ಅನಂತಪುರ (ಆಂಧ್ರಪ್ರದೇಶ) : ಭೂ ವಿವಾದಕ್ಕೆ ಶುರುವಾದ ಜಗಳ ಅವಳಿ ಕೊಲೆಗಳಲ್ಲಿ ಅಂತ್ಯವಾಗಿದೆ. ಜಿಲ್ಲೆಯ ಯಲ್ಲಾನೂರು ಮಂಡಲದ ಆರವೇಡು ಗ್ರಾಮದಲ್ಲಿ ಸಹೋದರರಾದ ನಾರಾಯಣಪ್ಪ ಮತ್ತು ರಾಜಗೋಪಾಲ್ ಅವರನ್ನು ದುಷ್ಕರ್ಮಿಗಳು ಕಲ್ಲು ಎತ್ತಿಹಾಕಿ ಹತ್ಯೆಗೈದಿದ್ದಾರೆ.
ಭೂ ವಿವಾದಕ್ಕೆ ಅವಳಿ ಹತ್ಯೆ..?
ತನ್ನ ತಂದೆಯಿಂದ ಬಳುವಳಿಯಾಗಿ ಬಂದ ಭೂಮಿಯಲ್ಲಿ ನಾರಾಯಣಪ್ಪ ಉಳುಮೆ ಮಾಡುತ್ತಿದ್ದ. ಆ ಜಮೀನಲ್ಲಿ ನಾಲ್ಕು ತಿಂಗಳ ಹಿಂದೆ ಅದೇ ಊರಿನ ನಾಗೇಶ್ ಬೋರ್ವೆಲ್ ಕೊರೆಸಿದ ಎನ್ನಲಾಗ್ತಿದೆ. ಇದರಿಂದಾಗಿ ನಾರಾಯಣಪ್ಪ ಮತ್ತು ನಾಗೇಶ್ ಕುಟುಂಬಗಳ ಮಧ್ಯೆ ವೈಷಮ್ಯ ಉಂಟಾಗಿತ್ತು. ಈ ಸಂಬಂಧ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಇಬ್ಬರಿಗೂ ಎಚ್ಚರಿಕೆ ನೀಡಿದ್ದರು. ನಿನ್ನೆ ರಾತ್ರಿ ಬೈಕ್ನಲ್ಲಿ ಮನೆಗೆ ಬರುತ್ತಿದ್ದಾಗ ವಿರೋಧಿ ಬಣ ಸಹೋದರರಿಬ್ಬರನ್ನು ಹತ್ಯೆಗೈಯ್ದಿದೆ ಎಂಬ ಆರೋಪ ಕೇಳಿಬಂದಿದೆ. ಸ್ಥಳಕ್ಕೆ ಶಾಸಕ ಪೆಡ್ಡಿರೆಡ್ಡಿ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.