ಕೊಳವೆ ಬಾವಿಗೆ ಬಿದ್ದ 12 ವರ್ಷದ ಬಾಲಕ... ಹುಡುಗನ ಜೀವ ಉಳಿಸಲು ಸಾಗಿದೆ ಕಾರ್ಯಾಚರಣೆ

ಬಾಲಕ ತನ್ನ ಮನೆಯ ಹಿಂದೆ ಆಟವಾಡುತ್ತಿದ್ದ ಸಂದರ್ಭದಲ್ಲಿ ಕಾಲು ಜಾರಿ ಬೋರ್​ವೆಲ್​ಗೆ ಬಿದ್ದಿದ್ದಾನೆ. ಕುಟುಂಬಸ್ಥರು ಮಗುವನ್ನು ಹುಡುಕಲು ಹೋದಾಗ ಬೋರ್‌ವೆಲ್‌ನಿಂದ ಮಗುವಿನ ಧ್ವನಿ ಕೇಳಿಸಿದೆ. ತಕ್ಷಣವೇ ಕುಟುಂಬಸ್ಥರು 112ಕ್ಕೆ ಫೋನ್​ ಮಾಡಿ ಬಾಲಕ ಬೋರ್​ವೆಲ್​ಗೆ ಬಿದ್ದಿರುವ ಮಾಹಿತಿ ನೀಡಿದ್ದಾರೆ. ರಕ್ಷಣಾ ಕಾರ್ಯಾಚರಣೆ ಮುಂದುವರೆದಿದೆ.

ಜಂಜಗೀರ್ ಚಂಪಾ(ಛತ್ತೀಸ್​ಗಢ): ಜಂಜಗೀರ್ ಚಂಪಾದ ಮಲ್ಖರೋಡಾದ ಪಿಹ್ರಿದ್ ಗ್ರಾಮದಲ್ಲಿ 12 ವರ್ಷದ ಬಾಲಕ ಬೋರ್‌ವೆಲ್‌ಗೆ ಬಿದ್ದಿದ್ದಾನೆ. ಶುಕ್ರವಾರ ಮಧ್ಯಾಹ್ನ 3 ಗಂಟೆ ವೇಳೆಗೆ ಈ ಘಟನೆ ನಡೆದಿದೆ. ಬಾಲಕ ತನ್ನ ಮನೆಯ ಹಿಂದೆ ಆಟವಾಡುತ್ತಿದ್ದ ಸಂದರ್ಭದಲ್ಲಿ ಕಾಲು ಜಾರಿ ಬೋರ್​ವೆಲ್​ಗೆ ಬಿದ್ದಿದ್ದಾನೆ. ಕುಟುಂಬಸ್ಥರು ಮಗುವನ್ನು ಹುಡುಕಲು ಹೋದಾಗ ಬೋರ್‌ವೆಲ್‌ನಿಂದ ಮಗುವಿನ ಧ್ವನಿ ಕೇಳಿಸಿದೆ.

ತಕ್ಷಣವೇ ಕುಟುಂಬಸ್ಥರು 112ಕ್ಕೆ ಫೋನ್​ ಮಾಡಿ ಬಾಲಕ ಬೋರ್​ವೆಲ್​ಗೆ ಬಿದ್ದಿರುವ ಮಾಹಿತಿ ನೀಡಿದ್ದಾರೆ. ಹೀಗೆ ಆಟವಾಡುತ್ತಾ ಬೋರ್​ವೆಲ್​ಗೆ ಬಿದ್ದಿರುವ ಮಗುವನ್ನ ರಾಹುಲ್ ಸಾಹು ಎಂದು ಗುರುತಿಸಲಾಗಿದೆ.

ಮಗು ಕೊಳವೆ ಬಾವಿಗೆ ಬಿದ್ದಿದ್ದು ಹೀಗೆ: ಪಿಹ್ರಿದ್​ ಗ್ರಾಮದ 12 ವರ್ಷದ ರಾಹುಲ್ ಸಾಹು ಮಧ್ಯಾಹ್ನ ಎಂದಿನಂತೆ ಮನೆಯ ಹಿಂಬದಿ ಆಟವಾಡುತ್ತಿದ್ದ. ಮನೆಯವರು ಹುಡುಕಿಕೊಂಡು ಬಂದಾಗ ರಾಹುಲ್ ಅಳುವ ಸದ್ದು ಬರುತ್ತಿತ್ತು. ಕೊಳವೆ ಬಾವಿ ಬಳಿ ಹೋಗಿ ನೋಡಿದಾಗ ಒಳಗಿನಿಂದ ಸದ್ದು ಬರುತ್ತಿರುವುದು ಕಂಡು ಬಂದಿದೆ.

ಸಾಕಷ್ಟು ಆಳದ ಕೊಳವೆ ಬಾವಿ: ಸದ್ಯ ಮಗುವಿನ ರಕ್ಷಣಾ ಕಾರ್ಯ ನಡೆಯುತ್ತಿದೆ. ಬೋರ್‌ವೆಲ್‌ ಸುಮಾರು 80 ಅಡಿ ಆಳವಿದೆ. 50 ಅಡಿ ಆಳದಲ್ಲಿ ಬಾಲಕ ಸಿಲುಕಿಕೊಂಡಿದ್ದಾನೆ ಎಂದು ರಕ್ಷಣಾ ಸಿಬ್ಬಂದಿ ಹೇಳಿದೆ. ಜಿಲ್ಲಾಡಳಿತ ಜೆಸಿಬಿ ಸಹಾಯದಿಂದ ಕೊಳವೆ ಬಾವಿ ಸುತ್ತ ತಗ್ಗು ತಗೆಯುತ್ತಿದೆ. ರಕ್ಷಣಾ ತಂಡ ಬಾಲಕನನ್ನು ರಕ್ಷಿಸಲು ನಿರಂತರವಾಗಿ ಪ್ರಯತ್ನ ಮಾಡುತ್ತಿದ್ದಾರೆ.

ಮಗುವಿನ ರಕ್ಷಣೆಗೆ ಮುಂದುವರಿದ ಕಾರ್ಯಾಚರಣೆ: ಸದ್ಯ ಜಿಲ್ಲಾಡಳಿತ, ಪೊಲೀಸರು, ಎನ್ ಡಿಆರ್ ಎಫ್ ಹಾಗೂ ಆರೋಗ್ಯ ಇಲಾಖೆ ತಂಡ ಕೊಳವೆ ಬಾವಿಗೆ ಬಿದ್ದ ಬಾಲಕನ ರಕ್ಷಣಾ ಕಾರ್ಯದಲ್ಲಿ ನಿರತರಾಗಿದ್ದಾರೆ. ಸ್ಥಳಕ್ಕೆ ಜಿಲ್ಲಾಧಿಕಾರಿ ಎಸ್ಪಿ ಸೇರಿದಂತೆ ಉನ್ನತ ಅಧಿಕಾರಿಗಳು ಆಗಮಿಸಿದ್ದು, ಮಗುವನ್ನು ಸುರಕ್ಷಿತವಾಗಿ ಹೊರತರಲು ನಿರಂತರವಾಗಿ ನಿಗಾ ವಹಿಸಿದ್ದಾರೆ.

ಇದನ್ನು ಓದಿ: ಭೀಕರ ರಸ್ತೆ ಅಪಘಾತ: ಸ್ಥಳದಲ್ಲೇ 8 ಮಂದಿ ದುರ್ಮರಣ