ಇತಿಹಾಸದಲ್ಲಿ ಈ ವರ್ಷ ಖಾಸಗೀಕರಣದ ವರ್ಷವಾಗಿ ಪ್ರಾಮುಖ್ಯತೆ ಪಡೆಯುತ್ತೆ: ಸುಬ್ರಮಣಿಯನ್​​

ಶೀಘ್ರದಲ್ಲೇ ಭಾರತ್​ ಪೆಟ್ರೋಲಿಯಂ ಹಾಗೂ ಎಲ್​​ಐಸಿ  ಸರ್ಕಾರಿ ಕಂಪನಿಗಳು ಖಾಸಗೀಕರಣಗೊಳ್ಳಲಿವೆ. ಇದರಿಂದಾಗಿ ಇತಿಹಾಸದಲ್ಲಿ ಈ ವರ್ಷ ಖಾಸಗೀಕರಣದ ವಿಷಯ ಪ್ರಮುಖವಾಗಿ ದಾಖಲಾಗುತ್ತದೆ ಎಂದು ಮುಖ್ಯ ಆರ್ಥಿಕ ಸಲಹೆಗಾರ ಕೃಷ್ಣಮೂರ್ತಿ ಸುಬ್ರಮಣಿಯನ್​ ಹೇಳಿದ್ದಾರೆ.

ನವದೆಹಲಿ: ಇತಿಹಾಸದಲ್ಲಿ ಈ ವರ್ಷ ಖಾಸಗೀಕರಣದ ವಿಷಯದಲ್ಲಿ ಪ್ರಮುಖವಾಗಿ ದಾಖಲಾಗುತ್ತದೆ. ಈ ವಿಚಾರದಲ್ಲಿ ನನಗೆ ಬಹಳ ಆತ್ಮವಿಶ್ವಾಸವಿದೆ ಎಂದು ಮುಖ್ಯ ಆರ್ಥಿಕ ಸಲಹೆಗಾರ ಕೃಷ್ಣಮೂರ್ತಿ ಸುಬ್ರಮಣಿಯನ್​ ಹೇಳಿದ್ದಾರೆ.

ಇಂಡಿಯನ್​ ಸ್ಕೂಲ್​ ಆಫ್​ ಬ್ಯುಸಿನೆಸ್​​​​​​ನಲ್ಲಿ ಆಯೋಜಿಸಲಾಗಿದ್ದ ಪಿಜಿಪಿಎಂಎಎಕ್ಸ್​​ ಲೀಡರ್​​ಶಿಪ್​ ಸಮಿಟ್​ 2021 ಉದ್ದೇಶಿಸಿ ಅವರು ಮಾತನಾಡಿದರು. ಈ ವರ್ಷದ ಬಜೆಟ್​ನಲ್ಲಿ ಹೇಳಿದಂತೆ ಖಾಸಗೀಕರಣದಿಂದ ಸುಮಾರು 1.75 ಲಕ್ಷ ಕೋಟಿ ಆದಾಯ ಗಳಿಸುವ ಗುರಿ ಸಾಧಿಸುವ ಸಾಧ್ಯತೆಯಿದೆ ಎಂದು ಅವರು ಹೇಳಿದ್ದಾರೆ.

ಇದಕ್ಕೆ ಇಂಬು ನೀಡುವಂತೆ ಏರ್​ ಇಂಡಿಯಾ ಖಾಸಗೀಕರಣಗೊಳಿಸುವ ಪ್ರಕ್ರಿಯೆ ಜಾರಿಯಲ್ಲಿದೆ. ಇದಷ್ಟೇ ಅಲ್ಲದೇ, ಭಾರತ್​ ಪೆಟ್ರೋಲಿಯಂ ಹಾಗೂ ಎಲ್​​ಐಸಿ ಸರ್ಕಾರಿ ಕಂಪನಿಗಳು ಸಹ ಖಾಸಗೀಕರಣಗೊಳ್ಳಲು ಸಜ್ಜಾಗಿವೆ ಎಂದು ಮಾಹಿತಿ ಹಂಚಿಕೊಂಡಿದ್ದಾರೆ.

ಈ ಪ್ರಕ್ರಿಯೆಗಳು ಈ ವರ್ಷದ ನಾಲ್ಕನೇ ತ್ರೈಮಾಸಿಕದ ವೇಳೆಗೆ ಪೂರ್ಣಗೊಳ್ಳಲಿವೆ ಎಂದೂ ಕೃಷ್ಣಮೂರ್ತಿ ಸುಬ್ರಮಣಿಯನ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.