'ಇಲ್ಲಿ ನಾನೇ ಬಾಸ್..': ಕುಟುಂಬ ಸಾಕಲು ಕಂಪನಿ ಕೆಲಸ ತ್ಯಜಿಸಿ ಕ್ಯಾಬ್ ಡ್ರೈವರ್ ಆದ ಬಿ.ಟೆಕ್ ಪದವೀಧರೆ

ಕೋಲ್ಕತ್ತಾದ ಈ ಮಹಿಳಾ ಉಬರ್ ಕ್ಯಾಬ್ ಡ್ರೈವರ್ ಬಿ.ಟೆಕ್ ಪದವೀಧರೆ. ಅವರ ಸ್ಪೂರ್ತಿದಾಯಕ ಕಥೆ ಇಲ್ಲಿದೆ.

ಕೋಲ್ಕತ್ತಾ(ಪಶ್ಚಿಮ ಬಂಗಾಳ): ಇಂದಿನ ಮಹಿಳೆಯರು ವಿವಿಧ ರೀತಿಯ ಸಾಮಾಜಿಕ ಸಂಕೋಲೆಗಳನ್ನು ಕಳಚಿ ಸ್ವತಂತ್ರ ಮನೋಭಾವದಿಂದ ಸ್ವಾಭಿಮಾನದ ಬದುಕು ಕಟ್ಟಿಕೊಳ್ಳುತ್ತಿದ್ದಾರೆ. ಪುರುಷರು ಮಾಡುವ ಹಲವು ಕೆಲಸಗಳನ್ನು ಮಾಡುವ ಮೂಲಕ ತಾವು ಯಾವುದರಲ್ಲೂ ಕಡಿಮೆಯಿಲ್ಲ ಎಂಬುದನ್ನು ಸಾಧಿಸಿ, ಸಾಬೀತುಪಡಿಸಿದ್ದಾರೆ. ಇದಕ್ಕೆ ಉತ್ತಮ ಉದಾಹರಣೆ ಸಿಕ್ಕಿದೆ.

ಕೋಲ್ಕತ್ತಾ ಮೂಲದ ಬಿ.ಟೆಕ್ (ಎಲೆಕ್ಟ್ರಿಕಲ್) ಪದವೀಧರೆ ದೀಪ್ತಾ ಘೋಷ್ ಅವರು ರಾಜ್ಯದ ಮೊದಲ ಮಹಿಳಾ ಕ್ಯಾಬ್ ಡ್ರೈವರ್ ಆಗಿ ಕೆಲಸ ಮಾಡುವ ಮೂಲಕ ಇತರರಿಗೆ ಮಾದರಿಯಾಗಿದ್ದಾರೆ. ಈ ಮಹಿಳಾ ಕ್ಯಾಬ್ ಚಾಲಕಿಯ ಹೃದಯಸ್ಪರ್ಶಿ ಕಥೆಯನ್ನು ಫೇಸ್​ಬುಕ್​ ಬಳಕೆದಾರರೊಬ್ಬರು ಹಂಚಿಕೊಂಡಿದ್ದಾರೆ. ಮಹಿಳಾ ಉಬರ್ ಚಾಲಕಿಯನ್ನು ಭೇಟಿಯಾದ ಪರಮ್ ಕಲ್ಯಾಣ್ ಸಿಂಗ್ ಎಂಬುವವರು ತಮ್ಮ ಫೇಸ್‌ಬುಕ್ ಪೋಸ್ಟ್‌ನಲ್ಲಿ ಆಕೆಯ ಜತೆಗಿನ ಕೆಲ ಅನುಭವವನ್ನು ಹಂಚಿಕೊಂಡಿದ್ದಾರೆ. ಮೊದಲ ಬಾರಿಗೆ ಅಪರೂಪದ ಮಹಿಳಾ ಕ್ಯಾಬ್ ಡ್ರೈವರ್ ಅನ್ನು ಭೇಟಿಯಾಗಿರುವುದಾಗಿ ಅವರು ತಿಳಿಸಿದ್ದಾರೆ. ಈ ಪೋಸ್ಟ್‌ನಲ್ಲಿ ಡ್ರೈವರ್​ ಅನುಭವ ಹಾಗೂ ಆಕೆಯ ವಿವರ ಜತೆಗೆ ಆಕೆಯ ಫೋಟೋವನ್ನೂ ಪೋಸ್ಟ್​ ಮಾಡಿದ್ದಾರೆ.

ಪರಮ್ ಕಲ್ಯಾಣ್ ಸಿಂಗ್ ಉಬರ್ ಬುಕ್ ಮಾಡಿದ್ದರು. ಪಿಕಪ್ ಮಾಡಿಕೊಳ್ಳಲು ಚಾಲಕನಿಗೆ ಕರೆ ಮಾಡಿದ್ದಾರೆ. ಆ ಕಡೆಯಿಂದ ಮಹಿಳೆ ಪ್ರತಿಕ್ರಿಯಿಸಿದ್ದನ್ನು ಕೇಳಿ ಒಂದು ಕ್ಷಣ ಆಶ್ಚರ್ಯ ಚಕಿತರಾಗಿದ್ದಾರೆ. ಏಕೆಂದರೆ ಅವರು ಕ್ಯಾಬ್ ಚಾಲಕಿಯನ್ನು ನೋಡಿರುವುದು ಇದೇ ಮೊದಲು. ಈ ಮಹಿಳಾ ಚಾಲಕಿಯ ಬಗ್ಗೆ ಪೋಸ್ಟ್​ನಲ್ಲಿ ವಿವರಿಸಿರುವ ಪರಮ್, ಉಬರ್ ಇಂಡಿಯಾದ ಮಹಿಳಾ ಡ್ರೈವರ್ ಹೆಸರು "ದೀಪ್ತಾ ಘೋಷ್". ನಾನು ಲೇಕ್ ಮಾಲ್‌ಗೆ ಹೋಗಲು ಕ್ಯಾಬ್ ಬುಕ್ ಮಾಡಿದ್ದೆ. ಮಹಿಳಾ ಚಾಲಕಿಯಿಂದ ಕರೆ ಸ್ವೀಕರಿಸಿದೆ. ನಿಮ್ಮ ಡ್ರಾಪ್ ಎಲ್ಲಿಗೆ, ಪೇಮೆಂಟ್ ಹೇಗೆ ಮಾಡುತ್ತೀರಿ ಎಂದು ಸಭ್ಯವಾಗಿ ಕೇಳಿದರು. ನಮ್ಮ ಪ್ರಯಾಣದ ವೇಳೆ ದೀಪ್ತಾ ಘೋಷ್ ಅವರ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿದುಕೊಂಡೆ. ಈಕೆ ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್ ಪದವೀಧರರಾಗಿದ್ದಾರೆ. ಹಲವು ಕಂಪನಿಗಳಲ್ಲಿ ಇಂಜಿನಿಯರ್ ಆಗಿ ಕೆಲಸ ಮಾಡಿದ್ದಾಗಿ ತಿಳಿಸಿದರು.

ದೀಪ್ತಾ ಘೋಷ್

"2020ರಲ್ಲಿ ನಾನು ನನ್ನ ತಂದೆಯನ್ನು ಕಳೆದುಕೊಂಡೆ. ತಂದೆಯ ಮರಣದಿಂದ ಜವಾಬ್ದಾರಿಗಳು ಹೆಚ್ಚಾದವು. ಆ ವೇಳೆ ನಾನು ಹೊರ ರಾಜ್ಯದಲ್ಲಿ ಕೆಲಸ ಮಾಡುತ್ತಿದ್ದೆ. ಬರುವ ಸಂಬಳ ಕುಟುಂಬವನ್ನು ನೋಡಿಕೊಳ್ಳಲು ಸಾಕಾಗಲಿಲ್ಲ. ಹಾಗಾಗಿ ಕೆಲಸವನ್ನು ಬಿಡಲು ನಿರ್ಧರಿಸಿದೆ. ತಾಯಿ ಮತ್ತು ತಂಗಿಯನ್ನು ಬಿಟ್ಟು ಹೋಗುವುದಕ್ಕಿಂತ ಜೊತೆಗಿದ್ದು ನೋಡಿಕೊಳ್ಳುವುದೇ ನನಗೆ ಮುಖ್ಯವಾಗಿತ್ತು. ಆಗ ನನ್ನ ತಾಯಿ ಕ್ಯಾಬ್ ಡ್ರೈವಿಂಗ್ ಪ್ರಾರಂಭಿಸಲು ಸಲಹೆ ನೀಡಿದರು. 2021ರಲ್ಲಿ ಉಬರ್‌ಗೆ ಚಾಲಕಿಯಾಗಿ ಕೆಲಸ ಮಾಡಲು ಅರ್ಜಿ ಸಲ್ಲಿಸಿದೆ. ನಾನು ವಾಣಿಜ್ಯ ಪರವಾನಗಿ ಪಡೆದಾಗ ನನ್ನ ತಾಯಿ ನನ್ನನ್ನು ತುಂಬಾ ಪ್ರೋತ್ಸಾಹಿಸಿದರು. ನಾನು ಅವರಿಗೆ ತುಂಬಾ ಕೃತಜ್ಞನಾಗಿದ್ದೇನೆ. ಸುಮಾರು 3 ತಿಂಗಳ ತರಬೇತಿಯ ನಂತರ ನಾನು ಈಗ ನಾನು ವಾರಕ್ಕೆ 6 ದಿನಗಳವರೆಗೆ ಪ್ರತಿದಿನ ಸುಮಾರು 6-7 ಗಂಟೆಗಳ ಕೆಲಸ ಮಾಡುತ್ತೇನೆ. ತಿಂಗಳಿಗೆ ಸುಮಾರು 35,000 ರಿಂದ 40,000 ರೂ ಗಳಿಸುತ್ತೇನೆ" ಎಂದು ದೀಪ್ತಾ ಘೋಷ್ ಹೇಳಿದರು ಎಂದು ಪರಮ್​ ತಮ್ಮ ಪೋಸ್ಟ್​​ನಲ್ಲಿ ತಿಳಿಸಿದ್ದಾರೆ.

ಆಕೆಯ ಕೆಲಸದ ಬಗ್ಗೆ ಕೇಳಿದಾಗ, ನನ್ನ ಕೆಲಸದ ಬಗ್ಗೆ ನನಗೆ ಹೆಮ್ಮೆಯಿದೆ. ಇಲ್ಲಿ ನಾನೇ ಬಾಸ್ ಆಗಿರುವುದರಿಂದ ಬೇರೆ ಯಾವುದೇ ಕಂಪನಿಯಲ್ಲಿ ಕೆಲಸ ಮಾಡಲು ಬಯಸುವುದಿಲ್ಲ ಎಂದು ಹೇಳಿದ್ದಾಗಿ ಪರಮ್ ಕಲ್ಯಾಣ್ ಸಿಂಗ್ ತಿಳಿಸಿದ್ದಾರೆ. ಪರಮ್ ಅವರ ಪೋಸ್ಟ್ ವೈರಲ್ ಆದ ನಂತರ ಸಾಮಾಜಿಕ ಮಾಧ್ಯಮ ಬಳಕೆದಾರರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. "ನಾನು ಅವಳಿಗೆ ನಮಸ್ಕರಿಸುತ್ತೇನೆ" ಎಂದು ಬರೆದರೆ, ಮತ್ತೊಬ್ಬರು "ನಮ್ಮ ದೇಶದ ಹುಡುಗಿಯರು ಯಾವುದರಲ್ಲೂ ಹಿಂದುಳಿದಿಲ್ಲ ಎಂದು ನಾನು ಭಾವಿಸುತ್ತೇನೆ" ಕಾಮೆಂಟ್​ ಮಾಡಿದ್ಧಾರೆ.

ಸಾಮಾನ್ಯವಾಗಿ ಈಗಿನ ಪರಿಸ್ಥಿತಿಯಲ್ಲಿ ರಾತ್ರಿ ವೇಳೆ ಕ್ಯಾಬ್‌ಗಳಲ್ಲಿ ಓಡಾಡಲು ಯುವತಿಯರು ಹೆದರುತ್ತಾರೆ. ಆದರೆ ಇಲ್ಲಿ ಮಹಿಳಾ ಚಾಲಕಿಯರೇ ಕ್ಯಾಬ್‌ಗಳನ್ನು ಓಡಿಸುತ್ತಿರುವುದು ಹಲವರಿಗೆ ಮಾದರಿಯಾಗಿದೆ.

ಇದನ್ನೂ ಓದಿ:ರಾಷ್ಟ್ರೀಯ ಚಾಂಪಿಯನ್​ ಜ್ಯೋತಿ ಯೆರ್ರಾಜಿ ಅವರ ಯಶಸ್ವಿ ಕಥೆ..