ಪಾಕ್‌ನಲ್ಲಿರುವ ಭಾರತೀಯ ಹೈಕಮಿಷನ್‌ ಕಚೇರಿ ಮೇಲೂ ಡ್ರೋಣ್ ಹಾರಾಟ

ಇಸ್ಲಾಮಾಬಾದ್​​ನಲ್ಲಿರುವ ಭಾರತೀಯ ಹೈಕಮಿಷನ್‌ ಕಚೇರಿ ಮೇಲೆ ಸಂಶಯಾಸ್ಪದ ರೀತಿಯಲ್ಲಿ ಡ್ರೋಣ್ ಹಾರಾಟ ನಡೆಸಿರುವ ಬಗ್ಗೆ ವರದಿಯಾಗಿದ್ದು, ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.

ನವದೆಹಲಿ:ಪಾಕಿಸ್ತಾನದ ರಾಜಧಾನಿ ಇಸ್ಲಾಮಾಬಾದ್​ನಲ್ಲಿರುವ ಭಾರತೀಯ ಹೈಕಮಿಷನ್‌ ಕಚೇರಿ ಮೇಲೆ ಡ್ರೋಣ್​ ಹಾರಾಟ ನಡೆಸಿದ್ದು, ಈ ಬೆಳವಣಿಗೆಯನ್ನು ಭಾರತ ಖಂಡಿಸಿದೆ. ಜತೆಗೆ ಡ್ರೋಣ್ ಹಾರಾಟ ಹಿಂದೆ ಅಲ್ಲಿನ ಉಗ್ರ ಸಂಘಟನೆಗಳ ಕೈವಾಡವಿರಬಹುದು ಎಂದು ಶಂಕೆ ವ್ಯಕ್ತಪಡಿಸಲಾಗಿದೆ.

ಭಾರತೀಯ ಹೈಕಮಿಷನ್‌ ಕಚೇರಿ ಕಟ್ಟಡದ ಮೇಲೆ ಡ್ರೋಣ್​ ಹಾರಾಟ ನಡೆಸಿರುವುದು ಭದ್ರತೆಯ ಲೋಪವಾಗಿದ್ದು, ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.

ಕಳೆದ ಜೂನ್​ 27ರಂದು ಭಾರತ-ಪಾಕ್​ನ ಗಡಿ ಭಾಗದ ಜಮ್ಮು ಕಾಶ್ಮೀರದ ವಾಯಸೇನಾ ನೆಲೆಗಳ ಮೇಲೆ ಡ್ರೋಣ್​ ದಾಳಿ ನಡೆದಿತ್ತು. ಇದಾದ ಬಳಿಕ ಗಡಿ ಭಾಗಗಳಲ್ಲಿ ಮೇಲಿಂದ ಮೇಲೆ ಡ್ರೋಣ್ ಪತ್ತೆಯಾಗುತ್ತಿದೆ. ಡ್ರೋಣ್​ ಹಾರಾಟದ ಹಿಂದೆ ಪಾಕ್​ ಮೂಲದ ಉಗ್ರ ಸಂಘಟನೆಗಳಾಗಿರುವ ಜೈಶ್​- ಇ-ಮೊಹಮ್ಮದ್​ ಹಾಗೂ ಲಷ್ಕರ್​-ಇ-ತೊಯ್ಬಾ ಕೈವಾಡವಿರಬಹುದು ಎಂಬ ಅನುಮಾನ ದಟ್ಟವಾಗಿದೆ.

ಗಡಿಯಲ್ಲಿ ಡ್ರೋಣ್ ಹಾರಾಟ

ಇಂದು ಬೆಳಗ್ಗೆ ಕೂಡ ಜಮ್ಮು ಕಾಶ್ಮೀರದ ಅರ್ನಿಯಾ ಸೆಕ್ಟರ್​​ನ ಹೊರವಲಯದಲ್ಲಿ ಡ್ರೋಣ್​ ಪತ್ತೆಯಾಗಿದ್ದು, ಭಾರತೀಯ ಸೇನೆ ಹೊಡೆದುರುಳಿಸಿದೆ.