ಸೆರಂ ಇನ್ಸ್​ಟಿಟ್ಯೂಟ್​, ಭಾರತ್ ಬಯೋಟೆಕ್​ ಮೇಲೆ ಚೀನಾ ಹ್ಯಾಕರ್ಸ್ ಕಣ್ಣು!?

ಚೀನಾದ ಹ್ಯಾಕಿಂಗ್​ ಗುಂಪು ಭಾರತೀಯ ಲಸಿಕಾ ತಯಾರಿಕೆ ಐಟಿ ವ್ಯವಸ್ಥೆ ಗುರಿಯಾಗಿಸಿಕೊಂಡು ಅವುಗಳ ಮೇಲೆ ದಾಳಿ ನಡೆಸಲು ಯೋಜನೆ ಹಾಕಿಕೊಂಡಿದೆ ಎಂಬ ಮಾಹಿತಿ ಲಭ್ಯವಾಗಿದೆ.

ನವದೆಹಲಿ:ಭಾರತ-ಚೀನಾ ಎರಡೂ ದೇಶ ಕೋವಿಡ್ ಲಸಿಕೆ ಉತ್ಪಾದನೆ ಮಾಡ್ತಿದ್ದು, ವಿವಿಧ ದೇಶಗಳಿಗೆ ಉಡುಗೊರೆ ಹಾಗೂ ಮಾರಾಟ ಮಾಡುತ್ತಿವೆ. ಆದರೆ ಭಾರತದಲ್ಲಿ ಶೇ 60ರಷ್ಟು ಲಸಿಕೆ ಹೆಚ್ಚಾಗಿ ಉತ್ಪಾದನೆಯಾಗುತ್ತಿದೆ.

ಇದರ ಮಧ್ಯೆ ಇದೀಗ ಮತ್ತೊಂದು ಮಹತ್ವದ ಸುದ್ದಿ ವರದಿಯಾಗಿದ್ದು, ಚೀನಾದ ಹ್ಯಾಕಿಂಗ್​ ಗುಂಪು ಭಾರತೀಯ ಲಸಿಕಾ ತಯಾರಿಕೆ ಕಂಪನಿಗಳ ಐಟಿ ವ್ಯವಸ್ಥೆ ಗುರಿಯಾಗಿಸಿಕೊಂಡು ಅವುಗಳ ಮೇಲೆ ದಾಳಿ ನಡೆಸಲು ಯೋಜನೆ ಹಾಕಿಕೊಂಡಿದೆ ಎಂಬ ಮಾಹಿತಿ ಇದೀಗ ಸೈಬರ್ ಗುಪ್ತಚರ ಸಂಸ್ಥೆ ಸೈಫಿರ್ಮಾ ತಿಳಿಸಿದೆ ಎನ್ನಲಾಗಿದೆ.

ಸಿಂಗಾಪುರ ಮತ್ತು ಟೋಕಿಯೋ ಮೂಲದ ಸೈಫಿರ್ಮಾ ಕಂಪನಿ ಈ ಮಾಹಿತಿ ನೀಡಿದ್ದು, ಚೀನಾದ ಹ್ಯಾಕಿಂಗ್​ ಗುಂಪು ಭಾರತ್​ ಬಯೋಟೆಕ್​ ಹಾಗೂ ಸೀರಂ ಇನ್ಸ್​ಟಿಟ್ಯೂಟ್​ ಆಫ್​ ಇಂಡಿಯಾ ಮೇಲೆ ದಾಳಿ ನಡೆಸಲು ಮುಂದಾಗಿದೆ ಎಂದಿದೆ. ಈ ಮೂಲಕ ಭಾರತೀಯ ಔಷಧೀಯ ಕಂಪನಿಗಳಿಗಿಂತಲೂ ಹೆಚ್ಚಿನ ಲಾಭ ಪಡೆದುಕೊಳ್ಳುವ ಉದ್ದೇಶ ಹೊಂದಿದೆ ಎನ್ನಲಾಗಿದೆ.

ವೆಬ್​​ ಅಪ್ಲಿಕೇಶನ್​ಗಳ ಮೂಲಕ ಈ ರೀತಿಯ ದಾಳಿ ನಡೆಸುವ ಸಾಧ್ಯತೆ ಇದೆ ಎನ್ನಲಾಗಿದೆ. ಆದರೆ ಇದರ ಬಗ್ಗೆ ಭಾರತ್ ಬಯೋಟೆಕ್​ ಹಾಗೂ ಸೆರಂ ಇನ್ಸ್​ಟಿಟ್ಯೂಟ್​ ಪ್ರತಿಕ್ರಿಯೆ ನೀಡಲು ನಿರಾಕರಣೆ ಮಾಡಿವೆ. ಭಾರತ, ಕೆನಡಾ, ಫ್ರಾನ್ಸ್​, ದಕ್ಷಿಣ ಕೊರಿಯಾ ಮತ್ತು ಯುನೈಟೆಡ್​ ಸ್ಟೇಟ್ಸ್​​ ಕೋವಿಡ್ ಲಸಿಕೆ ಕಂಪನಿ ಗುರಿಯಾಗಿಸಿಕೊಂಡು ರಷ್ಯಾ ಮತ್ತು ಉತ್ತರ ಕೊರಿಯಾದಿಂದ ಸೈಬರ್ ದಾಳಿಯಾಗುವುದಾಗಿ ಈ ಹಿಂದೆ ಮೈಕ್ರೋಸಾಫ್ಟ್​​ ಮಾಹಿತಿ ನೀಡಿತ್ತು.

ಈಗಾಗಲೇ ಲಭ್ಯವಾಗಿರುವ ಮಾಹಿತಿ ಪ್ರಕಾರ ಚೀನಾ ಸರ್ಕಾರದ ಬೆಂಬಲಿತ ಹ್ಯಾಕಿಂಗ್ ತಂಡಗಳು ಭಾರತ ಸರ್ಕಾರಿ ಸ್ವಾಮ್ಯದ ವಿದ್ಯುತ್ ಕಂಪನಿಗಳ ಕಂಪ್ಯೂಟರ್ ನೆಟ್‌ವರ್ಕ್‌ ಮತ್ತು ಲೋಡ್ ರವಾನೆ ಕೇಂದ್ರಗಳನ್ನು ಗುರಿಯಾಗಿಸಿವೆ ಎಂಬ ಮಾಹಿತಿ ತಿಳಿದು ಬಂದಿದೆ.