ಫ್ಲ್ಯಾಟ್​ ನೀಡಲು ವಿಳಂಬ.. ಗ್ರಾಹಕರಿಗೆ ಶೇ 20 ಜಾಗ ಉಚಿತವಾಗಿ ನೀಡಲು ಕಂಪನಿಗೆ ಕೋರ್ಟ್​ ಸೂಚನೆ

ಗ್ರಾಹಕರಿಗೆ ನಿರ್ದಿಷ್ಟ ಸಮಯದಲ್ಲಿ ಫ್ಲ್ಯಾಟ್​ ನೀಡುವಲ್ಲಿ ವಿಳಂಬ ಮಾಡಿದ ನಿರ್ಮಾಣ ಕಂಪನಿಗೆ ನಾಸಿಕ್​ ಗ್ರಾಹಕ ನ್ಯಾಯಾಲಯ ದಂಡ ವಿಧಿಸಿದೆ.

ನಾಸಿಕ್(ಮಹಾರಾಷ್ಟ್ರ):ನಿರ್ಮಾಣ ಹಂತದಲ್ಲಿದ್ದ ಫ್ಲ್ಯಾಟ್​ ಅನ್ನು ಗ್ರಾಹಕರಿಗೆ ನಿಗದಿತ ಸಮಯದಲ್ಲಿ ಹಸ್ತಾಂತರಿಸದೇ ವಿಳಂಬ ಮಾಡಿದ್ದಕ್ಕೆ ಗ್ರಾಹಕ ನ್ಯಾಯಾಲಯ ಬಿಲ್ಡರ್​ಗೆ ದಂಡ ವಿಧಿಸಿದೆ. ಖರೀದಿಸಲಾದ ಫ್ಲ್ಯಾಟ್​ನಲ್ಲಿನ ಶೇ.20 ರಷ್ಟು ಜಾಗವನ್ನು ಉಚಿತವಾಗಿ ನೀಡಬೇಕು. ಅಲ್ಲದೇ, 50 ಸಾವಿರ ರೂಪಾಯಿ ದಂಡದ ರೂಪದಲ್ಲಿ ಗ್ರಾಹಕನಿಗೆ ನೀಡಬೇಕು ಎಂದು ಆದೇಶ ನೀಡಿದೆ.

2017 ರಲ್ಲಿ ಮಾಡಿಕೊಂಡ ಒಪ್ಪಂದದಂತೆ ಫ್ಲ್ಯಾಟ್​ ನೀಡದೇ ವಿಳಂಬ ಮಾಡಲಾಗಿದೆ ಎಂದು ವ್ಯಕ್ತಿಯೊಬ್ಬರು ಗ್ರಾಹಕ ಕೋರ್ಟ್​ಗೆ ಪುಣೆ ಮೂಲದ ನಿರ್ಮಾಣ ಕಂಪನಿ ವಿರುದ್ಧ ದೂರು ನೀಡಿದ್ದರು. ವಿಚಾರಣೆ ನಡೆಸಿದ ಕೋರ್ಟ್​, ಹೆಚ್ಚಿನ ವಿಳಂಬದ ಕಾರಣ ಗ್ರಾಹಕರಿಗೆ ಮೋಸವಾಗಿದೆ ಎಂದು ದಂಡದ ಆದೇಶ ನೀಡಿದೆ.

ಪ್ರಕರಣವೇನು?:ಪುಣೆ ಮೂಲದ ಗುಡ್‌ಲ್ಯಾಂಡ್ ರಿಯಾಲ್ಟಿ ಪ್ರೈವೇಟ್ ಲಿಮಿಟೆಡ್ ನಾಸಿಕ್​ನಲ್ಲಿ ಬಹುಮಹಡಿ ಕಟ್ಟಡವನ್ನು ನಿರ್ಮಾಣ ಮಾಡುತ್ತಿದ್ದು, ವ್ಯಕ್ತಿಯೊಬ್ಬರಿಂದ 2017 ರಲ್ಲಿ 17.1 ಲಕ್ಷ ರೂಪಾಯಿಗೆ 212.82 ಚದರ ಮೀಟರ್​ ಫ್ಲ್ಯಾಟ್​ ನೀಡುವುದಾಗಿ ಒಪ್ಪಂದ ಮಾಡಿಕೊಂಡಿತ್ತು. ಗ್ರಾಹಕರು ಈ ಹಣವನ್ನು 4 ಕಂತುಗಳಲ್ಲಿ ಪಾವತಿಸಿದ್ದಾರೆ.

ಬಳಿಕ ಕಂಪನಿ ನಿರ್ಮಾಣ ವಿಳಂಬ ಮಾಡಿದ್ದಲ್ಲದೇ, ಮನೆಯನ್ನು ಹಸ್ತಾಂತರ ಮಾಡಿರಲಿಲ್ಲ. ಇದರಿಂದ ಗ್ರಾಹಕರು ಕಂಪನಿಗೆ ಕಡಿಮೆ ವಿಸ್ತೀರ್ಣದ ಮನೆಯನ್ನು ನೀಡಲು ಕೋರಿಕೆ ಸಲ್ಲಿಸಿದ್ದಾರೆ. ಅದರಂತೆ ಕಂಪನಿ 211.86 ಚದರಡಿ ಜಾಗದ ಮನೆಯನ್ನು 14 ಲಕ್ಷ 83 ಸಾವಿರಕ್ಕೆ ನೀಡಲು ಒಪ್ಪಿದೆ. 6 ತಿಂಗಳಲ್ಲಿ ನಿರ್ಮಿಸಿಕೊಡುವುದಾಗಿ ಭರವಸೆ ನೀಡಿತ್ತು.

ಆದರೆ, 5 ವರ್ಷ ಕಳೆದರೂ ಮನೆ ಹಸ್ತಾಂತರಿಸದ ಕಾರಣ ಗ್ರಾಹಕರು ಕೋರ್ಟ್​ ಮೆಟ್ಟಿಲೇರಿದ್ದರು. ಅರ್ಜಿ ವಿಚಾರಣೆಯ ವೇಳೆ ಕಂಪನಿಯ ವಿಳಂಬ ಧೋರಣೆಯನ್ನು ಟೀಕಿಸಿದ ನ್ಯಾಯಾಧೀಶರು ಎರಡು ಬಾರಿ ಒಪ್ಪಂದ ಮುರಿಯಲಾಗಿದೆ. ಗ್ರಾಹಕರು ಮಾನಸಿಕ ಮತ್ತು ದೈಹಿಕವಾಗಿ ವ್ಯಥೆಪಟ್ಟಿದ್ದಾರೆ. ಹೀಗಾಗಿ ಕಂಪನಿ ಫ್ಲ್ಯಾಟ್​ನ ಶೇಕಡಾ 20 ರಷ್ಟು ಭಾಗವನ್ನು ಗ್ರಾಹಕರಿಗೆ ಉಚಿತವಾಗಿ ನೀಡಿ, 50 ರೂಪಾಯಿ ದಂಡ ನೀಡಬೇಕು ಎಂದು ತೀರ್ಪು ನೀಡಿದೆ.

ಓದಿ:ಸಿಬ್ಬಂದಿಗೆ 1 ಕೋಟಿ ರೂ ಮೊತ್ತದ ಅಪಘಾತ ವಿಮಾ ಸೌಲಭ್ಯ ಜಾರಿಗೊಳಿಸಿದ ಕೆಎಸ್​ಆರ್​ಟಿಸಿ