ತಿರುಚ್ಚಿ: ಮನೆ ಮೇಲ್ಛಾವಣಿ ಕುಸಿದು ಇಬ್ಬರು ಬಾಲಕಿಯರು, ಇಬ್ಬರು ಮಹಿಳೆಯರು ಸಾವು

ಮನೆಯ ಮೇಲ್ಛಾವಣಿ ಕುಸಿದುಬಿದ್ದ ಪರಿಣಾಮ ಅವಶೇಷಗಳಡಿ ಸಿಲುಕಿ ನಾಲ್ವರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.

ತಿರುಚ್ಚಿ (ತಮಿಳುನಾಡು): ಐದು ದಶಕಗಳಷ್ಟು ಹಳೆಯದಾದ ಮನೆಯೊಂದರ ಮೇಲ್ಛಾವಣಿ ಕುಸಿದ ಪರಿಣಾಮ ಒಂದೇ ಕುಟುಂಬದ ಇಬ್ಬರು ಬಾಲಕಿಯರು, ಇಬ್ಬರು ಮಹಿಳೆಯರು ಸಾವನ್ನಪ್ಪಿರುವ ಘಟನೆ ಹೊಸ ವರ್ಷದ ಮೊದಲ ದಿನವೇ ತಿರುಚ್ಚಿಯ ಅರಿಮಂಗಲಂ ಪ್ರದೇಶದಲ್ಲಿ ನಡೆದಿದೆ.

ಕೀಳ ಅಂಬಿಕಾಪುರಂ ಗಾಂಧಿ ಸ್ಟ್ರೀಟ್​ನಲ್ಲಿ 1972ರಲ್ಲಿ ಈ ಮನೆಯನ್ನು ನಿರ್ಮಿಸಲಾಗಿತ್ತು. ಆಟೋ ಚಾಲಕ ಮಾರಿಮುತ್ತು ಎಂಬುವರು ಕುಟುಂಬದ ಜೊತೆ ವಾಸವಾಗಿದ್ದರು. ಘಟನೆಯ ವೇಳೆ ಮಾರಿಮುತ್ತು ತಮ್ಮ ತಂಗಿಯ ಗಂಡನ ಸಾವಿನ ನಂತರದ ಕಾರ್ಯಕ್ರಮಕ್ಕೆ ಚೆನ್ನೈಗೆ ತೆರಳಿದ್ದರು. ಅವರ ತಾಯಿ ಶಾಂತಿ (70), ಪತ್ನಿ ವಿಜಯಲಕ್ಷ್ಮಿ (38) ಹಾಗೂ ಇಬ್ಬರು ಮಕ್ಕಳಾದ ಪ್ರದೀಪಾ (12) ಮತ್ತು ಹರಿಣಿ (10) ಮನೆಯಲ್ಲಿದ್ದರು.

ಜ.1ರಂದು ಮುಂಜಾನೆ ಮನೆ ಮಂದಿ ಮಲಗಿದ್ದಾಗ ಮೇಲ್ಛಾವಣಿ ಏಕಾಏಕಿ ಕುಸಿದು ಬಿದ್ದಿದೆ. ಘಟನೆ ತಡವಾಗಿ ನೆರೆಹೊರೆಯವರ ಗಮನಕ್ಕೆ ಬಂದಿದೆ. ಅಷ್ಟೊತ್ತಿಗಾಗಲೇ ಮನೆಯೊಳಗಿದ್ದ ಶಾಂತಿ, ವಿಜಯಲಕ್ಷ್ಮಿ, ಪ್ರದೀಪಾ ಹಾಗೂ ಹರಿಣಿ ಅವಶೇಷಗಳಡಿಯಲ್ಲಿ ಸಿಲುಕಿ, ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.

ಪಕ್ಕದ ಮನೆಯ ಮಹಿಳೆಯೊಬ್ಬರು ತಮ್ಮ ಮನೆಯಿಂದ ಹೊರಬಂದು ನೋಡಿದಾಗ ಪಕ್ಕದ ಮನೆಯ ಛಾವಣಿ ಕಾಣಿಸದೇ ಇದ್ದಾಗ ಈ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ. ತಕ್ಷಣವೇ ಎಚ್ಚೆತ್ತ ಅವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಅರಿಯಮಂಗಲಂ ಪೊಲೀಸ್​ ಠಾಣೆಯ ಇನ್​ಸ್ಪೆಕ್ಟರ್​ ತಿರುವನಂತಪುರಂ ಹಾಗೂ ಅಧಿಕಾರಿಗಳ ತಂಡ, ತಿರುಚ್ಚಿ ಅಗ್ನಿಶಾಮಕ ದಳದೊಂದಿಗೆ ತ್ವರಿತ ರಕ್ಷಣಾ ಕಾರ್ಯಾಚರಣೆ ಕೈಗೊಂಡರು. ಅವಶೇಷಗಳ ಅಡಿಯಿಂದ ಮೃತದೇಹಗಳನ್ನು ಹೊರತೆಗೆಯಲಾಗಿದ್ದು, ಮರಣೋತ್ತರ ಪರೀಕ್ಷೆಗಾಗಿ ತಿರುಚ್ಚಿ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಲಾಗಿದೆ.

ನಾಲ್ವರು ಮಹಿಳೆಯರ ಸಾವಿಗೆ ಇಡೀ ನಗರವೇ ಸಂತಾಪ ಸೂಚಿಸಿದೆ. ಘಟನೆ ಸಂಬಂಧ ಅರಿಯಮಂಗಲಂ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಕೈಗೊಂಡಿದ್ದಾರೆ.

ಇದನ್ನೂ ಓದಿ:ಕೋಲಾರ: ಕುಸಿದು ಬಿದ್ದ ಮನೆಯ ಮೇಲ್ಚಾವಣಿ, ಏಳು ಜನರಿಗೆ ಗಾಯ