ಎಚ್ಚರ..! ಸಮುದಾಯಕ್ಕೆ ಹರಡಿದೆ ಕೋವಿಡ್​​ ರೂಪಾಂತರಿ ಒಮಿಕ್ರಾನ್ : ಅಧ್ಯಯನದಿಂದ ಬಹಿರಂಗ

Omicron variants community transmission : ಕೋವಿಡ್ ರೂಪಾಂತರಿ ವೈರಸ್​ ಒಮಿಕ್ರಾನ್​ ಸಮುದಾಯಕ್ಕೆ ಹಬ್ಬಿದೆ ಎಂಬ ಸಂಗತಿ ಇದೀಗ ಅಧ್ಯಯನವೊಂದರಿಂದ ತಿಳಿದು ಬಂದಿದೆ. ಇದೇ ಕಾರಣಕ್ಕಾಗಿ ಹೆಚ್ಚಿನ ಸೋಂಕಿತ ಪ್ರಕರಣ ಕಾಣಿಸಿಕೊಳ್ಳುತ್ತಿವೆ..

ನವದೆಹಲಿ :ಕಳೆದ ಕೆಲ ವಾರಗಳಿಂದ ಭಾರತದಲ್ಲಿ ಕೋವಿಡ್ ರೂಪಾಂತರಿ ಒಮಿಕ್ರಾನ್ ಹಾವಳಿ ಜೋರಾಗಿದೆ. ದಿನದಿಂದ ದಿನಕ್ಕೆ ಅತಿ ಹೆಚ್ಚಿನ ಸೋಂಕಿತ ಪ್ರಕರಣ ದಾಖಲಾಗುತ್ತಿವೆ. ಇದಕ್ಕೆ ಸಂಬಂಧಿಸಿದಂತೆ ನಡೆದಿರುವ ಅಧ್ಯಯನದಿಂದ ಮತ್ತೊಂದು ಆಘಾತಕಾರಿ ವಿಷಯ ಬಹಿರಂಗಗೊಂಡಿದೆ.

ಕ್ಲಿನಿಕಲ್​ ವೈರಾಲಜಿ, ಲಿವರ್​​ ಮತ್ತು ಅಂಡ್ ಬಿಲಿಯರಿ ಸೈನ್ಸಸ್ ವಿಭಾಗ ನವದೆಹಲಿ ನಡೆಸಿರುವ ಅಧ್ಯಯನದಿಂದ ಹೊಸ ರೂಪಾಂತರ ಇದೀಗ ಸಮುದಾಯಕ್ಕೆ ಹರಡಿದೆ ಎಂಬ ಮಾಹಿತಿ ತಿಳಿದು ಬಂದಿದೆ.

ಕಳೆದ ವರ್ಷ ಡಿಸೆಂಬರ್ ಕೊನೆಯ ವಾರದಲ್ಲಿ ಕೋವಿಡ್​ನ ರೂಪಾಂತರಿ ಒಮಿಕ್ರಾನ್​ ಸೋಂಕು ಕಾಣಿಸಿರುವ ರೋಗಿಗಳಲ್ಲಿ ಹೆಚ್ಚಿನವರು ಟ್ರಾವೆಲ್​ ಹಿಸ್ಟರಿ ಹೊಂದಿಲ್ಲ. ಆದರೂ ಅವರಲ್ಲಿ ಸೋಂಕು ಕಾಣಿಸಿದೆ ಎಂದು ಅಧ್ಯಯನದಿಂದ ತಿಳಿದು ಬಂದಿದೆ. ಇದು ಸಮುದಾಯಕ್ಕೆ ಹಬ್ಬಿದೆ ಎಂಬುದನ್ನ ಸೂಚಿಸುತ್ತದೆ ಎಂದು ತಿಳಿಸಿದೆ.

2021ರ ನವೆಂಬರ್​ 25ರಿಂದ ಡಿಸೆಂಬರ್​​ 23ರ ನಡುವೆ ದೆಹಲಿಯ ಐದು ಜಿಲ್ಲೆಗಳಿಂದ ಸಂಗ್ರಹಿಸಿರುವ ಜೀನೋಮ್​ ಸೀಕ್ವೆನ್ಸಿಂಗ್​​ನ ವರದಿ ಕೂಡ ದಾಖಲಾಗಿದೆ. ಕೋವಿಡ್​ ಸೋಂಕಿಗೊಳಗಾಗಿರುವ ಶೇ. 60.9ರಷ್ಟು ಜನರಲ್ಲಿ ಸಮುದಾಯಕ್ಕೆ ಹರಡುವಿಕೆ ಕಂಡು ಬಂದಿದೆ ಎನ್ನಲಾಗಿದೆ.

ಅಧ್ಯಯನದ 264 ಪ್ರಕರಣಗಳಲ್ಲಿ ಶೇ. 68.9ರಷ್ಟು ಡೆಲ್ಟಾ ರೂಪಾಂತರ, ಶೇ. 31.06ರಷ್ಟು ಒಮಿಕ್ರಾನ್​ ರೂಪಾಂತರ ಎಂದು ಗುರುತಿಸಲಾಗಿದೆ. ಪ್ರಮುಖವಾಗಿ ಹೆಚ್ಚಿನ ಒಮಿಕ್ರಾನ್​​ ಪ್ರಕರಣಗಳು ಸೋಂಕು ರಹಿತವಾಗಿವೆ. ಯಾವುದೇ ಸೋಂಕಿತ ವ್ಯಕ್ತಿ ಕೂಡ ಆಸ್ಪತ್ರೆಗೆ ದಾಖಲಾಗಿಲ್ಲ ಎಂದಿದೆ.

ಅಧ್ಯಯನಕ್ಕೊಳಪಟ್ಟಿರುವ ಶೇ.72ರಷ್ಟು ಪ್ರಕರಣಗಳಲ್ಲಿ ಸಂಪೂರ್ಣವಾಗಿ ಲಸಿಕೆ ನೀಡಲಾಗಿದೆ. ಶೇ.39.1ರಷ್ಟು ಪ್ರಯಾಣ ಮತ್ತು ಇತರೆ ಸಂಪರ್ಕಿತರೊಂದಿಗೆ ಕಾಂಟ್ಯಾಕ್ಟ್​ ಹೊಂದಿದ್ದಾರೆ. ಆದರೆ, ಶೇ. 60.9ರಷ್ಟು ಜನರಿಗೆ ಸಮುದಾಯದಿಂದ ಸೋಂಕು ಹರಡಿರುವುದು ಕಂಡು ಬಂದಿದೆ. ಒಮಿಕ್ರಾನ್​​ ಪ್ರಕರಣ ಪ್ರತಿದಿನ ಏರಿಕೆಯಾಗಲು ಇದೇ ಕಾರಣ ಎಂದು ತಿಳಿಸಿದೆ.

ಅಧ್ಯಯನದ ಪ್ರಕಾರ ಸೋಂಕಿತ ಪ್ರಕರಣಗಳಲ್ಲಿ ಗಣನೀಯವಾದ ಏರಿಕೆ ಕಂಡು ಬಂದಿದ್ದರೂ, ಆಸ್ಪತ್ರೆಗೆ ದಾಖಲಾಗುವವರ ಸಂಖ್ಯೆಯಲ್ಲಿ ಇಳಿಕೆ ಇದೆ ಎಂದು ಅಧ್ಯಯನದಲ್ಲಿ ತಿಳಿಸಲಾಗಿದೆ. ಒಮಿಕ್ರಾನ್ ಹರಡುವಿಕೆ ಬಗ್ಗೆ ಭಾರತದಿಂದ ನಡೆದಿರುವ ಮೊದಲ ಅಧ್ಯಯನ ಇದಾಗಿದೆ.