ನವದೆಹಲಿ :ದೆಹಲಿಯ ಸಬ್ಜಿ ಮಂಡಿ ಪ್ರದೇಶದಲ್ಲಿರುವ 100 ವರ್ಷಗಳಷ್ಟು ಹಳೆಯದಾದ ರೋಶನಾರಾ ಕ್ಲಬ್‌ಗೆ ದೆಹಲಿ ಅಭಿವೃದ್ಧಿ ಪ್ರಾಧಿಕಾರ (ಡಿಡಿಎ) ಶುಕ್ರವಾರ ಬೆಳ್ಳಂ ಬೆಳಗ್ಗೆಯೇ ಸೀಲಿಂಗ್ ಮಾಡಿದೆ. 1922 ರಲ್ಲಿ ಬ್ರಿಟಿಷರು ನಿರ್ಮಿಸಿರುವ ಕ್ಲಬ್ ಇದಾಗಿದ್ದು, ಗುತ್ತಿಗೆ ಮುಗಿದ ನಂತರ ನ್ಯಾಯಾಲಯವು ಕ್ಲಬ್ ಸೀಲ್ ಮಾಡಲು ಡಿಡಿಎ ಗೆ ಆದೇಶಿಸಿದೆ ಎಂದು ಹೇಳಲಾಗುತ್ತಿದೆ. ಕ್ಲಬ್ ಬಳಿ ಪದಾಧಿಕಾರಿಗಳು ಮತ್ತು ಉದ್ಯೋಗಿಗಳು ಆಗಮಿಸಿದ್ದು, ದೆಹಲಿ ಪೊಲೀಸರು ಮತ್ತು ಸಿಆರ್‌ಪಿಎಫ್ ಸಿಬ್ಬಂದಿ ಯಾರನ್ನೂ ಒಳಗೆ ಹೋಗಲು ಬಿಟ್ಟಿಲ್ಲ.
ರೋಶನಾರಾ ಕ್ಲಬ್ನ ಇತಿಹಾಸವು ಸಾಕಷ್ಟು ಸ್ಮರಣೀಯವಾಗಿದೆ. 1928 ರಲ್ಲಿ ಭಾರತದ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಅನ್ನು ಈ ಕ್ಲಬ್‌ನಲ್ಲಿಯೇ ಒಂದು ಸೊಸೈಟಿಯಾಗಿ ಸ್ಥಾಪಿಸಲಾಗಿತ್ತು. ಬಳಿಕ 1931 ರಲ್ಲಿ ನಡೆದ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯ ಇದೇ ಕ್ಲಬ್ನ ಮೈದಾನದಲ್ಲಿ ನಡೆದಿತ್ತು ಎಂಬುದು ಗಮನಾರ್ಹ ವಿಚಾರ. ಅಷ್ಟೇ ಅಲ್ಲದೆ, ಆನೇಕ ರಣಜಿ ಪಂದ್ಯಗಳನ್ನೂ ಈ ಕ್ಲಬ್ನ ಮೈದಾನದಲ್ಲೇ ಆಯೋಜಿಸಲಾಗಿತ್ತು.
ಸುಮಾರು 23.25 ಎಕರೆ ಪ್ರದೇಶದಲ್ಲಿ ತನ್ನ ವಿಸ್ತಾರವನ್ನು ಹೊಂದಿರುವ ಈ ಕ್ಲಬ್ ಅನ್ನು ದೆಹಲಿ ಕ್ರಿಕೆಟ್‌ಗೆ ಒಂದು ಶ್ರೇಷ್ಠ ಮೈಲಿಗಲ್ಲು ಎಂದು ಕರೆಯಲಾಗುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ಈ ಕ್ಲಬ್ ಅನ್ನು ಸೀಲಿಂಗ್ ಮಾಡಲಾಗಿದೆ. ಹೀಗೆ ಮಾಡಿರುವುದರಿಂದ ಕ್ರಿಕೆಟ್‌ಗೆ ದೊಡ್ಡ ಹೊಡೆತ ಬಿದ್ದಂತಾಗಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಈ ಕ್ಲಬ್‌ನೊಂದಿಗೆ ಅನೇಕ ನೆನಪುಗಳು ಇದ್ದು, ಅನೇಕ ಸ್ಮರಣೀಯ ದೇಶೀಯ ಪಂದ್ಯಗಳನ್ನು ಈ ಕ್ಲಬ್ನ ಮೈದಾನದಲ್ಲಿ ಆಡಲಾಗಿದೆ. ಕ್ಲಬ್ನ ಮುಚ್ಚುವಿಕೆಯು ಇಲ್ಲಿ ಕಾರ್ಯನಿರ್ವಹಿಸುತ್ತಿರುವ 450 ಉದ್ಯೋಗಿಗಳ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತಿದೆ. ಅವರು ಜೀವನೋಪಾಯದ ಬಿಕ್ಕಟ್ಟನ್ನು ಎದುರಿಸುತ್ತಿದ್ದು, ಇನ್ನೊಂದೆಡೆ ಕ್ರಿಕೆಟ್‌ಗೆ ಕರಾಳ ದಿನ ಎಂದು ಕ್ಲಬ್ನ ಪದಾಧಿಕಾರಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ.
ನ್ಯಾಯಾಲಯದ ತಡೆಯಾಜ್ಞೆ ಇದ್ದರೂ ಸೀಲ್ : ರೋಶನಾರಾ ಕ್ಲಬ್ನ ಪ್ರಧಾನ ಕಾರ್ಯದರ್ಶಿ ರಾಜಣ್ಣ ಮಂಚಂದ ಮಾತನಾಡಿ, ಅಕ್ಟೋಬರ್ 6 ರವರೆಗೆ ಹೈಕೋರ್ಟ್ ತಡೆಯಾಜ್ಞೆ ವಿಧಿಸಿದೆ. ಆದರೂ ಶುಕ್ರವಾರ ಬೆಳಗ್ಗೆ ಇದ್ದಕ್ಕಿದ್ದಂತೆ ಹೆಚ್ಚಿನ ಸಂಖ್ಯೆಯ ಡಿಡಿಎ ಅಧಿಕಾರಿಗಳು ಬಂದು ಕ್ಲಬ್ ಸೀಲ್ ಮಾಡಿದ್ದಾರೆ. ಇದೀಗ ಕ್ಲಬ್ನ ಪದಾಧಿಕಾರಿಗಳು ಈ ಕುರಿತು ಹೈಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಲಿದ್ದಾರೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ :ಅರುಣಾಚಲ ಪ್ರದೇಶ ಆಟಗಾರರಿಗೆ ಏಷ್ಯನ್ ಗೇಮ್ಸ್ನಲ್ಲಿ ಭಾಗವಹಿಸಲು ಚೀನಾ ತಕರಾರು.. ರಾಜಕೀಯ, ಕ್ರೀಡೆ ಪ್ರತ್ಯೇಕವಾಗಿಡಬೇಕು ಎಂದ ಒಸಿಎ ಹಂಗಾಮಿ ಅಧ್ಯಕ್ಷ
