'ಬೀಟಿಂಗ್​ ದಿ ರಿಟ್ರೀಟ್' ವೇಳೆ ಹೊಸ ದಾಖಲೆ.. ಆಗಸದಲ್ಲಿ ಸಾವಿರ ಡ್ರೋನ್​ಗಳ ಚಿತ್ತಾರ!

Beating Retreat ceremony at Vijay Chowk : ಗಣರಾಜ್ಯೋತ್ಸವ ಸಂಭ್ರಮದ ಸಮಾರೋಪದ ಅಂಗವಾಗಿ ದೆಹಲಿಯ ವಿಜಯ್​ ಚೌಕ್​​ನಲ್ಲಿ ಸಾವಿರ ಡ್ರೋನ್​ಗಳು ಆಗಸದಲ್ಲಿ ಹಾರಾಟ ನಡೆಸುವ ಮೂಲಕ ಹೊಸದೊಂದು ದಾಖಲೆ ನಿರ್ಮಾಣ ಮಾಡಿವೆ..

ನವದೆಹಲಿ :73ನೇ ಗಣರಾಜ್ಯೋತ್ಸವ ಕಾರ್ಯಕ್ರಮಗಳ ಸಮಾರೋಪ ಸಮಾರಂಭ ಅಂಗವಾಗಿ ದೆಹಲಿಯ ವಿಜಯ್​ ಚೌಕ್​​ನಲ್ಲಿ 'ಬೀಟಿಂಗ್ ದಿ ರಿಟ್ರೀಟ್'​ ನಡೆಸಲಾಯಿತು. ಭಾರತಕ್ಕೆ ಸ್ವಾತಂತ್ರ್ಯ ಬಂದು 75 ವರ್ಷಗಳು ಕಳೆದ ಹಿನ್ನೆಲೆಯಲ್ಲಿ 'ಆಜಾದಿ ಕಾ ಅಮೃತ ಮಹೋತ್ಸವ' ಕಾರ್ಯಕ್ರಮದ ಅಂಗವಾಗಿ ನಡೆದ ಈ ಕಾರ್ಯಕ್ರಮದಲ್ಲಿ ಹೊಸದೊಂದು ದಾಖಲೆ ನಿರ್ಮಾಣಗೊಂಡಿದೆ.

ಕೇಂದ್ರ ಸರ್ಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯಿಂದ ಆಯೋಜನೆಗೊಂಡಿದ್ದ ವಿಶೇಷ ಕಾರ್ಯಕ್ರಮದ ಅಂಗವಾಗಿ 1000 ಡ್ರೋನ್​​ಗಳಿಂದ ಲೈಟ್ ಶೋ ನಡೆಸಲಾಯಿತು. ದೆಹಲಿಯಲ್ಲಿ ಇದೇ ಮೊದಲ ಬಾರಿಗೆ ಬೀಟಿಂಗ್​ ದಿ ರಿಟ್ರೀಟ್​ ಕಾರ್ಯಕ್ರಮದಲ್ಲಿ ಸಾವಿರ ಡ್ರೋನ್​​ಗಳು ಹಾರಾಟ ಸಡೆಸಿದವು. ಸುಮಾರು 10 ನಿಮಿಷಗಳ ಕಾಲ ನಡೆದ ಡ್ರೋನ್​ ಹಾರಾಟ ಸಮಾರಂಭದಲ್ಲಿ ಭಾರತದ ಭಾವುಟ ಮೂಡಿಸಲಾಯಿತಲ್ಲದೇ ವೀರ ಸೈನಿಕರಿಗೆ ವಂದನೆ ಸಲ್ಲಿಸಲಾಯಿತು.

ಪ್ರಮುಖವಾಗಿ ಮೇಕ್ ಇನ್ ಇಂಡಿಯಾದ ಲೋಗೋ, ಯುದ್ಧ ಸ್ಮಾರಕ, ಆತ್ಮ ನಿರ್ಭರ್ ಭಾರತ ಸೇರಿದಂತೆ ಅನೇಕ ಲಾಂಛನಗಳು ಡ್ರೋನ್​ ಲೈಟ್‌ನಲ್ಲಿ ಮೂಡಿ ಬಂದವು. ಆಗಸದಲ್ಲಿ ಸಾವಿರ ಡ್ರೋನ್​ಗಳು ಚಿತ್ತಾರ ಸುಮಾರು 10 ನಿಮಿಷಗಳ ಕಾಲ ನಡೆದಿದ್ದು, ಈ ಮೂಲಕ ಸಮಾರೋಪ ಸಮಾರಂಭಕ್ಕೆ ಹೆಚ್ಚಿನ ಮೆರುಗು ತಂದು ಕೊಟ್ಟಿತ್ತು. ಇದೇ ವೇಳೆ ವಿಜಯ್​​ ಚೌಕ್​​ನಲ್ಲಿ ವಂದೇ ಮಾತರಂ ಘೋಷಣೆ ಮೊಳಗಿತು. 1000 ಡ್ರೋನ್​ಗಳೆಲ್ಲವೂ ದೇಶೀಯವಾಗಿ ಅಭಿವೃದ್ಧಿಯಾಗಿದ್ದು, 10 ನಿಮಿಷಗಳ ಕಾಲ ಕೇಂದ್ರ ಸರ್ಕಾರದ 75 ಸಾಧನೆಗಳನ್ನು ಲೈಟಿಂಗ್​ ಮೂಲಕ ಪ್ರದರ್ಶನ ಮಾಡಿದವು.

ದೆಹಲಿಯಲ್ಲಿ ನಡೆದ ಗಣರಾಜ್ಯೋತ್ಸವ ಸಮಾರೋಪ ಸಮಾರಂಭದಲ್ಲಿ ಮೂರು ಸೇನಾ ಪಡೆಗಳ ಮುಖ್ಯಸ್ಥರು, ರಾಷ್ಟ್ರಪತಿ ರಾಮನಾಥ್ ಕೋವಿಂದ್​, ಪ್ರಧಾನಿ ನರೇಂದ್ರ ಮೋದಿ, ರಕ್ಷಣಾ ಸಚಿವರಾದ ರಾಜನಾಥ್ ಸಿಂಗ್​ ಸೇರಿದಂತೆ ಅನೇಕರು ಭಾಗಿಯಾಗಿದ್ದರು.

ಜಾಹೀರಾತು: ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ