ದೆಹಲಿ ತಲಾ ಆದಾಯ ಹೆಚ್ಚಳ; ಸರ್ಕಾರದ ಸಾಧನೆ ಕೊಂಡಾಡಿದ ಸಿಎಂ ಕೇಜ್ರಿವಾಲ್

ದೆಹಲಿ ರಾಜ್ಯದ ತಲಾ ಆದಾಯ ಹೆಚ್ಚಳವಾಗಿರುವುದಕ್ಕೆ ಸಿಎಂ ಕೇಜ್ರಿವಾಲ್ ಸಂತಸ ವ್ಯಕ್ತಪಡಿಸಿದ್ದಾರೆ.

ನವದೆಹಲಿ: ದೆಹಲಿಯ ತಲಾ ಆದಾಯ ಹೆಚ್ಚಳಕ್ಕೆ ರಾಜ್ಯದ ಎರಡು ಕೋಟಿ ಜನರ ಕಠಿಣ ಪರಿಶ್ರಮ ಮತ್ತು ಸರಕಾರದ ಜಂಟಿ ಪ್ರಯತ್ನಗಳೇ ಕಾರಣ ಎಂದು ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ರವಿವಾರ ಹೇಳಿದ್ದಾರೆ. ದೆಹಲಿಯ ತಲಾ ಆದಾಯವು ಪ್ರಸಕ್ತ ಹಣಕಾಸು ವರ್ಷದಲ್ಲಿ 3,89,529 ರೂ.ಗಳಿಂದ 4,44,768 ರೂ.ಗೆ ಏರಿದೆ. ಇದು ರಾಷ್ಟ್ರೀಯ ಸರಾಸರಿಗಿಂತ ಶೇಕಡಾ 158ರಷ್ಟು ಹೆಚ್ಚಾಗಿದೆ ಎಂದು ಕೇಜ್ರಿವಾಲ್ ಸರ್ಕಾರ ಶನಿವಾರ ತನ್ನ ಅಂಕಿಅಂಶ ಕೈಪಿಡಿ -2023 ಬಿಡುಗಡೆ ಮಾಡಿದ ಸಂದರ್ಭದಲ್ಲಿ ತಿಳಿಸಿದೆ.

ರಾಷ್ಟ್ರ ರಾಜಧಾನಿ ದೆಹಲಿಯ ಸಾಮಾಜಿಕ-ಆರ್ಥಿಕ ನಿಯತಾಂಕಗಳ ಡೇಟಾ ಒಳಗೊಂಡ ಕೈಪಿಡಿಯನ್ನು ದೆಹಲಿ ಸರ್ಕಾರದ ಆರ್ಥಿಕ ಮತ್ತು ಅಂಕಿಅಂಶ ಇಲಾಖೆ ಬಿಡುಗಡೆ ಮಾಡಿದೆ. ಸರ್ಕಾರ ಇನ್ನೂ ಹೆಚ್ಚಿನ ಸಾಧನೆ ಮಾಡಬೇಕಿದೆ ಎಂದು ಕೇಜ್ರಿವಾಲ್ ಈ ಸಂದರ್ಭದಲ್ಲಿ ಹೇಳಿದ್ದಾರೆ.

ದೆಹಲಿ ದೇಶದಲ್ಲೇ ಅತಿ ಹೆಚ್ಚು ಕನಿಷ್ಠ ವೇತನ ಹೊಂದಿರುವ ರಾಜ್ಯವಾಗಿದೆ ಎಂದು ಸರ್ಕಾರ ಎತ್ತಿ ತೋರಿಸಿದೆ. ದೆಹಲಿಯಲ್ಲಿ ಕೌಶಲ್ಯರಹಿತರಿಗೆ 17,494 ರೂ., ಅರೆ ಕೌಶಲ್ಯ ಕಾರ್ಮಿಕರಿಗೆ 19,279 ರೂ., ಕುಶಲ ಕಾರ್ಮಿಕರಿಗೆ 21,215 ರೂ., ಕೌಶಲ್ಯರಹಿತ ಕಾರ್ಮಿಕರಿಗೆ 17,494 ರೂ. ಕನಿಷ್ಠ ಸಂಬಳ ಸಿಗುತ್ತಿದೆ ಎಂದು ಸರ್ಕಾರ ತಿಳಿಸಿದೆ. ಕೇಜ್ರಿವಾಲ್ ಸರ್ಕಾರದ ಮಾಸಿಕ 200 ಯುನಿಟ್​ ಉಚಿತ ವಿದ್ಯುತ್ ಯೋಜನೆಯಡಿ 2022-23ರಲ್ಲಿ ಶೂನ್ಯ ಬಿಲ್​ನ 3.41 ಕೋಟಿ ವಿದ್ಯುತ್ ಬಿಲ್​ಗಳು ಬಂದಿವೆ ಎಂದು ಕೈಪಿಡಿಯಲ್ಲಿ ಹೇಳಲಾಗಿದೆ.

ದೆಹಲಿಯಲ್ಲಿ ವಿದ್ಯುತ್ ಗ್ರಾಹಕರ ಸಂಖ್ಯೆ ಸುಮಾರು 2.8 ಲಕ್ಷ ಹೆಚ್ಚಾಗಿದೆ ಮತ್ತು 2022-23ರಲ್ಲಿ 1 ಲಕ್ಷಕ್ಕೂ ಹೆಚ್ಚು ಹೊಸ ನೀರಿನ ಸಂಪರ್ಕಗಳನ್ನು ನೀಡಲಾಗಿದೆ ಎಂದು ಸರ್ಕಾರ ಉಲ್ಲೇಖಿಸಿದೆ.

"ಇದು ಯಾವುದೇ ಒಂದು ವರ್ಷದಲ್ಲಿ ರಾಜ್ಯವೊಂದರ ತಲಾ ಆದಾಯದಲ್ಲಿ ಕಂಡು ಬಂದ ಭಾರಿ ಹೆಚ್ಚಳವಾಗಿದೆ. 2 ಕೋಟಿ ದೆಹಲಿ ನಿವಾಸಿಗಳು ಮತ್ತು ದೆಹಲಿ ಸರ್ಕಾರ ಹಗಲಿರುಳು ಒಟ್ಟಾಗಿ ಕಠಿಣ ಪರಿಶ್ರಮದಿಂದ ಕೆಲಸ ಮಾಡುವ ಮೂಲಕ ಇದನ್ನು ಸಾಧಿಸಲಾಗಿದೆ. ಕಳೆದ ಒಂಬತ್ತು ವರ್ಷಗಳಲ್ಲಿ ಅನೇಕ ಹೊಸ ಮತ್ತು ದೂರದೃಷ್ಟಿಯ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಆದರೆ ಇನ್ನೂ ಹೆಚ್ಚಿನದನ್ನು ಮಾಡಬೇಕಾಗಿದೆ. ನಾನು ಮಲಗುವ ಮೊದಲು ಬಹುದೊಡ್ಡ ಸಾಧನೆ ಮಾಡಬೇಕು!" ಎಂದು ಅವರು ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಹಲವಾರು ಅಡೆತಡೆಗಳ ಹೊರತಾಗಿಯೂ, ಕೇಜ್ರಿವಾಲ್ ಸರ್ಕಾರವು 2023 ರಲ್ಲಿ ಸಾರ್ವಜನಿಕ ಸೇವಾ ಕ್ಷೇತ್ರದಲ್ಲಿ ಹೊಸ ಮಾನದಂಡಗಳನ್ನು ಸ್ಥಾಪಿಸಿದೆ ಎಂದು ಯೋಜನಾ ಇಲಾಖೆ ಸಚಿವ ಅತಿಶಿ ಅಂಕಿಅಂಶಗಳ ಕೈಪಿಡಿ ಬಿಡುಗಡೆಯ ಸಂದರ್ಭದಲ್ಲಿ ಹೇಳಿದರು.

ಇದನ್ನೂ ಓದಿ: ಉತ್ತರ ಭಾರತದಲ್ಲಿ ಚಳಿ ತೀವ್ರ: ದೆಹಲಿಯಲ್ಲಿ ಐದು ದಿನ 5ನೇ ಕ್ಲಾಸ್​ವರೆಗೆ ಶಾಲೆಗೆ ರಜೆ