ಸೋಷಿಯಲ್​ ಮೀಡಿಯಾ ಇನ್​ಫ್ಲುಯೆನ್ಸರ್​ಗಳಿಗೆ ಕಠಿಣ ಮಾರ್ಗಸೂಚಿ..ನಿಯಮ ಮೀರಿದರೆ ದಂಡದ ಶಿಕ್ಷೆ

ಸಾಮಾಜಿಕ ಮಾಧ್ಯಮಗಳ ಇನ್​ಫ್ಲುಯೆನ್ಸರ್​ಗಳಿಗೆ ನಿಯಮ - ಕೇಂದ್ರ ಸರ್ಕಾರದಿಂದ ಹೊಸ ರೂಲ್ಸ್​- ತಪ್ಪು ಮಾಹಿತಿ ತಪ್ಪಿಸಲು ನಿಯಮಗಳ ಸಂಕೋಲೆ- ಸೋಷಿಯಲ್ ಮೀಡಿಯಾಗಳ ಮೇಲೆ ನಿರ್ಬಂಧ

ನವದೆಹಲಿ:ಸಾಮಾಜಿಕ ಮಾಧ್ಯಮಗಳಲ್ಲಿ ತಮ್ಮದೇ ಅಧಿಪತ್ಯ ಸಾಧಿಸಿದ ಇನ್​ಫ್ಲುಯೆನ್ಸರ್​ಗಳು ಮತ್ತು ಸೆಲೆಬ್ರಿಟಿಗಳಿಗೆ ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ. ಆನ್​ಲೈನ್​ ಉತ್ಪನ್ನಗಳು ಮತ್ತು ಸೇವೆಗಳ ಬಗ್ಗೆ ಪ್ರಚಾರ ಮಾಡಲು ಕೇಂದ್ರ ಸರ್ಕಾರ ನಿಯಮಗಳನ್ನು ರೂಪಿಸಿದೆ.

ಇಂದಿನ ಡಿಜಿಟಲ್ ಯುಗದಲ್ಲಿ ಸಾಮಾಜಿಕ ಮಾಧ್ಯಮಗಳ ಇನ್​ಫ್ಲುಯೆನ್ಸರ್​ಗಳಿಗೆ ಮಾರ್ಗಸೂಚಿಗಳು ಅಗತ್ಯ ಎಂದು ಹೇಳಿರುವ ಗ್ರಾಹಕ ವ್ಯವಹಾರಗಳ ಸಚಿವಾಲಯ, ಇಂದು ಜಾಹೀರಾತು ಕೇವಲ ಮುದ್ರಣ, ದೂರದರ್ಶನ ಅಥವಾ ರೇಡಿಯೊಗೆ ಮಾತ್ರ ಸೀಮಿತವಾಗಿಲ್ಲ. ಸಾಮಾಜಿಕ ಜಾಲತಾಣಗಳಾದ ಫೇಸ್ ಬುಕ್, ಟ್ವಿಟರ್, ಇನ್​ಸ್ಟಾಗ್ರಾಮ್​ಗೂ ಬಹುವಾಗಿ ತಲುಪಿದೆ. ಸಾಮಾಜಿಕ ಮಾಧ್ಯಮದಲ್ಲಿ ಪ್ರಭಾವ ಬೀರುವ ವ್ಯಕ್ತಿಗಳು ಮತ್ತು ಸೆಲೆಬ್ರಿಟಿಗಳು ಮಾಡಿದ ಜಾಹೀರಾತು ಸಾಮಾಜಿಕ ಮಾಧ್ಯಮ ಬಳಕೆದಾರರ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ಅವರೂ ನಿಯಮಗಳಿಗೆ ಒಳಪಡಬೇಕು ಎಂದು ಸೂಚಿಸಿದೆ.

ಸಾಮಾಜಿಕ ಮಾಧ್ಯಮ ಇನ್​ಫ್ಲುಯೆನ್ಸರ್​ಗಳು ತಾವು ಪೋಸ್ಟ್​ ಮಾಡಿದ ವಿಡಿಯೋ, ಆಡಿಯೋ ಅಥವಾ ಫೋಟೋದಲ್ಲಿ ಯಾವುದಾದರೂ ಉತ್ಪನ್ನವನ್ನು ಪ್ರಚಾರ ಮಾಡುತ್ತಿದ್ದರೆ ಅದನ್ನು ಸ್ಪಷ್ಟವಾಗಿ ಬಹಿರಂಗ ಮಾಡುವುದು ಕಡ್ಡಾಯ. ನಿಯಮ ಉಲ್ಲಂಘಿಸುವ ಇನ್​ಫ್ಲುಯೆನ್ಸರ್​ಗಳಿಗೆ ಮತ್ತು ತಯಾರಕ ಕಂಪನಿಗಳಿಗೆ ಗ್ರಾಹಕ ರಕ್ಷಣಾ ಕಾಯ್ದೆಯಡಿ 1 ರಿಂದ 3 ವರ್ಷ ನಿಷೇಧ ಹೇರುವ ಮತ್ತು 10 ರಿಂದ 50 ಲಕ್ಷ ರೂಪಾಯಿವರೆಗೆ ದಂಡ ವಿಧಿಸುವ ಅವಕಾಶವಿದೆ.

ಹೊಸ ನಿಯಮಗಳಲ್ಲೇನಿದೆ?:ಇನ್​ಫ್ಲುಯೆನ್ಸರ್​​ಗಳು ಪ್ರಚಾರ ಮಾಡುವ ಜಾಹೀರಾತು ಬಳಕೆದಾರರಿಗೆ ಸ್ಪಷ್ಟವಾದ ಪದಗಳಲ್ಲಿ ತಿಳಿಸಬೇಕು. ಉತ್ಪನ್ನ, ಸೇವೆ, ಬ್ರ್ಯಾಂಡ್ ಅಥವಾ ಅನುಭವದ ಬಗ್ಗೆ ತಮಗಿರುವ ಮಾಹಿತಿ, ಆಸಕ್ತಿಯನ್ನು ಸಂಪೂರ್ಣವಾಗಿ ತಿಳಿಸಬೇಕು. ಜಾಹೀರಾತು ಪ್ರಚಾರ ಮಾಡುವುದಿದ್ದರೆ, ಕಂಪನಿ ಮತ್ತು ಇನ್​ಫ್ಲುಯೆನ್ಸರ್​ ಮಧ್ಯೆ ಇರುವ ಸಂಬಂಧವನ್ನು ಬಹಿರಂಗಪಡಿಸಬೇಕು.

ಫೋಟೋ ಅಥವಾ ವಿಡಿಯೋದ ಕೆಳಗೆ, ಹ್ಯಾಶ್​ಟ್ಯಾಗ್​ಗಳ ನಡುವೆ ಎದ್ದು ಕಾಣಿಸುವ ರೀತಿ ಇದು ಜಾಹೀರಾತು ಎಂದು ಕಡ್ಡಾಯವಾಗಿ ಬರೆಯಬೇಕು. ಸೋಷಿಯಲ್​ ಮೀಡಿಯಾದಲ್ಲಿ ದಾರಿ ತಪ್ಪಿಸುವ ಜಾಹೀರಾತು ನೀಡಿದರೆ, ಅವುಗಳಿಗೆ ಸೆಲೆಬ್ರಿಟಿ ಅಥವಾ ಇನ್​ಫ್ಲುಯೆನ್ಸರ್​ಗಳೇ ಕಾರಣ. ಅದಕ್ಕೆ ಶಿಕ್ಷೆಯೂ ಅನುಭವಿಸಬೇಕು. ಮೊದಲ ಬಾರಿ ನಿಯಮ ಉಲ್ಲಂಘಿಸಿದರೆ 10 ಲಕ್ಷ ರೂ. ದಂಡ 1 ವರ್ಷ ಜಾಹೀರಾತು ಮಾಡುವುದದರಿಂದ ನಿಷೇಧ, ನಂತರದ ಉಲ್ಲಂಘನೆಗೆ 50 ಲಕ್ಷ ರೂ. ದಂಡ, 3 ವರ್ಷದವರೆಗೆ ಜಾಹೀರಾತಿನಲ್ಲಿ ಭಾಗವಹಿಸದಂತೆ ನಿಷೇಧ ಹೇರಲಾಗುತ್ತದೆ.

ಅನ್ಯಾಯದ ವ್ಯಾಪಾರ ಮತ್ತು ದಾರಿತಪ್ಪಿಸುವ ಜಾಹೀರಾತುಗಳಿಂದ ಬಳಕೆದಾರರನ್ನು ರಕ್ಷಿಸಲು ಈ ಕಾಯಿದೆಯನ್ನು ರೂಪಿಸಲಾಗಿದೆ. ತಪ್ಪು ದಾರಿಗೆಳೆಯುವ ಜಾಹೀರಾತುಗಳ ತಡೆಗಟ್ಟುವಿಕೆಯನ್ನು ಈ ನಿಯಮಗಳು ಹೊಂದಿವೆ.

ಇನ್​ಫ್ಲುಯೆನ್ಸರ್​ಗಳು ಎಂದರೆ ಯಾರು?:ಸೋಶಿಯಲ್ ಮೀಡಿಯಾ ಇನ್​ಫ್ಲುಯನ್ಸರ್​ ಎಂದರೆ, ಸಾಮಾಜಿಕ ಮಾಧ್ಯಮಗಳನ್ನು ಬಳಸುವವರಾಗಿದ್ದಲ್ಲದೇ, ಉಳಿದವರ ಮೇಲೆ ಪ್ರಭಾವ ಬೀರುವವರು. ಇವರು ಹರಿಬಿಡುವ ವಿಡಿಯೋ, ಫೋಟೋಗಳು ಹೆಚ್ಚು ಜನರಿಗೆ ತಲುಪಿ ಅವರು ಅದರ ಪ್ರಭಾವಕ್ಕೆ ಒಳಗಾಗುವರು. ದೇಶದಲ್ಲಿ 1 ಲಕ್ಷಕ್ಕೂ ಅಧಿಕ ಇನ್​ಫ್ಲುಯೆನ್ಸರ್​ಗಳು ಇದ್ದಾರೆ.

ಓದಿ:ಅಂಧರಿಗೆ ಶಾಪಿಂಗ್​ ವೇಳೆ ಕುಳಿತುಕೊಳ್ಳಲು ಜಾಗ ಹುಡುಕುವ, ಗಿರಾಣಿ ವಸ್ತು ಹುಡುಕುವ ಸ್ಮಾರ್ಟ್​ ವಾಕಿಂಗ್​ ಸ್ಟಿಕ್​ ಅಭಿವೃದ್ಧಿ