ಕೋವಿಡ್​ ಚಿಕಿತ್ಸೆ; ಆ್ಯಂಟಿಬಾಡಿ ಕಾಕ್​ಟೇಲ್​ ಲಾಂಚ್, ಬೆಲೆ 59,750 ರೂ.

"ಆ್ಯಂಟಿಬಾಡಿ ಕಾಕ್​ಟೇಲ್ ಔಷಧಿಯ ಮೊದಲ ಬ್ಯಾಚ್ ಈಗ ಭಾರತದಲ್ಲಿ ಲಭ್ಯವಿದೆ. ಎರಡನೇ ಬ್ಯಾಚ್ ಜೂನ್ ಮಧ್ಯದ ವೇಳೆಗೆ ಬರಲಿದೆ. ಪ್ರತಿ ಬ್ಯಾಚಿನಲ್ಲಿ ಒಂದು ಲಕ್ಷ ಡೋಸ್​ಗಳನ್ನು ಹೊಂದಿರುತ್ತದೆ. ಅಂದರೆ ಎರಡು ಬ್ಯಾಚಿನಿಂದ ಎರಡು ಲಕ್ಷ ರೋಗಿಗಳಿಗೆ ಚಿಕಿತ್ಸೆಯ ಲಾಭ ಸಿಗಲಿದೆ." ಎಂದು ಕಂಪನಿ ತಿಳಿಸಿದೆ.

ನವದೆಹಲಿ:ಕೋವಿಡ್​-19 ಗುಣಪಡಿಸುವ ಆ್ಯಂಟಿಬಾಡಿ ಕಾಕ್​ಟೇಲ್​ ಔಷಧಿಯ ಪ್ರಥಮ ಬ್ಯಾಚನ್ನು ಇಂದು ಭಾರತದಲ್ಲಿ ಬಿಡುಗಡೆಗೊಳಿಸಿರುವುದಾಗಿ ಜಾಗತಿಕ ಫಾರ್ಮಾ ಕಂಪನಿ ರೋಶ್ ಇಂಡಿಯಾ ಇಂದು ಘೋಷಿಸಿದೆ. ಕ್ಯಾಸಿರಿವಿಮ್ಯಾಬ್ ಹಾಗೂ ಇಮ್ಡೆವಿಮ್ಯಾಬ್ ಈ ಎರಡು ಔಷಧಿಗಳ ಕಾಕ್​ಟೇಲ್​ ಆಗಿರುವ ಈ ಆ್ಯಂಟಿಬಾಡಿ ಔಷಧಿಯ ಒಂದು ಡೋಸ್ ಬೆಲೆ ಭಾರತದಲ್ಲಿ ಪ್ರಸ್ತುತ 59,750 ರೂಪಾಯಿಗಳಾಗಿದೆ.

ಕಳೆದ ವರ್ಷ ಆಗಿನ ಅಮೆರಿಕ ಅಧ್ಯಕ್ಷರಾಗಿದ್ದ ಡೊನಾಲ್ಡ್​ ಟ್ರಂಪ್ ಅವರಿಗೆ ಕೊರೊನಾ ಸೋಂಕು ತಗುಲಿದಾಗ ಇದೇ ಆ್ಯಂಟಿಬಾಡಿ ಔಷಧಿ ನೀಡುವ ಮೂಲಕ ಅವರನ್ನು ಗುಣಪಡಿಸಲಾಗಿತ್ತು.

"ಈ ಔಷಧಿಯ 1200 ಎಂಜಿ ಯ ಪ್ರತಿಯೊಂದು ಡೋಸ್​ 600 ಎಂಜಿ ಕ್ಯಾಸಿರಿವಿಮ್ಯಾಬ್ ಮತ್ತು 600 ಎಂಜಿ ಇಮ್ಡೆವಿಮ್ಯಾಬ್​ಗಳನ್ನು ಒಳಗೊಂಡಿದೆ. ಪ್ರತಿ ಡೋಸ್​ ಬೆಲೆ 59,750 ರೂಪಾಯಿಗಳಾಗಿದ್ದು, ಎರಡು ಡೋಸಿನ ಪ್ಯಾಕೆಟ್​ ಬೆಲೆ 1,19,500 ರೂಪಾಯಿಗಳಾಗಿದೆ. ಪ್ರತಿ ಪ್ಯಾಕ್​ನಿಂದ ಇಬ್ಬರು ರೋಗಿಗಳಿಗೆ ಔಷಧ ನೀಡಬಹುದು." ಎಂದು ಕಂಪನಿಯ ಪ್ರಕಟಣೆ ತಿಳಿಸಿದೆ.

ಭಾರತದಲ್ಲಿ ಸಿಪ್ಲಾ ಕಂಪನಿಯು ಈ ಔಷಧಿಯಲ್ಲಿ ಮಾರುಕಟ್ಟೆಯಲ್ಲಿ ಮಾರಲಿದ್ದು, ಔಷಧಿಯ ಎರಡನೇ ಬ್ಯಾಚ್ ಜೂನ್​ ಮಧ್ಯದ ವೇಳೆಗೆ ಲಭ್ಯವಾಗಲಿದೆ.

"ಆ್ಯಂಟಿಬಾಡಿ ಕಾಕ್​ಟೇಲ್ ಔಷಧಿಯ ಮೊದಲ ಬ್ಯಾಚ್ ಈಗ ಭಾರತದಲ್ಲಿ ಲಭ್ಯವಿದೆ. ಎರಡನೇ ಬ್ಯಾಚ್ ಜೂನ್ ಮಧ್ಯದ ವೇಳೆಗೆ ಬರಲಿದೆ. ಪ್ರತಿ ಬ್ಯಾಚಿನಲ್ಲಿ ಒಂದು ಲಕ್ಷ ಡೋಸ್​ಗಳನ್ನು ಹೊಂದಿರುತ್ತದೆ. ಅಂದರೆ ಎರಡು ಬ್ಯಾಚಿನಿಂದ ಎರಡು ಲಕ್ಷ ರೋಗಿಗಳಿಗೆ ಚಿಕಿತ್ಸೆಯ ಲಾಭ ಸಿಗಲಿದೆ." ಎಂದು ಕಂಪನಿ ತಿಳಿಸಿದೆ.

ಔಷಧಿಯು ಪ್ರಖ್ಯಾತ ಆಸ್ಪತ್ರೆಗಳು ಹಾಗೂ ಕೋವಿಡ್ ಕೇರ್ ಸೆಂಟರ್​ಗಳ ಮೂಲಕ ಲಭ್ಯವಾಗಲಿದೆ.

ಕೇಂದ್ರೀಯ ಔಷಧಿಗಳ ಗುಣಮಟ್ಟ ನಿಯಂತ್ರಣ ಪ್ರಾಧಿಕಾರವು (The Central Drugs Standards Control Organisation -CDSCO) ಭಾರತದಲ್ಲಿ ಈ ಔಷಧಿಯ ತುರ್ತು ಬಳಕೆಗೆ ಅನುಮತಿ ನೀಡಿದೆ.

ವಯಸ್ಕರು ಮತ್ತು ಮಕ್ಕಳ ರೋಗಿಗಳಲ್ಲಿ (12 ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸಿನವರು, ಕನಿಷ್ಠ 40 ಕೆಜಿ ತೂಕವಿರುವ) ಸೌಮ್ಯ ಮತ್ತು ಮಧ್ಯಮ COVID-19 ಚಿಕಿತ್ಸೆಗಾಗಿ ಪ್ರತಿಕಾಯ ಕಾಕ್​ಟೇಲ್​ ಅನ್ನು ಬಳಸಲಾಗುತ್ತದೆ. ಸೋಂಕಿನ ಆರಂಭದಲ್ಲಿ ಈ ಔಷಧಿಯ ಬಳಕೆಯಿಂದ, ರೋಗಿಯು ಆಸ್ಪತ್ರೆಗೆ ದಾಖಲಾಗುವ ಮತ್ತು ಮಾರಣಾಂತಿಕ ಅಪಾಯವು ಶೇಕಡಾ 70 ರಷ್ಟು ಕಡಿಮೆಯಾಗುತ್ತದೆ.