ಗೋವಾ ಸಿಎಂ ಪ್ರಮೋದ್ ಸಾವಂತ್, ಕಾಂಗ್ರೆಸ್​ನ ದಿಗಂಬರ್ ಕಾಮತ್​ಗೆ ಗೆಲುವು: ಇಬ್ಬರು ಡಿಸಿಎಂಗಳಿಗೆ ಸೋಲು!

ಗೋವಾ ವಿಧಾನಸಭಾ ಚುನಾವಣೆಯಲ್ಲಿ ಈಗ ಕೆಲವು ಕ್ಷೇತ್ರಗಳ ಫಲಿತಾಂಶ ಹೊರಬಿದ್ದಿದೆ. ಪರ್ಯಾನ್ ಕ್ಷೇತ್ರದಿಂದ ಬಿಜೆಪಿಯ ದಿವ್ಯಾ ರಾಣೆ ಗೆಲುವು ಸಾಧಿಸಿದ್ದು, ಮಾಜಿ ಡಿಸಿಎಂಗಳು ಸೋಲು ಅನುಭವಿಸಿದ್ದಾರೆ.

ಪಣಜಿ, ಗೋವಾ: ವಿಧಾನಸಭಾ ಚುನಾವಣೆ ಮತ ಎಣಿಕೆ ಗೋವಾದಲ್ಲಿ ನಡೆಯುತ್ತಿದ್ದು, ಈಗಾಗಲೇ ಕೆಲವು ಕ್ಷೇತ್ರಗಳ ಫಲಿತಾಂಶ ಪ್ರಕಟವಾಗಿದೆ. ಗೋವಾ ಸಿಎಂ ಪ್ರಮೋದ್ ಸಾವಂತ್ ಮತ್ತು ತಿವಿಮ್​ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ನೀಲಕಂಠ ಹಳರನಾಕರ್ ಜಯಗಳಿಸಿದ್ದಾರೆ.

ಪರ್ಯಾನ್ ಕ್ಷೇತ್ರದಿಂದ ಬಿಜೆಪಿಯ ದಿವ್ಯಾ ರಾಣೆ, ಮಡಗಾಂವ್ ಕ್ಷೇತ್ರದಿಂದ ಕಾಂಗ್ರೆಸ್​ನ ದಿಗಂಬರ್ ಕಾಮತ್ ಗೆಲುವು ಸಾಧಿಸಿದ್ದಾರೆ. ಕಾಂಗ್ರೆಸ್ ನಾಯಕ ಹಾಗೂ ಮಾಜಿ ಮುಖ್ಯಮಂತ್ರಿ ಪ್ರತಾಪ್ ಸಿಂಗ್ ರಾಣೆ ಅವರ ಅಳಿಯನಾದ ಬಿಜೆಪಿ ಅಭ್ಯರ್ಥಿ ಡಾ.ದಿವ್ಯ ರಾಣೆ ಅವರು ವಾಲ್ಪೈ ಕ್ಷೇತ್ರದಿಂದ ಸ್ಪರ್ಧಿಸಿದ್ದರು.

ಈಗ ಗೆಲುವಿನ ಸಂತಸಲ್ಲಿರುವ ಅವರು ಪ್ರತಾಪ್ ಸಿಂಗ್ ರಾಣೆ ಕಾರಣ ಎಂದು ಹೇಳಿದ್ದಾರೆ. ಸವರ್ಡೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಗಣೇಶ್ ಗಾಂವ್ಕರ್ ಹೆಚ್ಚಿನ ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದು, ಸ್ವತಂತ್ರ ಅಭ್ಯರ್ಥಿ ದೀಪಕ್ ಪಾವಸ್ಕರ್ ಅವರು ಸೋತಿದ್ದಾರೆ.

ಮಾಜಿ ಡಿಸಿಎಂಗಳಿಗೆ ಸೋಲು:ಈ ಬಾರಿಯ ಗೋವಾ ವಿಧಾನಸಭಾ ಚುನಾವಣೆಯಲ್ಲಿ ಉಪ ಮುಖ್ಯಮಂತ್ರಿಗಳಾದ ಚಂದ್ರಕಾಂತ್ ಕಾವ್ಲೇಕರ್ ಮತ್ತು ಮನೋಹರ್ ಅಜಗಾಂವ್ಕರ್ ಅವರು ಸೋಲು ಕಂಡಿದ್ದಾರೆ.