾಮಣಿಕತೆ ಶ್ಲಾಘಿಸಿದ ವಿಮಾನ ನಿಲ್ದಾಣ ನಿರ್ವಹಣಾ ಪ್ರಾಧಿಕಾರವು ಅವರಿಗೆ ಗೌರವ ಪ್ರಮಾಣ ಪತ್ರವನ್ನು ನೀಡಿ ಗೌರವಿಸಿದೆ.

ಇದನ್ನೂ ಓದಿ:ಸುಲ್ತಾನಪುರಿ ಪೊಲೀಸ್ ಠಾಣೆಯ ಹೊರಗೆ ಜನರ ಪ್ರತಿಭಟನೆ: ವಿಡಿಯೋ