ಪ್ರಿಯಕರನ ಭೇಟಿಗಾಗಿ ಪ್ರತಿ ರಾತ್ರಿ ಊರಿನ ವಿದ್ಯುತ್​ ಸಂಪರ್ಕ ಕಡಿತಗೊಳಿಸುತ್ತಿದ್ದ ಯುವತಿ!

ಬಿಹಾರದಲ್ಲಿ ಯುವತಿಯೊಬ್ಬಳು ತನ್ನ ಪ್ರಿಯಕರನ ಭೇಟಿಗಾಗಿ ರಾತ್ರಿ ವೇಳೆ ಊರಿನ ವಿದ್ಯುತ್​ ಸಂಪರ್ಕವನ್ನು ಕಡಿತ ಮಾಡುತ್ತಿದ್ದಳಂತೆ. ಇದು ಊರಿನ ನಿವಾಸಿಗಳನ್ನು ಕತ್ತಲೆಗೆ ತಳ್ಳುತ್ತಿತ್ತು. ಇದೀಗ ಸಮಸ್ಯೆಗೆ ಪರಿಹಾರ ಸಿಕ್ಕಿದೆ.

ಬೆಟ್ಟಿಯಾ (ಬಿಹಾರ):ದರೋಡೆಕೋರರು ಮನೆಗಳಿಗೆ ಕನ್ನ ಹಾಕಲು ರಾತ್ರಿ ವೇಳೆ ವಿದ್ಯುತ್​ ಸಂಪರ್ಕ ಕಡಿತ ಮಾಡಿ ದೋಚುವುದುಂಟು. ಬರಗಾಲ ಬಿದ್ದರೆ, ಉತ್ಪಾದನೆ ಕೊರತೆಯಿಂದ ವಿದ್ಯುತ್​ ಸರಬರಾಜು ಕಂಪನಿಗಳು​ ಲೋಡ್​ ಶೆಡ್ಡಿಂಗ್​ ಮಾಡುವುದನ್ನೂ ನೋಡಿದ್ದೇವೆ. ಆದರೆ, ಇಲ್ಲೊಬ್ಬ ಪ್ರಿಯತಮೆ ತನ್ನ ಪ್ರಿಯಕರನನ್ನು ಸೇರಲು ದಿನವೂ ರಾತ್ರಿ ಊರಿನ ವಿದ್ಯುತ್​ ಪೂರೈಕೆಯನ್ನು ನಿಲ್ಲಿಸುತ್ತಿದ್ದ ವಿಲಕ್ಷಣ ಘಟನೆ ಬೆಳಕಿಗೆ ಬಂದಿದೆ. ಇದನ್ನು ಪತ್ತೆ ಮಾಡಿದ ಗ್ರಾಮಸ್ಥರು ಪ್ರೇಮಿಗಳಿಗೆ ಗೂಸಾ ನೀಡಿದ್ದಾರೆ.

ಬಿಹಾರದ ಗ್ರಾಮವೊಂದರಲ್ಲಿ ಈ ಘಟನೆ ನಡೆದಿದೆ. ಪ್ರತಿ ದಿನ ರಾತ್ರಿಯಾದರೆ ಸಾಕು ಆ ಊರಿಗೆ ಕರೆಂಟ್​ ಹೋಗುತ್ತಿತ್ತು. ಇದು ವಿದ್ಯುತ್ ಸರಬರಾಜು ಕಂಪನಿಯ ಕೃತ್ಯ ಎಂದು ಭಾವಿಸಿದ್ದ ಜನರು ಅಧಿಕಾರಿಗಳ ವಿರುದ್ಧ ಶಾಪ ಹಾಕುತ್ತಿದ್ದರು. ಆದರೆ, ಈ ಮಸಲತ್ತಿನ ಹಿಂದಿನ ಸೂತ್ರಧಾರಿ ಯುವತಿ ಎಂಬುದು ಯಾರ ಗಮನಕ್ಕೂ ಬಂದಿರಲಿಲ್ಲ. ಪ್ರಿಯತಮೆ ತನ್ನವನಿಗಾಗಿ ಇಂತಹ ವಿಚಿತ್ರ ಪರಿಹಾರ ಕಂಡುಕೊಂಡಿದ್ದು ಗ್ರಾಮಸ್ಥರಿಗೆ ಅಚ್ಚರಿಯ ಜೊತೆಗೆ ಕೋಪ ನೆತ್ತಿಗೇರಿಸಿದೆ.

ಘಟನೆಯ ಹಿನ್ನೆಲೆ:ಗ್ರಾಮದ ಯುವಕ- ಯುವತಿ ಪ್ರೇಮಿಗಳಾಗಿದ್ದರು. ಆಕೆಗೆ ತನ್ನವನನ್ನು ಭೇಟಿ ಮಾಡುವ ಹಪಹಪಿ. ಇದಕ್ಕಾಗಿ ಯುವತಿ ಉಪಾಯ ಮಾಡಿ ರಾತ್ರಿ ಎಲ್ಲರೂ ಮಲಗಿದಾಗ ಒಬ್ಬಳೇ ಬಂದು ಊರಲ್ಲಿದ್ದ ವಿದ್ಯುತ್​ಪರಿವರ್ತಕದ ತಂತಿಗಳನ್ನು ತಪ್ಪಿಸಿ ಸಂಪರ್ಕ ಕಡಿತ ಮಾಡುತ್ತಿದ್ದಳು. ಪೂರ್ತಿ ಕತ್ತಲು ಆವರಿಸಿದ ಬಳಿಕ ಆಕೆ ತನ್ನವನ ಜೊತೆ ಸಮಯ ಕಳೆಯುತ್ತಿದ್ದಳಂತೆ.

ರಾತ್ರಿಯಾದರೆ ಸಾಕು ದಿನವೂ ಕರೆಂಟ್​ ಕಟ್​ ಆಗುತ್ತಿದ್ದರಿಂದ ಗ್ರಾಮಸ್ಥರು ಕುಪಿತಗೊಂಡಿದ್ದರು. ಇದ್ಯಾಕೋ ಅತಿಯಾಯ್ತು ಅನ್ನಿಸಿತ್ತು. ಇದು ಅಧಿಕಾರಿಗಳ ಕೈವಾಡವಲ್ಲ ಎಂಬುದು ಅವರಿಗೆ ಗೊತ್ತೇ ಆಗಿರಲಿಲ್ಲ. ರಾತ್ರಿಯಾದರೆ ವಿದ್ಯುತ್​ ಕಡಿತವಾಗೋದು ಯಾಕೆ ಅನ್ನೋದಕ್ಕೆ ಉತ್ತರ ಹುಡುಕಲಾರಂಭಿಸಿದ್ದರು. ಆಗ ಕಿಲಾಡಿ ಯುವತಿಯ ಕೈವಾಡ ಬಯಲಾಗಿದೆ. ವಿದ್ಯುತ್​ ಪರಿವರ್ತಕದ ತಂತಿಗಳನ್ನು ತಪ್ಪಿಸುತ್ತಿದ್ದಾಗ​ ಗ್ರಾಮಸ್ಥರು ಯುವತಿಯನ್ನು ರೆಡ್​ಹ್ಯಾಂಡ್ ಆಗಿ ಹಿಡಿದಿದ್ದಾರೆ.

ಇದೆಲ್ಲವೂ ಅವನಿಗಾಗಿ..!ಇವರಿಬ್ಬರಿಂದಾಗಿ ಇಡೀ ಗ್ರಾಮ ದಿನವೂ ವಿದ್ಯುತ್ ಕಡಿತದ ಸಮಸ್ಯೆಗೆ ಒಳಗಾಗುತ್ತಿದ್ದರಿಂದ ಕೋಪಗೊಂಡಿದ್ದ ಗ್ರಾಮಸ್ಥರು ಆಕೆಯ ಜೊತೆಗೆ ಪ್ರಿಯಕರನನ್ನೂ ಹಿಡಿದು ಥಳಿಸಿದ್ದಾರೆ. ಇಷ್ಟಲ್ಲದೇ, ದಿನನಿತ್ಯದ ಕತ್ತಲೆಯಿಂದಾಗಿ ಗ್ರಾಮದಲ್ಲಿ ಕಳ್ಳತನಗಳು ನಡೆದಿವೆ. 2 ಬೈಕ್‌, ಹಲವು ಮೇಕೆಗಳು ಹಾಗೂ ಮೋಟಾರ್​ವೊಂದುಯ ಕದಿಯಲಾಗಿದೆ. ಗ್ರಾಮಸ್ಥರು ಇಬ್ಬರನ್ನು ಥಳಿಸುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿದೆ.

ಗ್ರಾಮಸ್ಥರ ದಾಳಿಗೆ ಹೆದರದ ಯುವತಿ ಜನರೊಂದಿಗೇ ವಾಗ್ವಾದ ನಡೆಸಿದ್ದಾಳೆ. ಅಲ್ಲದೇ, ಹಲ್ಲೆ ಮಾಡಿದ್ದರ ಮೇಳೆ ದೂರು ನೀಡುವುದಾಗಿ ಬೆದರಿಕೆ ಹಾಕಿದ್ದಾಳೆ. ತನ್ನ ಪ್ರೇಮಿಯನ್ನೂ ಬಲವಾಗಿ ಸಮರ್ಥಿಸಿಕೊಂಡು, ಗ್ರಾಮಸ್ಥರಿಂದ ಆತನನ್ನು ರಕ್ಷಿಸುತ್ತಿದ್ದಾಳೆ. ಕೊನೆಗೆ ಈ ಪ್ರಕರಣ ಪೊಲೀಸ್ ಠಾಣೆ ಮೆಟ್ಟಿಲೇರಿದೆ. ವಿಚಾರಣೆ ನಡೆಸಿದ ಪೊಲೀಸರು, ಉಭಯ ಕುಟುಂಬಗಳ ಅಭಿಪ್ರಾಯ ಸಂಗ್ರಹಿಸಿದ್ದಾರೆ. ಬಳಿಕ ಯುವತಿ ಮತ್ತು ಆಕೆಯ ಗೆಳೆಯನ ಮದುವೆ ಒಪ್ಪಿಗೆ ಸೂಚಿಸಿದ್ದಾರೆ. ಇಬ್ಬರ ಪ್ರೇಮಸಂಬಂಧದಿಂದ ವಿದ್ಯುತ್​ ಸಮಸ್ಯೆ ಎದುರಿಸುತ್ತಿದ್ದ ಗ್ರಾಮಸ್ಥರಿಗೂ ಇದರಿಂದ ಮುಕ್ತಿ ಸಿಕ್ಕು, ಪ್ರಕರಣ ಸುಖಾಂತ್ಯ ಕಂಡಿದೆ.

ಇದನ್ನೂ ಓದಿ:ದಾವಣಗೆರೆ: ವಿದ್ಯಾರ್ಥಿನಿಯರನ್ನು ಹಿಂಬಾಲಿಸಿ ಲೈಂಗಿಕ ಕಿರುಕುಳ ನೀಡುತ್ತಿದ್ದ ಕಿಡಿಗೇಡಿ ಯುವಕ ಸೆರೆ