ಕೋವಿಡ್​ ಉಲ್ಬಣದ ನಡುವೆಯೂ ಕರ್ತವ್ಯಕ್ಕಾಗಿ ರಸ್ತೆಗಿಳಿದ ಗರ್ಭಿಣಿ ಡಿವೈಎಸ್​ಪಿ

ಛತ್ತೀಸ್​ಗಢದ ದಂತೇವಾಡದಲ್ಲಿ ಲಾಕ್​ಡೌನ್​​ ಜಾರಿಯಾಗಿದ್ದು, ಐದು ತಿಂಗಳ ಗರ್ಭಿಣಿಯಾಗಿರುವ ಉಪ ಪೊಲೀಸ್ ವರಿಷ್ಠಾಧಿಕಾರಿ ಶಿಲ್ಪಾ ಸಾಹು ಕರ್ತವ್ಯನಿರತರಾಗಿ ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ.

ದಂತೇವಾಡ (ಛತ್ತೀಸ್​ಗಢ): ಕೊರೊನಾ ಹೆಚ್ಚುತ್ತಿರುವ ಹಿನ್ನೆಲೆ ಛತ್ತೀಸ್​ಗಢದ ದಂತೇವಾಡದಲ್ಲಿ ಜಿಲ್ಲಾಡಳಿತ ಲಾಕ್​ಡೌನ್​​ ಹೇರಿದ್ದು, ಇಂತಹ ಸಂದರ್ಭದಲ್ಲೂ ಐದು ತಿಂಗಳ ಗರ್ಭಿಣಿಯಾಗಿರುವ ಡಿವೈಎಸ್​ಪಿ ಮಾತ್ರ ರಸ್ತೆಗಿಳಿದು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ದಂತೇವಾಡದ ಉಪ ಪೊಲೀಸ್ ವರಿಷ್ಠಾಧಿಕಾರಿ ಶಿಲ್ಪಾ ಸಾಹು ಅವರು ಲಾಕ್​ಡೌನ್​ ಘೋಷಣೆಯಾದರೂ ಅನಗತ್ಯವಾಗಿ ಮನೆಗಳಿಂದ ಹೊರಬರುತ್ತಿರುವವರಿಗೆ ರಸ್ತೆಯಲ್ಲೇ ಅರಿವು ಮೂಡಿಸುತ್ತಿದ್ದಾರೆ. ಮಾಸ್ಕ್​ ಹಾಕದೇ ವಾಹನ ಚಲಾಯಿಸುತ್ತಿರುವವರನ್ನು ಅಡ್ಡಗಟ್ಟಿ ತರಾಟೆಗೆ ತೆಗೆದುಕೊಳ್ಳುತ್ತಿದ್ದಾರೆ.

ಇದನ್ನೂ ಓದಿ: ಮುಂಬೈನಲ್ಲಿ 'ವ್ಯಾಕ್ಸಿನ್ ಮುಗಿದಿದೆ​': ಫಲಕ ನೋಡಿ ಹಿಂದಿರುಗುತ್ತಿರುವ ಜನರು

ಕೋವಿಡ್​ ಎರಡನೇ ಅಲೆಯ ಉಲ್ಬಣ ಹಾಗೂ ಸುಡು ಬಿಸಿಲಿನ ನಡುವೆ ಶಿಲ್ಪಾ ಸಾಹು ಅವರ ಕರ್ತವ್ಯಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗಿದೆ. "ನಾವು ರಸ್ತೆಯಲ್ಲಿದ್ದೇವೆ, ನೀವು ಸುರಕ್ಷಿತವಾಗಿರಲು ಮನೆಯಿಂದ ಹೊರಬರಬೇಡಿ. ದಯವಿಟ್ಟು ಇದನ್ನು ಅರ್ಥಮಾಡಿಕೊಳ್ಳಿ, ಲಾಕ್​ಡೌನ್​ ನಿಯಮಗಳನ್ನು ಪಾಲಿಸಿ" ಎಂದು ಶಿಲ್ಪಾ ಮನವಿ ಮಾಡುತ್ತಿದ್ದಾರೆ.

ಕೋವಿಡ್​ ಸಾವು-ನೋವು ಹೆಚ್ಚಾದ ಕಾರಣ ದಂತೇವಾಡದಲ್ಲಿ ಏಪ್ರಿಲ್​ 18 ರಿಂದ ಏ.27ರವರೆಗೆ ಲಾಕ್​ಡೌನ್​ ಜಾರಿಗೊಳಿಸಲಾಗಿದೆ.