ಕಥೆಗಳ ಪ್ರಕಾರ ನಾಲ್ಕನೇ ಶತಮಾನದಲ್ಲಿ ಸೇಂಟ್ ನಿಕೋಲಸ್ ಎಂಬ ವ್ಯಕ್ತಿ ಮೈರಾದಲ್ಲಿ (ಈಗಿನ ಟರ್ಕಿ) ವಾಸಿಸುತ್ತಿದ್ದರು. ಆತ ತುಂಬಾ ಶ್ರೀಮಂತ. ಸುಖವಾಗಿದ್ದ ನಿಕೋಲಸ್ ತನ್ನ ಪೋಷಕರನ್ನು ಕಳೆದುಕೊಳ್ಳುತ್ತಾನೆ. ಇದಾದ ಬಳಿಕ ಅನಾಥನಾಗಿದ್ದ ನಿಕೋಲಸ್ ಯಾವಾಗಲೂ ಬಡವರಿಗೆ ರಹಸ್ಯವಾಗಿ ಸಹಾಯ ಮಾಡುತ್ತಿದ್ದ. ಆತ ರಹಸ್ಯ ಉಡುಗೊರೆಗಳನ್ನು ನೀಡುವ ಮೂಲಕ ಜನರನ್ನು ಸಂತೋಷಪಡಿಸುತ್ತಿದ್ದನು. ಈ ಮೂಲಕ ನಿಕೋಲಸ್ ತನ್ನ ದುಃಖ ಮರೆಯುತ್ತಿದ್ದನು.
ಮೈರಾದಲ್ಲಿ ವಾಸಿಸುತ್ತಿದ್ದ ಒಬ್ಬ ಬಡವನಿಗೆ ಮೂರು ಹೆಣ್ಣು ಮಕ್ಕಳಿದ್ದರು. ಅವರ ಮದುವೆಗೆ ಹಣವಿಲ್ಲದೇ ಆತ ಸಂಕಷ್ಟಕ್ಕೆ ಒಳಗಾಗಿದ್ದ. ಈ ವಿಷಯ ನಿಕೋಲಸ್‌ಗೆ ತಿಳಿಯಿತು. ಇದನ್ನು ತಿಳಿದ ನಿಕೋಲಸ್ ಈ ವ್ಯಕ್ತಿಗೆ ಸಹಾಯ ಮಾಡಲು ಮುಂದಾದನು.
ಆಗ ಪ್ರಪಂಚದಾದ್ಯಂತ ಕ್ರಿಸ್ಮಸ್ ಸಂಭ್ರಮಾಚರಣೆ ನಡೆಯುತ್ತಿತ್ತು. ಆಗ ನಿಕೋಲಸ್ ಸಾಕ್ಸ್‌ಗಳಲ್ಲಿ ಚಿನ್ನಹಾಕಿ ಈ ಚೀಲವನ್ನು ಮನೆಯ ಛಾವಣಿ ಮೇಲೆ ಬಿಸಾಕಿದನು. ಒಂದಲ್ಲ, ಎರಡಲ್ಲ ಮೂರು ಬಾರಿ ಚಿನ್ನ ತುಂಬಿದ ಸಾಕ್ಸ್ನ್ನು ಆ ಬಡ ಹೆಣ್ಣು ಮಕ್ಕಳ ಕುಟುಂಬದ ಮನೆ ಮೇಲೆ ಎಸೆದನು.
ಕೊನೆಗೆ ಒಂದು ಬಾರಿ ನಿಕೋಲಸ್ ಮಾಡುತ್ತಿದ್ದ ಸಹಾಯ ವ್ಯಕ್ತಿಯೊಬ್ಬರ ಕಣ್ಣಿಗೆ ಬಿತ್ತು. ಇದನ್ನು ಯಾರಿಗೂ ಹೇಳಬಾರದೆಂದು ನಿಕೋಲಸ್ ಕೇಳಿಕೊಂಡನು. ಆದರೆ ಆ ವಿಷಯ ಊರು ತುಂಬೆಲ್ಲ ಹಬ್ಬಿತು. ಆ ದಿನದಿಂದ ಯಾರಿಗಾದರೂ ರಹಸ್ಯ ಉಡುಗೊರೆ ಸಿಕ್ಕರೆ ಅದು ನಿಕೋಲಸ್ ಕೊಟ್ಟದ್ದು ಎಂದು ಎಲ್ಲರೂ ಭಾವಿಸುತ್ತಾರೆ. ಕ್ರಮೇಣ ನಿಕೋಲಸ್ನ ಈ ಕಥೆ ಜನಪ್ರಿಯವಾಯಿತು.
ನಿಕೋಲಸ್ನ ಕಥೆಯು ಮೊದಲು ಯುಕೆಯಲ್ಲಿ ಜನಪ್ರಿಯವಾಯಿತು. ಅವನಿಗೆ ಫಾದರ್ ಕ್ರಿಸ್ಮಸ್ ಮತ್ತು ಓಲ್ಡ್ ಮ್ಯಾನ್ ಕ್ರಿಸ್ಮಸ್ ಎಂದು ಹೆಸರಿಸಲಾಯಿತು. ಬಳಿಕ ಕ್ರಿಸ್ಮಸ್ ದಿನದಂದು ಮಕ್ಕಳಿಗೆ ಉಡುಗೊರೆಗಳನ್ನು ನೀಡುವುದು ವಾಡಿಕೆ ಆಯಿತು.
ಇದಾದ ನಂತರ ಕ್ರಿಸ್ಮಸ್ ದಿನದಂದು ಸಾಕ್ಸ್ನಲ್ಲಿ ಉಡುಗೊರೆಗಳನ್ನು ನೀಡುವ ಪದ್ಧತಿ, ಅಂದರೆ ಸೀಕ್ರೆಟ್ ಸಾಂತಾ ಆಗುವುದು ಪ್ರಪಂಚದಾದ್ಯಂತ ಮುಂದುವರಿಯಿತು. ಸೀಕ್ರೆಟ್ ಸಾಂತಾ ಆಗುವ ಮೂಲಕ ಇಂದಿಗೂ ಅನೇಕರು ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವ ಮೂಲಕ ಈ ಪದ್ಧತಿ ಮುಂದುವರೆಸಿದ್ದಾರೆ.
ಮೂಲಗಳ ಪ್ರಕಾರ ಈಗ ಜನಪ್ರಿಯವಾಗಿರುವ ಡೊಳ್ಳುಹೊಟ್ಟೆಯಂತೆ, ನಗುವಿನ ಸಾಂತಾ ನಿಕೋಲಸ್ ಆಗಿರಲಿಲ್ಲವಂತೆ. ಸದಾ ಬಾಯಲ್ಲಿ ಪೈಪ್ ಹಿಡಿದು, ಓಡಾಡುತ್ತಿದ್ದನಂತೆ. ಈಗ ಎಲ್ಲೆಡೆ ಜನಪ್ರಿಯವಾಗಿರುವ ಕೆಂಪು ಬಟ್ಟೆಯ, ದಪ್ಪ ಸಾಂತಾ ಸುಖ ಸಂತೋಷದ ಸಮೃದ್ಧಿ ಸಾಂತಾ ಜನ ಮೆಚ್ಚುಗೆ ಪಡೆದಿದ್ದಾರೆ.
