ಅಯೋಧ್ಯೆಯ ಹನುಮಾನ್ ದೇವಾಲಯಕ್ಕೆ ಹುಸಿಬಾಂಬ್ ಕರೆ: ಆರೋಪಿ ಅಂದರ್

ಅಯೋಧ್ಯೆಯಲ್ಲಿ ಗುರು ಪೂರ್ಣಿಮೆ ಹಿನ್ನೆಲೆ ಹನುಮಾನ್ ದೇವಾಲಯದಲ್ಲಿ ಸಾವಿರಾರು ಭಕ್ತರು ನೆರೆದಿದ್ದರು. ಆದರೆ ಮದ್ಯದ ನಶೆಯಲ್ಲಿದ್ದ ವ್ಯಕ್ತಿವೋರ್ವ ಹುಸಿಬಾಂಬ್ ಕರೆ ಮಾಡಿದ್ದ. ಇದರಿಂದ ಕೆಲಕಾಲ ಎಲ್ಲರೂ ಆತಂಕ ಉಂಟಾಗಿತ್ತು. ಬಳಿಕ ಆತನನ್ನು ಪೊಲೀಸರು ಬಂಧಿಸಿದ್ದು, ತನಿಖೆ ಮುಂದುವರಿದಿದೆ.

ಅಯೋಧ್ಯೆ (ಉ.ಪ್ರ):ಇಲ್ಲಿನ ಸಹದತ್​​​​​​​ಗಂಜ್ ಪ್ರಾಂತ್ಯದ ಹನುಮಾನ್ ದೇವಾಲಯದಲ್ಲಿ ಬಾಂಬ್ ಇಡಲಾಗಿದೆ ಎಂದು ಕರೆ ಮಾಡಿದ್ದ ವ್ಯಕ್ತಿಯನ್ನು ಪೊಲೀಸರು ಪೊಲೀಸರು ಕೆಲವೇ ಗಂಟೆಗಳಲ್ಲಿ ಹೆಡೆಮುರಿ ಕಟ್ಟಿದ್ದಾರೆ. ಆತನ ಬಂಧನದ ಬಳಿಕ ಇದು ಹುಸಿ ಬಾಂಬ್​ ಕರೆ ಅನ್ನೋದು ಪೊಲೀಸರಿಗೆ ತಿಳಿದಿದೆ.

ಗುರು ಪೂರ್ಣಿಮೆ ಸಂಭ್ರಮದಲ್ಲಿದ್ದ ಭಕ್ತಾದಿಗಳಿಗೆ ಹುಸಿಬಾಂಬ್ ಕರೆ ಆತಂಕಕ್ಕೆ ದೂಡಿತ್ತು. ದೇವಾಲಯದೊಳಗೆ ಬಾಂಬ್​ ಇಡಲಾಗಿದೆ ಎಂದು ಅಪರಿಚಿತನೋರ್ವ ಪೊಲೀಸರಿಗೆ ಕರೆ ಮಾಡಿದ್ದ, ಶನಿವಾರ ಗುರು ಪೂರ್ಣಿಮೆ ಹಿನ್ನೆಲೆ ದೇವಾಲಯದಲ್ಲಿ ಸಹಸ್ರಾರು ಭಕ್ತರು ನೆರೆದಿದ್ದರು.

ಈ ಹಿನ್ನೆಲೆ ತಕ್ಷಣವೇ ಸ್ಥಳಕ್ಕಾಗಮಿಸಿದ್ದ ಎಸ್​ಎಸ್​​ಪಿ ಶೈಲೇಂದ್ರ ಪಾಂಡೆ ನೇತೃತ್ವದ ತಂಡ ಬಾಂಬ್​​​​ಗಾಗಿ ತೀವ್ರ ಹುಡುಕಾಟ ನಡೆಸಿದ್ದರು. ಅಲ್ಲದೆ ದೇವಾಲಯದ ವ್ಯಾಪ್ತಿಯಿಂದ ಭಕ್ತರನ್ನು ತೆರವುಗೊಳಿಸಿ ಬಾಂಬ್ ನಿಷ್ಕ್ರಿಯ ದಳ ಶೋಧ ನಡೆಸಿತ್ತು.

ಇತ್ತೀಚಿಗೆ ಲಖನೌದಲ್ಲಿ ಅಲ್​ಖೈದಾ ಸಂಘಟನೆಯ ಉಗ್ರನೋರ್ವನ ಬಂಧಿಸಿದ್ದ ಪ್ರಕರಣದ ಬಳಿಕ ಬಾಂಬ್ ಕರೆ ಬಂದ ಹಿನ್ನೆಲೆ ಪೊಲೀಸರು ಸಹ ಆತಂಕಕ್ಕೆ ಒಳಗಾಗಿದ್ದರು. ಬಿಗಿ ಭದ್ರತೆಯ ನಡುವೆ ದೇವಾಲಯದ ಒಳಗೆ ಹಾಗೂ ಹೊರಗಿನ ಎಲ್ಲಾ ವಾಹನಗಳು ಸೇರಿ ಮೂಲೆ ಮೂಲೆಯಲ್ಲೂ ಬಾಂಬ್​ಗಾಗಿ ಶೋಧ ನಡೆಸಿದ್ದರು. ಆದರೆ ಯಾವುದೇ ಬಾಂಬ್ ಪತ್ತೆಯಾಗಿರಲಿಲ್ಲ.

ಬಳಿಕ ಇದೊಂದು ಹುಸಿಬಾಂಬ್ ಕರೆ ಎಂದು ತಿಳಿದ ಪೊಲೀಸರು, ಹುಸಿ ಫೋನ್​ ಕರೆ ಮಾಡಿದ್ದಾತನ ಹುಡುಕಾಟ ಆರಂಭಿಸಿದ್ದರು. ಕರೆ ಬಂದು ಸುಮಾರು 3 ಗಂಟೆಯಲ್ಲೇ ಕರೆ ಮಾಡಿದ್ದ ವ್ಯಕ್ತಿಯನ್ನ ವಶಕ್ಕೆ ಪಡೆದಿದ್ದರು. ಇಲ್ಲಿನ ಕಾನ್ಪುರ್ ಮೂಲದ ಅನಿಲ್ ಎಂಬಾತನನ್ನು ಕರೆ ಬಂದಿದ್ದ ಮೊಬೈಲ್ ಸಂಖ್ಯೆ ಆಧರಿಸಿ ಬಂಧಿಸಲಾಯಿತು. ಆತ ಮದ್ಯಪಾನ ಮಾಡಿ ಕರೆ ಮಾಡಿರುವುದು ತನಿಖೆ ವೇಳೆ ತಿಳಿದುಬಂದಿದೆ.

ಓದಿ:ಕಾಶ್ಮೀರದಲ್ಲಿ ಎನ್‌ಕೌಂಟರ್‌; ಮೂವರು ಉಗ್ರರ ಹತ್ಯೆ