ಸಿಪೆಕ್​ ಕಾಮಗಾರಿ ಸ್ಥಳದಿಂದ ಪಾಕ್ ಕಾರ್ಮಿಕರ ವಜಾಗೊಳಿಸಿದ ಚೀನಾ..

ಸಿಪೆಕ್​ ಕಾಮಗಾರಿ ಸ್ಥಳದಿಂದ ಪಾಕಿಸ್ತಾನದ ಕಾರ್ಮಿಕರನ್ನು ಚೀನಾ ವಜಾಗೊಳಿಸಿದೆ. ಜು.14ರಂದು ಭಯೋತ್ಪಾದಕರ ದಾಳಿಯಲ್ಲಿ 9 ಚೀನಾ ಪ್ರಜೆಗಳು ಸಾವನ್ನಪ್ಪಿದ್ದಕ್ಕೆ ಚೀನಾ ಈ ರೀತಿ ಪ್ರತೀಕಾರ ತೀರಿಸಿಕೊಂಡಿದೆ ಎನ್ನಲಾಗ್ತಿದೆ.

ಬೀಜಿಂಗ್(ಚೀನಾ): ಪಾಕಿಸ್ತಾನದ ಮೇಲೆ ಚೀನಾ ನಂಬಿಕೆ ಕಳೆದುಕೊಳ್ಳುತ್ತಿದೆ ಎಂಬ ಅನುಮಾನಕ್ಕೆ ಪುಷ್ಠಿ ನೀಡುವ ಘಟನೆಯೊಂದು ನಡೆದಿದೆ. ಚೀನಾ ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (ಸಿಪೆಕ್​)ನಲ್ಲಿ ಕೆಲಸ ಮಾಡುವ ಸಾವಿರಾರು ಪಾಕ್ ನೌಕರರನ್ನು ಚೀನಾ ವಜಾಗೊಳಿಸಿದೆ.

ಭಯೋತ್ಪಾದಕರ ಕೃತ್ಯಗಳಿಂದ ಚೀನಾದವರನ್ನು ರಕ್ಷಣೆ ಮಾಡಲು ಪಾಕ್ ವಿಫಲವಾಗುತ್ತಿದೆ ಎಂಬ ಆರೋಪದ ಮೇಲೆ ಸಿಪೆಕ್​​ನ ಕಾಮಗಾರಿಯಲ್ಲಿ ತೊಡಗಿಕೊಂಡಿರುವ ಎರಡೂವರೆ ಸಾವಿರ ಪಾಕ್ ಸಿಬ್ಬಂದಿಯನ್ನು ವಜಾಗೊಳಿಸಲಾಗಿದೆ.

ಬಸ್​ನಲ್ಲಿ ಬಾಂಬ್ ಇಟ್ಟು ಚೀನಿ ಪ್ರಜೆಗಳನ್ನು ಕೊಂದ ಪ್ರತೀಕಾರದ ಸಲುವಾಗಿ ಚೀನಾ ಈ ರೀತಿಯ ಪ್ರತೀಕಾರವನ್ನು ಕೈಗೊಂಡಿದೆ ಎಂದು ಹೇಳಲಾಗುತ್ತಿದೆ. ಚೀನಾ ನಡೆಗೆ ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆಂದು ಜಿಯೋ ನ್ಯೂಸ್ (Geo news) ವರದಿ ಮಾಡಿದೆ.

ಜು.14ರಂದು ಬಸ್​ನಲ್ಲಿ ಭೀಕರ ಸ್ಫೋಟವೊಂದು ಸಂಭವಿಸಿ, ಚೀನಾದ 9 ಪ್ರಜೆಗಳೂ ಸೇರಿದಂತೆ ಒಟ್ಟು 13 ಮಂದಿ ಸಾವನ್ನಪ್ಪಿದ ಘಟನೆ ಈಶಾನ್ಯ ಪಾಕಿಸ್ತಾನದಲ್ಲಿ ನಡೆದಿತ್ತು. ದಸು ಜಲವಿದ್ಯುತ್​ ಯೋಜನೆಯ ಡ್ಯಾಮ್​​ಗಾಗಿ ಕಾರ್ಯನಿರ್ವಹಿಸಲು ತೆರಳುತ್ತಿದ್ದ ಚೀನಾದ ಇಂಜಿನಿಯರ್​ಗಳು, ಸರ್ವೇಯರ್​ಗಳು ಸ್ಫೋಟದಲ್ಲಿ ಸಾವನ್ನಪ್ಪಿದ್ದರು.

ಇದನ್ನೂ ಓದಿ:ಚೀನಾ ಸೈಬರ್​​​​​​ ದಾಳಿಕೋರರಿಂದ Microsoft​ ಇಮೇಲ್ ಹ್ಯಾಕ್​: ಅಮೆರಿಕ ಆರೋಪ

ಮೊದಲಿಗೆ ಇದು ಭಯೋತ್ಪಾದಕ ದಾಳಿಯೋ ಅಥವಾ ಅಲ್ಲವೋ ಎಂಬ ಬಗ್ಗೆ ಅನುಮಾನಗಳು ಮೂಡಿತ್ತಾದರೂ, ನಂತರ ಇದು ಭಯೋತ್ಪಾದಕರ ದಾಳಿ ಎಂಬುದನ್ನು ಪಾಕ್ ಒಪ್ಪಿಕೊಂಡಿತ್ತು. ಈಗ ಪಾಕಿಸ್ತಾನದ ನೌಕರರನ್ನು ವಜಾ ಮಾಡುವ ಮೂಲಕ ಚೀನಾ ಪ್ರತೀಕಾರ ತೀರಿಸಿಕೊಂಡಿದೆ ಎಂದು ಹೇಳಲಾಗ್ತಿದೆ.