ಕಲ್ಲಿದ್ದಲು ಕಳ್ಳತನ ಯತ್ನ: ನಾಲ್ವರ ಹತ್ಯೆಗೈದ ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ

ಜಾರ್ಖಂಡ್‌ ರಾಜ್ಯದ ಧನ್​ಬಾದ್‌ನಲ್ಲಿ ನಡೆದ ಎನ್‌ಕೌಂಟರ್‌ನಲ್ಲಿ ನಾಲ್ವರು ಕಲ್ಲಿದ್ದಲು ಕಳ್ಳರನ್ನು ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ ಹತ್ಯೆಗೈದಿದೆ.

ಜಾರ್ಖಂಡ್‌: ನಿನ್ನೆ ತಡರಾತ್ರಿ ಧನ್‌ಬಾದ್ ಜಿಲ್ಲೆಯ ಬಾಗ್ಮಾರಾ ಡುಮ್ರಾ ಎಂಬಲ್ಲಿ ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ ಮತ್ತು ಕಲ್ಲಿದ್ದಲು ಕಳ್ಳರ ನಡುವೆ ಗುಂಡಿನ ಚಕಮಕಿ ನಡೆದಿದೆ. ಘಟನೆಯಲ್ಲಿ ನಾಲ್ವರು ಕಳ್ಳರನ್ನು ಹತ್ಯೆಗೈಯ್ಯಲಾಗಿದೆ. ಮತ್ತಿಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಕಲ್ಲಿದ್ದಲು ಕದಿಯುವ ಉದ್ದೇಶದಿಂದ ಬಾಗ್ಮಾರಾದ ಡುಮ್ರಾದಲ್ಲಿರುವ (ಭಾರತ್ ಕುಕ್ಕಿಂಗ್ ಕೋಲ್ ಲಿಮಿಟೆಡ್) ಬಿಸಿಸಿಎಲ್ ಬ್ಲಾಕ್ 2 ರ ಕೆಕೆಸಿ ಮುಖ್ಯ ಸೈಡಿಂಗ್​ ಮೇಲೆ ಮಾರಕಾಸ್ತ್ರಗಳಸಮೇತ ಕಳ್ಳರ ತಂಡ ದಾಳಿ ಮಾಡಿತು. ಈ ಸಂದರ್ಭದಲ್ಲಿ ಸಿಐಎಸ್‌ಎಫ್ ಸಿಬ್ಬಂದಿಯೂ ಸಹ ಪ್ರತಿದಾಳಿ ನಡೆಸಿದ್ದಾರೆ. ಎರಡೂ ಕಡೆಯಿಂದ ತೀವ್ರ ಗುಂಡಿನ ಕಾಳಗ ನಡೆದಿದ್ದು, ನಾಲ್ವರು ಕಳ್ಳರು ಸಾವನ್ನಪ್ಪಿದ್ದಾರೆ. ಬಾದಲ್ ರವಣಿ ಮತ್ತು ರಮೇಶ್ ರಾಮ್ ಎಂಬುವರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ:ಭಾರತೀಯ ಮೀನುಗಾರರ ಮೇಲೆ ಲಂಕಾ ನೌಕಾಪಡೆ ದಾಳಿ: 14 ಮಂದಿ ಬಂಧನ

ಇಂದು ಮುಂಜಾನೆ 4 ಗಂಟೆಯ ಸುಮಾರಿಗೆ ಗುಂಡೇಟು ತಿಂದ ಎಲ್ಲಾ ಆರೋಪಿಗಳನ್ನು ಶಹೀದ್ ನಿರ್ಮಲ್ ಮಹತೋ ವೈದ್ಯಕೀಯ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದ್ರೆ, ಇಬ್ಬರ ಸ್ಥಿತಿ ಗಂಭೀರವಾಗಿರುವ ಹಿನ್ನೆಲೆಯಲ್ಲಿ ಹೆಚ್ಚಿನ ಚಿಕಿತ್ಸೆಗಾಗಿ ರಾಂಚಿಗೆ ಕಳುಹಿಸಲಾಗಿದೆ. ಈ ಬಗ್ಗೆ ಸಿಐಎಸ್‌ಎಫ್ ಮತ್ತು ಜಿಲ್ಲಾ ಪೊಲೀಸರಿಂದ ಯಾವುದೇ ಅಧಿಕೃತ ಹೇಳಿಕೆ ಪ್ರಕಟವಾಗಿಲ್ಲ.