ಸ್ಲೀಪರ್ ಬಸ್​​ನಲ್ಲಿ 15ರ ಬಾಲೆಯ ಮೇಲೆ ಅತ್ಯಾಚಾರ; ಬಸ್ ನಿರ್ವಾಹಕನ ಸಹಾಯಕನಿಂದ ದುಷ್ಕೃತ್ಯ

ಪೋಷಕರೊಂದಿಗೆ ಸ್ಲೀಪರ್​ ಬಸ್​​ನಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ ಬಾಲಕಿ ಮೇಲೆ ಅತ್ಯಾಚಾರವೆಸಗಿರುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಫಿರೋಜಾಬಾದ್​(ಉತ್ತರ ಪ್ರದೇಶ): ಹದಿನೈದು ವರ್ಷದ ಬಾಲಕಿಯ ಮೇಲೆ ಬಸ್‌ನಲ್ಲೇ ಅತ್ಯಾಚಾರವೆಸಗಿರುವ ಪ್ರಕರಣ ಉತ್ತರ ಪ್ರದೇಶದ ಫಿರೋಜಾಬಾದ್​​ನಲ್ಲಿ ಬೆಳಕಿಗೆ ಬಂದಿದೆ.

ಬಾಲಕಿ ತನ್ನ ಕುಟುಂಬದೊಂದಿಗೆ ಔರಿಯಾ ಪ್ರದೇಶಕ್ಕೆ ಪ್ರಯಾಣ ಬೆಳೆಸುತ್ತಿದ್ದಳು. ಸೋಮವಾರ ರಾತ್ರಿ 11 ಗಂಟೆಗೆ ಇವರು ಬದರ್‌ಪುರನಲ್ಲಿ ಬಸ್​ ಹತ್ತಿದ್ದಾರೆ. ಈ ವೇಳೆ ಪೋಷಕರು ಬಸ್​ ಕೆಳಗಡೆಯ ಸೀಟ್​ನಲ್ಲಿ(lower berth) ಕುಳಿತುಕೊಂಡಿದ್ದು, ಬಾಲಕಿ ಮೇಲಿನ ಸೀಟ್​​(upper berth)ನಲ್ಲಿ ಕುಳಿತುಕೊಂಡಿದ್ದಳು.

ಚಾಲಕ ತಡರಾತ್ರಿ ಬಸ್​​ ನಿಲ್ಲಿಸಿದ್ದಾನೆ. ಈ ವೇಳೆ ಬಸ್​ ನಿರ್ವಾಹಕನಿಗೆ ಸಹಾಯಕನಾಗಿ ಕೆಲಸ ಮಾಡುತ್ತಿದ್ದ ಅಶು ಎಂಬ ಕಾಮುಕ ಬಾಲಕಿ ಮೇಲೆ ಅತ್ಯಾಚಾರವೆಸಗಿದ್ದಾನೆ ಎಂದು ಸಂತ್ರಸ್ತೆಯ ತಾಯಿ ಪೊಲೀಸರಿಗೆ ದೂರು ನೀಡಿದ್ದಾರೆ. ಶಿಕೊಹಾಬಾದ್​ ಪೊಲೀಸ್ ಠಾಣೆಯಲ್ಲಿ ಇಬ್ಬರ ವಿರುದ್ಧ ಪ್ರಕರಣ ದಾಖಲಾಗಿದೆ. ಪ್ರಮುಖ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ತಿಳಿದು ಬಂದಿದೆ.