ಕೃಷಿ ಕಾಯ್ದೆ ತಿದ್ದುಪಡಿ: ರೈತರ ಬೆಂಬಲಕ್ಕಾಗಿ ಪ್ರತಿಭಟನೆ ಸ್ಥಳದಲ್ಲೇ ಮದುವೆಯಾದ ಜೋಡಿ!

ಕೇಂದ್ರದ ಕೃಷಿ ಕಾನೂನುಗಳ ವಿರುದ್ಧ ನಡೆಯುತ್ತಿರುವ ಹೋರಾಟದ ಹಿನ್ನೆಲೆ ರೈತರ ಬೆಂಬಲಕ್ಕಾಗಿ ಇಲ್ಲೊಂದು ಜೋಡಿ ಪ್ರತಿಭಟನಾ ಸ್ಥಳದಲ್ಲೇ ಸಾಂಸಾರಿಕ ಜೀವನಕ್ಕೆ ಕಾಲಿಟ್ಟ ಘಟನೆ ಮಧ್ಯಪ್ರದೇಶದ ರೇವಾದಲ್ಲಿ ನಡೆದಿದೆ.

ರೇವಾ( ಮಧ್ಯಪ್ರದೇಶ):ಕೇಂದ್ರದ ಕೃಷಿ ಕಾನೂನುಗಳ ವಿರುದ್ಧ ರೈತರ ಪ್ರತಿಭಟನೆ ಸಾಗುತ್ತಲೇ ಇದೆ. ರೈತರ ಬೆಂಬಲಕ್ಕೆ ಸಾಕಷ್ಟು ಜನ ನಿಂತಿದ್ದಾರೆ. ಇಲ್ಲೊಂದು ಜೋಡಿ ರೈತರ ಪ್ರತಿಭಟನೆ ನಡೆಯುವ ಸ್ಥಳದಲ್ಲೇ ಮದುವೆ ಮಾಡಿಕೊಂಡು ಗಮನ ಸೆಳೆದಿದೆ.

ಮಾರ್ಚ್​ 18 ರಂದು ರೈತ ನಾಯಕ ರಾಮ್​ಜಿತ್​ ಸಿಂಗ್​ ತನ್ನ ಮಗ ಸಚಿನ್​ ಸಿಂಗ್​ ಮದುವೆಯನ್ನು ಆಸ್ಮಾ ಸಿಂಗ್ ಜೊತೆ ಪ್ರತಿಭಟನಾ ಸ್ಥಳದಲ್ಲೇ ನಡೆಸಿದರು. ಇನ್ನು ಮದುವೆ ವೇಳೆ ಅಗ್ನಿಕುಂಡ ಸ್ಥಳದಲ್ಲಿ ಸಂವಿಧಾನ ರಚಿತ ಡಾ.ಬಿ.ಆರ್​ ಅಂಬೇಡ್ಕರ್​ ಮತ್ತು ಸಾವಿತ್ರಿ ಬಾ ಪುಲೆ ಫೋಟೋಗಳನ್ನಿಟ್ಟು ಅದರ ಸುತ್ತ ಏಳು ಹೆಜ್ಜೆ ಹಾಕು ಮೂಲಕ ಸಚಿನ್​ ಸಿಂಗ್​ ಮತ್ತು ಆಸ್ಮಾ ಸಿಂಗ್​ ಸಾಂಸರಿಕ ಜೀವನಕ್ಕೆ ಕಾಲಿಟ್ಟರು.

ಜನವರಿ 3 ರಿಂದ ರೈತರ ಪ್ರತಿಭಟನೆ ನಡೆಯುತ್ತಿದೆ. ರೈತರ ಹಿತ ಕಾಯದ ಮೂರು ಹೊಸ ಕೃಷಿ ಕಾನೂನುಗಳನ್ನು ರದ್ದುಗೊಳಿಸುವಂತೆ ಅನ್ನಾದಾತರು ಪ್ರತಿಭಟನೆ ಮೂಲಕ ಒತ್ತಾಯಿಸುತ್ತಿದ್ದಾರೆ. ಆದ್ರೆ ಸರ್ಕಾರ ಕ್ಯಾರೇ ಎನ್ನುತ್ತಿಲ್ಲ. ರೈತರು ಪ್ರತಿಯೊಂದು ಕಾರ್ಯವನ್ನು ಈ ಸ್ಥಳದಲ್ಲಿ ಆಯೋಜಿಸುತ್ತಾರೆ. ಜನ್ಮದಿನಗಳನ್ನು ಸಹ ಇಲ್ಲಿ ಆಚರಿಸಲಾಗುತ್ತದೆ. ಈ ಕಾನೂನುಗಳನ್ನು ರದ್ದುಗೊಳಿಸುವವರೆಗೂ ನಾವು ಬಿಡುವುದಿಲ್ಲ ಎಂದು ವರ ಸಚಿನ್ ಸಿಂಗ್ ಹೇಳಿದರು.

ಕೃಷಿ ಕಾನೂನುಗಳನ್ನು ರದ್ದುಗೊಳಿಸುವವರೆಗೂ ನಾವು ಈ ಸ್ಥಳವನ್ನು ತೊರೆಯುವುದಿಲ್ಲ. ಈ ಮದುವೆ ಮೂಲಕ ಸರ್ಕಾರಕ್ಕೆ ಬಲವಾದ ಸಂದೇಶವನ್ನು ನೀಡಲು ಬಯಸಿದ್ದೇವೆ ಎಂದು ಮಧ್ಯಪ್ರದೇಶದ ಕಿಸಾನ್ ಸಭೆಯೊಂದಿಗೆ ಸಂಬಂಧ ಹೊಂದಿರುವ ಸಚಿನ್ ತಂದೆ ರಾಮ್‌ಜಿತ್ ಸಿಂಗ್ ಹೇಳಿದ್ದಾರೆ.