ಮಹಾರಾಷ್ಟ್ರ, ದೆಹಲಿಯಲ್ಲಿ ಮೀತಿ ಮೀರಿದ ಕೊರೊನಾ..ಒಂದೇ ದಿನ ದಾಖಲೆಯ ಕೋವಿಡ್​ ಕೇಸ್​ ಪತ್ತೆ!

ದೇಶದ ಕೆಲವೊಂದು ರಾಜ್ಯಗಳಲ್ಲಿ ಮಹಾಮಾರಿ ಕೊರೊನಾ ವೈರಸ್​ ಹಾವಳಿ ಹೆಚ್ಚಾಗಿದ್ದು, ದೆಹಲಿ, ಮಹಾರಾಷ್ಟ್ರ ಹಾಗೂ ಉತ್ತರ ಪ್ರದೇಶದಲ್ಲಿ ದಾಖಲೆಯ ಕೋವಿಡ್ ಪ್ರಕರಣ ದಾಖಲಾಗಿವೆ.

ಮುಂಬೈ/ನವದೆಹಲಿ:ರಾಷ್ಟ್ರ ರಾಜಧಾನಿ ದೆಹಲಿ ಹಾಗೂ ಮಹಾರಾಷ್ಟ್ರದಲ್ಲಿ ನಿತ್ಯ ಕೋವಿಡ್​ ಮೀತಿ ಮೀರುತ್ತಿದ್ದು, ಇದೀಗ ಈ ಹಿಂದಿಗಿಂತಲೂ ಅತಿ ಹೆಚ್ಚಿನ ಕೋವಿಡ್​ ಪ್ರಕರಣ ದಾಖಲಾಗಿವೆ.

ಕಳೆದ 24 ಗಂಟೆಯಲ್ಲಿ ದೆಹಲಿಯಲ್ಲಿ ದಾಖಲೆಯ 19,486 ಕೋವಿಡ್​ ಪ್ರಕರಣ ದಾಖಲಾಗಿದ್ದು 141 ಜನರು ಸಾವನ್ನಪ್ಪಿದ್ದಾರೆ. ಮಹಾರಾಷ್ಟ್ರದಲ್ಲಿ 63,729 ಸೋಂಕಿತರು ಪತ್ತೆಯಾಗಿದ್ದು, 398 ಜನರು ಸಾವನ್ನಪ್ಪಿದ್ದಾರೆ. ಮಹಾರಾಷ್ಟ್ರದ ನಾಗ್ಪುರ್​​ದಲ್ಲಿ 6,194 ಕೋವಿಡ್​ ಸೋಂಕಿತ ಪ್ರಕರಣಗಳು ದಾಖಲಾಗಿದ್ದು, 75 ಜನರು ಸಾವನ್ನಪ್ಪಿದ್ದಾರೆ. ಮಹಾರಾಷ್ಟ್ರದಲ್ಲಿ ಸದ್ಯ ದಾಖಲೆಯ 6,38,034 ಸಕ್ರಿಯ ಪ್ರಕರಣಗಳಿದ್ದು, ದೆಹಲಿಯಲ್ಲಿ 61,005 ಆ್ಯಕ್ಟಿವ್ ಕೇಸ್​ಗಳಿವೆ. ಮುಂಬೈನಲ್ಲಿ 8,839 ಪ್ರಕರಣ ದಾಖಲಾಗಿದ್ದರೆ, 53 ಸಾವು ಸಂಭವಿಸಿವೆ.

ಉಳಿದಂತೆ ಕರ್ನಾಟಕದಲ್ಲಿ 14,859 ಕೋವಿಡ್​ ಕೇಸ್​, ಉತ್ತರಾಖಂಡ್​ನಲ್ಲಿ 2402 ಪ್ರಕರಣ, ಚಂಡೀಗಢದಲ್ಲಿ 481 ಕೇಸ್​, ಆಂಧ್ರಪ್ರದೇಶದಲ್ಲಿ 6,096 ಪಾಸಿಟಿವ್​, 20 ಸಾವು, ರಾಜಸ್ಥಾನದಲ್ಲಿ 7,359 ಕೇಸ್​ ಹಾಗೂ 31 ಸಾವು, ಗುಜರಾತ್​​ನಲ್ಲಿ 8,920 ಕೋವಿಡ್​​ ಪಾಸಿಟಿವ್​ ಹಾಗೂ 94 ಸಾವು ದಾಖಲಾಗಿವೆ. ಉತ್ತರ ಪ್ರದೇಶದಲ್ಲೂ ಕಳೆದ 24 ಗಂಟೆಯಲ್ಲಿ ದಾಖಲೆಯ 27, 426 ಕೋವಿಡ್​ ಪ್ರಕರಣ ದಾಖಲಾಗಿದ್ದು, 103 ಜನರು ಸಾವನ್ನಪ್ಪಿದ್ದಾರೆ. ಇನ್ನು ಪಂಜಾಬ್​ನಲ್ಲಿ ಹೊಸದಾಗಿ 3,915 ಪ್ರಕರಣ, ಮಧ್ಯಪ್ರದೇಶದಲ್ಲಿ 11,045 ಕೇಸ್​ ಕಾಣಿಸಿಕೊಂಡಿವೆ.

ದೆಹಲಿಯಲ್ಲಿ ಈಗಾಗಲೇ ನೈಟ್​ ಕರ್ಫ್ಯೂ ಹೇರಲಾಗಿದ್ದು, ಮಹಾರಾಷ್ಟ್ರದಲ್ಲೂ ಸೆಕ್ಷನ್​ 144 ಜಾರಿಗೊಂಡಿದ್ದು, ಇದರ ಬೆನ್ನಲ್ಲೇ ಉತ್ತರ ಪ್ರದೇಶದಲ್ಲಿ ಕರ್ಫ್ಯೂ ಜತೆ ಭಾನುವಾರದ ಲಾಕ್​ಡೌನ್​ ಸಹ ಘೋಷಣೆ ಮಾಡಲಾಗಿದೆ. ಆದರೂ ಕೊರೊನಾ ಸೋಂಕಿತ ಪ್ರಕರಣಗಳ ಸಂಖ್ಯೆಯಲ್ಲಿ ಕಡಿಮೆಯಾಗದಿರುವುದು ಮತ್ತಷ್ಟು ಆತಂಕವನ್ನು ತಂದಿಟ್ಟಿದೆ.