ತಮಿಳುನಾಡು ಸಿಎಂ ಆಗಿ ನಾಳೆ ಸ್ಟಾಲಿನ್ ಪದಗ್ರಹಣ: ಸಚಿವ ಸಂಪುಟದಲ್ಲಿ ಗಾಂಧಿ, ನೆಹರು!

ಇತ್ತೀಚೆಗೆ ತಮಿಳುನಾಡು ವಿಧಾನಸಭೆಗೆ ನಡೆದ ಚುನಾವಣೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿರುವ ದ್ರಾವಿಡ ಮುನ್ನೇತ್ರ ಕಳಗಂ(ಡಿಎಂಕೆ) ಪಕ್ಷ ಅಧಿಕಾರದ ಚುಕ್ಕಾಣಿ ಹಿಡಿಯಲು ಸಿದ್ಧವಾಗಿದೆ. ನೂತನ ಸಿಎಂ ಆಗಿ ನಾಳೆ ಸ್ಟಾಲಿನ್ ಪದಗ್ರಹಣ ಮಾಡಲಿದ್ದಾರೆ.

ಚೆನ್ನೈ:ತಮಿಳುನಾಡು ವಿಧಾನಸಭೆಯಲ್ಲಿ ಎಂ ಕೆ ಸ್ಟಾಲಿನ್​​ ನೇತೃತ್ವದ ಡಿಎಂಕೆ 159 ಸ್ಥಾನಗಳಲ್ಲಿ ಗೆಲುವು ದಾಖಲಸಿದ್ದು, 10 ವರ್ಷಗಳ ಬಳಿಕ ಸರ್ಕಾರ ರಚನೆ ಮಾಡುತ್ತಿದೆ.

ನಾಳೆ ತಮಿಳುನಾಡಿನ ನೂತನ ಮುಖ್ಯಮಂತ್ರಿಯಾಗಿ ಎಂ.ಕೆ ಸ್ಟಾಲಿನ್​ ಪದಗ್ರಹಣ ಮಾಡಲಿದ್ದು, ಇವರ ಸಂಪುಟದಲ್ಲಿ 34 ಸಚಿವರು ಇರಲಿದ್ದಾರೆ.

ಬುಧವಾರ ಪಕ್ಷದ ಹಿರಿಯ ನಾಯಕರೊಂದಿಗೆ ರಾಜಭವಕ್ಕೆ ತೆರಳಿ ಗವರ್ನರ್​ ಬನ್ವರಿಲಾಲ್​ ಪುರೋಹಿತ್​​ ಅವರನ್ನ ಭೇಟಿ ಮಾಡಿದ್ದ ಸ್ಟಾಲಿನ್​, ಸರ್ಕಾರ ರಚನೆ ಮಾಡಲು ಹಕ್ಕು ಮಂಡನೆ ಮಾಡಿದ್ದರು.

ನಾಳೆ ಬೆಳಗ್ಗೆ 9 ಗಂಟೆಗೆ ರಾಜಭವನದಲ್ಲಿ ಪ್ರಮಾಣವಚನ ಕಾರ್ಯಕ್ರಮ ಜರುಗಲಿದೆ. ಇವರೊಂದಿಗೆ 34 ಶಾಸಕರು ಸಚಿವ ಸಂಪುಟ ಸೇರಲಿದ್ದು, ಸಚಿವರಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

ಸ್ಟಾಲಿನ್​​ ಸಂಪುಟದಲ್ಲಿ ಗಾಂಧಿ, ನೆಹರು!

ಹೊಸದಾಗಿ ಸರ್ಕಾರ ರಚನೆ ಮಾಡುತ್ತಿರುವ ಸ್ಟಾಲಿನ್​ ಸಂಪುಟದಲ್ಲಿ ಹಿರಿಯ ನಾಯಕ ಕೆ.ಎನ್​ ನೆಹರು ಹಾಗೂ ಹಾಗೂ ಆರ್​. ಗಾಂಧಿ ಸಹ ಇದ್ದು, ಸಚಿವರಾಗಿ ಅಧಿಕಾರ ಸ್ವೀಕರಿಸಲಿದ್ದಾರೆ. ಇವರ ಜೊತೆಗೆ ದೊರೈಮುರುಗನ್​, ಎಂ ಸುಬ್ರಮಣಿಯನ್​ ಕೂಡ ಸಂಪುಟ ಸೇರಿಕೊಳ್ಳಲಿದ್ದಾರೆ.

ಕೆ.ಎನ್​ ನೆಹರು ನಗರ ಮತ್ತು ನೀರು ಸರಬರಾಜು ಹಾಗೂ ನಗರಸಭೆ ಆಡಳಿತ ಸಚಿವರಾಗಿ, ಆರ್. ಗಾಂಧಿ ಕೈಮಗ್ಗ ಮತ್ತು ಜವಳಿ, ಖಾದಿ ಮತ್ತು ಗ್ರಾಮದ್ಯೋಗ ಸಚಿವರಾಗಿ ಅಧಿಕಾರ ಸ್ವೀಕಾರ ಮಾಡಲಿದ್ದಾರೆ.