ಸಂಸತ್​ ಅಧಿವೇಶನದ ವೇಳೆ ಮದ್ಯದ ಬಾಟಲಿ ಎತ್ತಿ ತೋರಿಸಿದ ಬಿಜೆಪಿ ಸಂಸದ.. ಕಾರಣ?

ದೆಹಲಿ ಸರ್ಕಾರದ ವಿರುದ್ಧ ನೇರ ವಾಗ್ದಾಳಿ ನಡೆಸಿರುವ ದೆಹಲಿ ಬಿಜೆಪಿ ಸಂಸದ ಪರ್ವೇಶ್​​ ಸಾಹಿಬ್​​​ ವರ್ಮಾ ಕೇಜ್ರಿವಾಲ್​​​, ಮದ್ಯ ಸೇವನೆಗೆ ಹೆಚ್ಚಿನ ಪ್ರೋತ್ಸಾಹ ನೀಡುತ್ತಿದೆ ಎಂದರು.

ನವದೆಹಲಿ:ನವೆಂಬರ್​​​ 29ರಿಂದ ಚಳಿಗಾಲದ ಸಂಸತ್​​ ಅಧಿವೇಶನ ಆರಂಭಗೊಂಡಿದ್ದು, ಅನೇಕ ವಿಚಾರಗಳಿಗೆ ಸಂಬಂಧಿಸಿದಂತೆ ವಾದ - ವಾಗ್ವಾದ ನಡೆಯುತ್ತಿವೆ. ಇದೇ ವೇಳೆ, ದೆಹಲಿಯ ಬಿಜೆಪಿ ಸಂಸದ ಪರ್ವೇಶ್​​ ಸಾಹಿಬ್​​​ ವರ್ಮಾ ಮದ್ಯದ ಬಾಟಲಿ ಎತ್ತಿ ತೋರಿಸಿದ್ದಾರೆ.

ಏನಿದು ಘಟನೆ!?

ಚಳಿಗಾಲದ ಅಧಿವೇಶನದಲ್ಲಿ ಮದ್ಯದ ಬಾಟಲಿ ಎತ್ತಿ ತೋರಿಸಿರುವ ಸಂಸದ ಪರ್ವೇಶ್​ ಸಾಹಿಬ್​​ ಸಿಂಗ್​ ವರ್ಮಾ, ದೆಹಲಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು. ಕೇಜ್ರಿವಾಲ್​​ ಸರ್ಕಾರ ಮದ್ಯ ಸೇವನೆಗೆ ಪ್ರೋತ್ಸಾಹ ನೀಡುತ್ತಿದೆ ಎಂಬ ಆರೋಪ ಮಾಡಿರುವ ಅವರು, ಕೋವಿಡ್​​ ಕಾಲದಲ್ಲಿ ದೆಹಲಿಯಲ್ಲಿ 25 ಸಾವಿರಕ್ಕೂ ಅಧಿಕ ಜನರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ. ಈ ವೇಳೆ, ದೆಹಲಿ ಸರ್ಕಾರ ಮದ್ಯದ ಬಳಕೆ ಹೆಚ್ಚಿಗೆ ಮಾಡುವ ಉದ್ದೇಶಕ್ಕಾಗಿ ಹೊಸ ಅಬಕಾರಿ ನೀತಿ ಜಾರಿಗೆ ತರಲು ನಿರತವಾಗಿತ್ತು ಎಂದರು.

ಕೋವಿಡ್ ಸಾಂಕ್ರಾಮಿಕ ವೇಳೆ ರಾಜಧಾನಿ ದೆಹಲಿಯಲ್ಲಿ 824 ಹೊಸ ಮದ್ಯದ ಅಂಗಡಿ ಒಪನ್ ಮಾಡಲಾಗಿದೆ. ಪ್ರಮುಖವಾಗಿ ಜನವಸತಿ ಪ್ರದೇಶದಲ್ಲಿ ಇವು ಓಪನ್​​ ಆಗಿದ್ದು, ಮಧ್ಯರಾತ್ರಿ 3 ಗಂಟೆಯವರೆಗೆ ತೆರೆಯಲು ಅನುಮತಿ ನೀಡಲಾಗಿದೆ ಎಂದರು. ಮಧ್ಯರಾತ್ರಿ 3 ಗಂಟೆಯವರೆಗೆ ಮಹಿಳೆಯರು ಬಾರ್​​ಗಳಲ್ಲಿ ಕುಳಿತುಕೊಂಡು ಕುಡಿದರೆ ಅವರಿಗೆ ರಿಯಾಯತಿ ನೀಡಲಾಗುತ್ತಿದೆ ಎಂದಿರುವ ಅವರು, ಮದ್ಯ ಸೇವನೆ ವಯಸ್ಸಿನ ಮಿತಿ 25ರಿಂದ 21ಕ್ಕೆ ಇಳಿಕೆ ಮಾಡಲಾಗಿದೆ ಎಂದರು.

ಪ್ರಚಾರಕ್ಕಾಗಿ ಹೆಚ್ಚಿನ ಆದಾಯ ಗಳಿಕೆ ಮಾಡುವ ಉದ್ದೇಶವನ್ನ ಕೇಜ್ರಿವಾಲ್​ ಹೊಂದಿದ್ದು, 2022ರ ಪಂಜಾಬ್​​ ವಿಧಾನಸಭೆ ಚುನಾವಣೆ ಪ್ರಚಾರಕ್ಕಾಗಿ ಈ ರೀತಿಯಾಗಿ ನಡೆದುಕೊಳ್ಳುತ್ತಿದ್ದಾರೆ ಎಂದರು.