ಸಮಾಜದ ಗಣ್ಯರಿಗೆ ಜೀವ ಬೆದರಿಕೆಯೊಡ್ಡಿದ ಆರೋಪ.. ಐವರ ಗ್ಯಾಂಗ್ ಅಂದರ್

ಸಮಾಜದ ಗಣ್ಯರಿಗೆ ಜೀವ ಬೆದರಿಕೆಯೊಡ್ಡಿದ ಆರೋಪದಡಿ ಶ್ರೀನಗರ ಪೊಲೀಸರು ಐವರನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಿದ್ದಾರೆ.

ಶ್ರೀನಗರ: ಸಾಮಾಜಿಕ ಕಾರ್ಯಕರ್ತರು, ರಾಜಕೀಯ ಮುಖಂಡರು, ಸರ್ಕಾರಿ ಅಧಿಕಾರಿಗಳು ಮತ್ತು ಪತ್ರಕರ್ತರಿಗೆ ಜೀವ ಬೆದರಿಕೆ ಹಾಕುತ್ತಿದ್ದ ಆರೋಪದಡಿ ಐವರನ್ನು ಬಂಧಿಸಲಾಗಿದೆ ಎಂದು ಕಾಶ್ಮೀರ ಐಜಿಪಿ ವಿಜಯ್ ಕುಮಾರ್ ಹೇಳಿದ್ದಾರೆ. ಈ ಗ್ಯಾಂಗ್​​ Kashmirfight.wordpress.com ಟ್ಯಾಗ್​ಲೈನ್​ನಡಿ ಬೆದರಿಕೆಯೊಡ್ಡುತ್ತಿದ್ದರು ಎನ್ನಲಾಗಿದೆ.

ಬಂಧಿತರನ್ನು ಸನತ್​ ನಗರದ ನಜೀಶ್ ಯಸ್ರಾಬ್ ರೆಹಮಾನಿ, ತಬೀಶ್ ಅಕ್ಬರ್ ರೆಹಮಾನಿ, ರಾಜ್ ಬಾಗ್​​ನ ಸೋಫಿ ಮುಹಮ್ಮದ್ ಅಕ್ಬರ್, ಹಜರತ್ಬಾಲ್ ಮೂಲದ ಪೀರ್ಜಾಡಾ ರಕೀಫ್ ಮಖ್ದೂಮಿ ಮತ್ತು ಪೂಂಚ್ ಪ್ರದೇಶದ ಜಾವೇದ್ ಖಾಲಿದ್ ಎಂದು ಗುರುತಿಸಲಾಗಿದೆ.

ಬಂಧಿತರಿಂದ ಸೆಲ್​ ಫೋನ್​ಗಳು, ಕಂಪ್ಯೂಟರ್​​, ಮೊಬೈಲ್​, ಒಂದು ಟ್ಯಾಬ್ಲೆಟ್​, ಎರಡು ಲ್ಯಾಪ್​ಟಾಪ್, ನಾಲ್ಕು ಹಾರ್ಡ್​ ಡಿಸ್ಕ್​ಗಳು, ಏಳು ಮೆಮೊರಿ ಕಾರ್ಡ್​ ಹಾಗೂ ಒಂದು ಡಾಂಗಲ್​ಅನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಮಾಹಿತಿ ನೀಡಿದರು.

ಪತ್ರಕರ್ತ ಶುಜತ್​ ಬುಖಾರಿ, ವಕೀಲ ಬಾಬರ್ ಖಾದ್ರಿ, ಉದ್ಯಮಿ ಸತ್​ಪಾಲ್​ ನಿಶ್ಚಲ್ ಹತ್ಯೆಯ​ ಹಿಂದೆ ಈ ಆರೋಪಿಗಳ ಕೈವಾಡವಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.