ಮರಳಲ್ಲರಳಿದ ಆಕರ್ಷಕ ಜಿ 20 ಲೋಗೋ: ಸುದರ್ಶನ್ ಪಟ್ನಾಯಕ್‌ ಕಲೆ

ಒಡಿಶಾದ ಕೊನಾರ್ಕ್​ ಕಡಲ ತೀರದಲ್ಲಿ ನಡೆಯುತ್ತಿರುವ ಅಂತಾರಾಷ್ಟ್ರೀಯ ಮರಳು ಉತ್ಸವದಲ್ಲಿ ಖ್ಯಾತ ಮರಳು ಕಲಾವಿದ ಸುದರ್ಶನ್ ಪಟ್ನಾಯಕ್‌ ಅವರ ಜಿ20 ಲೋಗೋ ಅನಾವರಣಗೊಂಡಿದೆ.

ಪುರಿ:ಭಾರತದ ಅಧ್ಯಕ್ಷತೆಯಲ್ಲಿ ನಡೆಯಲಿರುವ ಜಿ 20 ಶೃಂಗಸಭೆಯ ಥೀಮ್​ ಲೋಗೋವನ್ನು ಪ್ರಖ್ಯಾತ ಕಲಾವಿದ ಸುದರ್ಶನ್​ ಪಟ್ನಾಯಕ್​ ಮರಳಿನಲ್ಲಿ ಆಕರ್ಷಕವಾಗಿ ಮೂಡಿಸಿದ್ದಾರೆ. ಕೊನಾರ್ಕ್​ನಲ್ಲಿ ನಡೆಯುತ್ತಿರುವ ಅಂತಾರಾಷ್ಟ್ರೀಯ ಮರಳು ಉತ್ಸವದಲ್ಲಿ ಅವರ ಕಲೆ ಅನಾವರಣಗೊಂಡಿದೆ. ಎರಡು ದಿನಗಳ ಕಾಲ ಶ್ರಮಿಸಿ ವಿದ್ಯಾರ್ಥಿಗಳೊಂದಿಗೆ ಜಿ 20 ಲೋಗೋ ಮೂಡಿಸಿದ್ದಾರೆ.

ಈ ಕುರಿತು ಮಾತನಾಡಿರುವ ಪಟ್ನಾಯಕ್,​ 'ವಸುಧೈವ ಕುಟುಂಬಕಂ ಎಂಬ ಸಂದೇಶ ಸಾವಿರಾರು ವರ್ಷಗಳ ನಮ್ಮ ಪ್ರಾಚೀನ ಜ್ಞಾನ ಮತ್ತು ಮೌಲ್ಯಗಳನ್ನು ಪ್ರತಿನಿಧಿಸುತ್ತದೆ. ಭಾರತೀಯರಿಗೆಲ್ಲ ತಿಳಿದಿರುವ, ಪ್ರಾಚೀನ ಜ್ಞಾನವನ್ನು ಜಿ 20 ಶೃಂಗಸಭೆಯ ಮೂಲಕ ಪ್ರಪಂಚಕ್ಕೆ ಪರಿಚಯಿಸುತ್ತಿದ್ದೇವೆ' ಎಂದರು.

ಪ್ರತಿವರ್ಷ ಡಿಸೆಂಬರ್​ 1ರಿಂದ 5ರವರೆಗೆ ಒಡಿಶಾ ಸರ್ಕಾರ ಕೊನಾರ್ಕ್​ನಲ್ಲಿ ಅಂತಾರಾಷ್ಟ್ರೀಯ ಮರಳು ಕಲೆ ಉತ್ಸವ ಏರ್ಪಡಿಸುತ್ತದೆ. ಈ ಬಾರಿ ಅನೇಕ ವಿದೇಶಿಗರು ಕೂಡ ಭಾಗಿಯಾಗಿದ್ದಾರೆ. ಐದು ದಿನಗಳ ಕಾಲ ನಡೆಯುವ ಉತ್ಸವಕ್ಕೆ ಐದು ಲಕ್ಷಕ್ಕೂ ಹೆಚ್ಚು ಜನರು ಬರುವ ನಿರೀಕ್ಷೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ: 2018 ರಲ್ಲಿ ಪೋಸ್ಟ್​ನಲ್ಲಿ ಮಾಡಿದ 500 ರೂ ಮನಿಆರ್ಡರ್​ 2022 ರಲ್ಲಿ ಮನೆಗೆ ಬಂತು!