ಮಂಗಳನ ಅಂಗಳದಲ್ಲಿ ಯಶಸ್ವಿಯಾಗಿ ರೋವರ್ ಇಳಿಸಿದ ಚೀನಾ

ಚೀನಾ ಇದೀಗ ಮಂಗಳ ಗ್ರಹದ ಮೇಲೆ ತನ್ನ ರೋವರ್​ ಯಶಸ್ವಿಯಾಗಿ ಇಳಿಸಿದ್ದು, ಅಲ್ಲಿನ ಜೀವಿಗಳ ಹುಡುಕುವ ಕೆಲಸದಲ್ಲಿ ಈ ರೋವರ್​ ಕೆಲಸ ಮಾಡಲಿದೆ.

ಬೀಜಿಂಗ್​(ಚೀನಾ):ಬಾಹ್ಯಾಕಾಶ ಇತಿಹಾಸದಲ್ಲಿ ಚೀನಾ ಇದೀಗ ಮತ್ತೊಂದು ಸಾಧನೆ ಮಾಡಿದ್ದು, ಅಮೆರಿಕ ನಂತರ ಮಂಗಳ ಗ್ರಹದ ಮೇಲೆ ಯಶಸ್ವಿಯಾಗಿ ರೋವರ್​ ಇಳಿಸಿರುವ ದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಚೀನಾ ಇದೀಗ ತನ್ನ ರೋವರ್​​ ಅನ್ನ ಮಂಗಳ ಗ್ರಹದ ಮೇಲೆ ಯಶಸ್ವಿಯಾಗಿ ಇಳಿಸಿದ್ದಾಗಿ ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ. ಮಂಗಳ ಗ್ರಹದ ದಕ್ಷಿಣ ಪ್ರದೇಶದಲ್ಲಿ ಜುರಾಂಗ್​​ ರೋವರ್​ ಇಳಿಸಲಾಗಿದ್ದು, ಸೌರಶಕ್ತಿ ಚಾಲಿತ ಆರು ಗಾಲಿಗಳ ಜುರಾಂಗ್​ ರೋವರ್​​ 240 ಕಿ.ಗ್ರಾಂ ತೂಕವಿತ್ತು. ಇದಕ್ಕೆ ಆರು ವೈಜ್ಞಾನಿಕ ಸಾಧನ ಅಳವಡಿಕೆ ಮಾಡಲಾಗಿತ್ತು. ಮಂಗಳ ಗ್ರಹದ ಮೇಲೆ ಜೀವಿಗಳ ಹುಡುಕುವ ಕೆಲಸ ಮಾಡಲಿದ್ದು, ಮೂರು ತಿಂಗಳ ಕಾರ್ಯಾಚರಣೆ ನಡೆಸಲಿದೆ.

ಚೀನಿ ಪುರಾಣಗಳ ಪ್ರಕಾರ ಬೆಂಕಿ ದೇವರ ಹೆಸರು ಜುರಾಂಗ್​ ಎಂದು ರೋವರ್​ಗೆ ಹೆಸರಿಡಲಾಗಿದೆ. ಆರ್ಭಿಟರ್​, ಲ್ಯಾಂಡರ್​ ಹಾಗೂ ರೋವರ್​ ಹೊಂದಿದ್ದ ಟಿಯಾನ್​ವೆನ್​-1 2020ರ ಜುಲೈ 23ರಂದು ಹೈನಾನ್‌ನ ವೆನ್‌ಚಾಂಗ್ ಬಾಹ್ಯಾಕಾಶ ಉಡಾವಣಾ ಕೇಂದ್ರದಿಂದ ಉಡಾವಣೆ ಮಾಡಲಾಗಿತ್ತು.