ತೌಕ್ತೆ ಅಬ್ಬರದಲ್ಲಿ ಸಿಲುಕಿದ ಬೋಟ್​ಗಳು​: ಮುಂಬೈನಲ್ಲಿ 146 ಮಂದಿಯ ರಕ್ಷಿಸಿದ ನೌಕಾಪಡೆ

410 ಜನರಿದ್ದ ಮಾನವ-ಸರಕು ಸಾಗಣೆಯ ಎರಡು ಬೋಟ್​ಗಳು ಕೊಚ್ಚಿ ಹೋಗಿದ್ದು, ಅದರಲ್ಲಿದ್ದ 146 ಮಂದಿಯನ್ನು ಭಾರತೀಯ ನೌಕಾಪಡೆ ರಕ್ಷಿಸಿದೆ.

ಮುಂಬೈ:ತೌಕ್ತೆ ಚಂಡಮಾರುತದ ಆರ್ಭಟದಿಂದಾಗಿ ಮುಂಬೈ ತಟದ ಅರಬ್ಬಿ ಸಮುದ್ರದಲ್ಲಿ ಬೋಟ್​ಗಳು ಕೊಚ್ಚಿ ಹೋಗಿದ್ದು, ಹರಸಾಹಸ ಮಾಡಿ ಅದರಲ್ಲಿದ್ದ 146 ಮಂದಿಯನ್ನು ಭಾರತೀಯ ನೌಕಾಪಡೆ ರಕ್ಷಿಸಿದೆ.

ನಿನ್ನೆ ಮುಂಬೈ ಕರಾವಳಿ ಹಾದು ಗುಜರಾತ್​ಗೆ ಸೈಕ್ಲೋನ್​ ಅಪ್ಪಳಿಸುವ ವೇಳೆ ಒಟ್ಟು 410 ಜನರಿದ್ದ ಮಾನವ-ಸರಕು ಸಾಗಣೆಯ ಎರಡು ಬೋಟ್​ಗಳು ಕೊಚ್ಚಿ ಹೋಗಿತ್ತು. ಸಮುದ್ರದಲ್ಲಿ ಸಿಲುಕಿದ್ದವರನ್ನು ರಕ್ಷಿಸಲು ನೌಕಾಪಡೆಯು ತನ್ನ ಮೂರು ಯುದ್ಧನೌಕೆಗಳನ್ನು ನಿಯೋಜಿಸಿತ್ತು.

ಇದನ್ನೂ ಓದಿ: ಉಡುಪಿ: 40 ಗಂಟೆಯಿಂದ ಸಮುದ್ರದಲ್ಲಿ ಸಿಲುಕಿದ್ದ 9 ಮಂದಿಯ ರಕ್ಷಣೆ

ರಾತ್ರಿಯಿಡೀ ಬಲವಾದ ಗಾಳಿ-ಮಳೆ, ಸಮುದ್ರದ ಅಲೆಗಳ ತೀವ್ರ ಏರಿಳಿತದೊಂದಿಗೆ ಕಾರ್ಯಾಚರಣೆ ನಡೆಸಿದ ನೌಕಾಪಡೆ ಸಿಬ್ಬಂದಿ P305 ಬೋಟ್​ನಲ್ಲಿದ್ದ 273 ಜನರ ಪೈಕಿ 132 ಮಂದಿ ಹಾಗೂ ಗಾಲ್​ ಕನ್​ಸ್ಟ್ರಕ್ಟರ್​ ಎಂಬ ಬೋಟ್​ನಲ್ಲಿದ್ದ 137 ಜನರ ಪೈಕಿ 14 ಮಂದಿ ಸೇರಿ ಒಟ್ಟು 146 ಜನರನ್ನು ರಕ್ಷಿಸಿದ್ದಾರೆ. ಉಳಿದವರಿಗಾಗಿ ಕಾರ್ಯಾಚರಣೆ ಮುಂದುವರೆದಿದೆ ಎಂದು ನೌಕಾಪಡೆ ಅಧಿಕಾರಿಗಳು ತಿಳಿಸಿದ್ದಾರೆ.