ಪರವಾನಗಿದಾರರಿಗೆ ಅನುಕೂಲವಾಗಲೆಂದೇ ಹೊಸ ಅಬಕಾರಿ ನೀತಿ ಜಾರಿ.. ಸಿಬಿಐ

ಕಳೆದ ವರ್ಷ ನವೆಂಬರ್‌ನಲ್ಲಿ ಜಾರಿಗೆ ತಂದ ಕೇಜ್ರಿವಾಲ್ ಸರ್ಕಾರದ ದೆಹಲಿ ನೂತನ ಅಬಕಾರಿ ನೀತಿ 2021-22 ರ ರಚನೆ ಮತ್ತು ಅನುಷ್ಠಾನದಲ್ಲಿನ ಅಕ್ರಮಗಳಿಗೆ ಸಂಬಂಧಿಸಿದಂತೆ ಸಿಬಿಐ ಎಫ್‌ಐಆರ್ ದಾಖಲಿಸಿದೆ. ಈ ಎಫ್‌ಐಆರ್‌ನಲ್ಲಿ ದೆಹಲಿ ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಅಬಕಾರಿ ನೀತಿಯಲ್ಲಿ ಹಲವಾರು ಬದಲಾವಣೆ ಮಾಡಿ, ಪರವಾನಗಿದಾರರಿಗೆ ಅನುಚಿತ ಲಾಭಗಳನ್ನು ನೀಡಿದ್ದಾರೆ ಜೊತೆಗೆ ಪರವಾನಗಿದಾರರಿಗೆ ಅನಗತ್ಯ ಅನುಕೂಲಗಳನ್ನು ನೀಡುವ ಉದ್ದೇಶದಿಂದ ಹೊಸ ಅಬಕಾರಿ ನೀತಿಯನ್ನು ಪರಿಚಯಿಸಲಾಗಿದೆ ಎಂದು ಹೇಳಿದೆ.

ನವದೆಹಲಿ: ಹೊಸ ಅಬಕಾರಿ ನೀತಿಯಲ್ಲಿನ ಅಕ್ರಮಗಳಿಗೆ ಸಂಬಂಧಿಸಿದಂತೆ ಸಿಬಿಐ ದಾಖಲಿಸಿದ ಎಫ್‌ಐಆರ್‌ನಲ್ಲಿ 'ಟೆಂಡರ್‌ ನಂತರ ಪರವಾನಗಿದಾರರಿಗೆ ಅನಗತ್ಯ ಅನುಕೂಲಗಳನ್ನು ನೀಡುವ ಉದ್ದೇಶದಿಂದ ಈ ಹೊಸ ಅಬಕಾರಿ ನೀತಿ ಪರಿಚಯಿಸಲಾಗಿದೆ. ಜೊತೆಗೆ ದೆಹಲಿ ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಅಬಕಾರಿ ನೀತಿಯಲ್ಲಿ ಹಲವಾರು ಬದಲಾವಣೆ ಮಾಡಿ, ಪರವಾನಗಿದಾರರಿಗೆ ಅನುಚಿತ ಲಾಭಗಳನ್ನು ನೀಡಿದ್ದಾರೆ' ಎಂದು ತಿಳಿಸಿದೆ.

2021-22 ನೇ ಸಾಲಿಗೆ ದೆಹಲಿಯ ಜಿಎನ್‌ಸಿಟಿಡಿಯ ಅಬಕಾರಿ ನೀತಿ ರೂಪಿಸುವಲ್ಲಿ ಮತ್ತು ಅನುಷ್ಠಾನಗೊಳಿಸುವಲ್ಲಿ ಅಕ್ರಮಗಳು ನಡೆದಿವೆ ಎಂದು ಗೃಹ ಸಚಿವಾಲಯವು ಸಿಬಿಐಗೆ ದೂರು ನೀಡಿದೆ. ದೆಹಲಿಯ ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ, ಆಗಿನ ಅಬಕಾರಿ ಆಯುಕ್ತ ಗೋಪಿ ಕೃಷ್ಣ, ಅಬಕಾರಿ ಇಲಾಖೆ ಉಪ ಆಯುಕ್ತ ಆನಂದ್ ತಿವಾರಿ, ಸಹಾಯಕ ಕಮಿಷನರ್ ಪಂಕಜ್ ಭಟ್ನಾಗರ್ ಅವರು 2021-22ನೇ ಸಾಲಿನ ಅಬಕಾರಿ ನೀತಿಗೆ ಸಂಬಂಧಿಸಿದ ನಿರ್ಧಾರಗಳನ್ನು ಸಕ್ಷಮ ಪ್ರಾಧಿಕಾರದ ಅನುಮೋದನೆಯಿಲ್ಲದೆಯೇ ಪರವಾನಗಿದಾರರಿಗೆ ಅನುಚಿತವಾಗಿ ನೀಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ ಎಂದು ಎಫ್‌ಐಆರ್‌ನಲ್ಲಿ ಹೇಳಲಾಗಿದೆ.

ಏನಿದು ಪ್ರಕರಣ: ತಜ್ಞರ ಸಮಿತಿಯ ವರದಿಯ ಆಧಾರದಲ್ಲಿ ರೂಪಿಸಲಾದ ಕೇಜ್ರಿವಾಲ್ ಸರ್ಕಾರದ ನೂತನ ಅಬಕಾರಿ ನೀತಿ 2021-22 ಅನ್ನು ಕಳೆದ ವರ್ಷದ ನವಂಬರ್​ನಲ್ಲಿ ಜಾರಿಗೊಳಿಸಲಾಗಿತ್ತು. ಮತ್ತು ಅದರಡಿ ನಗರದ 32 ವಲಯಗಳಲ್ಲಿಯ 849 ಮದ್ಯದಂಗಡಿಗಳಿಗಾಗಿ ಖಾಸಗಿ ಬಿಡ್ಡರ್​ಗಳಿಗೆ ಚಿಲ್ಲರೆ ಪರವಾನಗಿಗಳನ್ನು ನೀಡಲಾಗಿತ್ತು.

ನೂತನ ನೀತಿಯಡಿ ಅಬಕಾರಿ ಇಲಾಖೆಯು ವರ್ಷವೊಂದರಲ್ಲಿ ಮದ್ಯರಹಿತ ದಿನಗಳ ಸಂಖ್ಯೆಯನ್ನು 21ರಿಂದ 3ಕ್ಕೆ ತಗ್ಗಿಸಿತ್ತು. ಚಿಲ್ಲರೆ ಮದ್ಯ ಮಾರಾಟ ಕ್ಷೇತ್ರದಿಂದ ಸರ್ಕಾರವು ನಿರ್ಗಮಿಸಿತ್ತು. ಬಾರ್ ಮತ್ತು ರೆಸ್ಟೋರೆಂಟ್​ಗಳನ್ನು ನಸುಕಿನ ಮೂರು ಗಂಟೆಯವರೆಗೆ ತೆರೆದಿಡಲು ಅವಕಾಶ ಕಲ್ಪಿಸಲಾಗಿತ್ತು. ಜೊತೆಗೆ ಮದ್ಯದ ಮೇಲೆ ರಿಯಾಯಿತಿಗಳು ಮತ್ತು ಯೋಜನೆಗಳನ್ನು ಪ್ರಕಟಿಸಲು ಚಿಲ್ಲರೆ ಪರವಾನಗಿದಾರರಿಗೆ ಅನುಮತಿ ನೀಡಲಾಗಿತ್ತು.

ಜೊತೆಗೆ ಅಬಕಾರಿ ನೀತಿಯಲ್ಲಿ ಹಲವಾರು ಬದಲಾವಣೆಗಳನ್ನು ಸಿಸೋಡಿಯಾ ಆಗಿನ ಉಪ ರಾಜ್ಯಪಾಲ ಅನಿಲ ಬೈಜಾಲ್ ಅವರ ಅನುಮತಿಯನ್ನು ಪಡೆದುಕೊಳ್ಳದೇ ಮಾಡಿದ್ದರೆಂದು ಆರೋಪಿಸಲಾಗಿದೆ. ಬಳಿಕ ಉಪ ರಾಜ್ಯಪಾಲ ವಿ.ಕೆ.ಸಕ್ಸೇನಾ ಅವರು ಅಬಕಾರಿ ನೀತಿಯ ಅನುಷ್ಠಾನದಲ್ಲಿನ ಹಣಕಾಸು ಅವ್ಯವಹಾರಗಳ ತನಿಖೆಗಾಗಿ ಪ್ರಕರಣವನ್ನು ದಾಖಲಿಸುವಂತೆ ಸಿಬಿಐಗೆ ಶಿಫಾರಸು ಮಾಡಿದ್ದರು. ಈ ಹಿನ್ನೆಲೆ ದೆಹಲಿ ಅಬಕಾರಿ ನೀತಿಯ ರಚನೆ ಮತ್ತು ಅನುಷ್ಠಾನದಲ್ಲಿನ ಅಕ್ರಮಗಳಿಗೆ ಸಂಬಂಧಿಸಿದಂತೆ ಸಿಬಿಐ ಎಫ್‌ಐಆರ್ ದಾಖಲಿಸಿದೆ.

15 ಜನರ ವಿರುದ್ಧ ಎಫ್ಐಆರ್ ದಾಖಲು:ಅಬಕಾರಿ ನೀತಿ 2021 22 ಅವ್ಯವಹಾರಗಳ ಆರೋಪದಲ್ಲಿ ಸಿಬಿಐ ದೆಹಲಿ ಉಪಮುಖ್ಯಮಂತ್ರಿ ಮನೀಷ್ ಸಿಸೋಡಿಯಾ ಸೇರಿದಂತೆ 15 ಜನರ ವಿರುದ್ಧ ಎಫ್ಐಆರ್ ದಾಖಲಿಸಿದೆ. ಮಾಜಿ ಅಬಕಾರಿ ಆಯುಕ್ತ ಆರವ ಗೋಪಿಕೃಷ್ಣ,ಉಪ ಆಯುಕ್ತ ಆನಂದ ತಿವಾರಿ ಮತ್ತು ಸಹಾಯಕ ಆಯುಕ್ತ ಪಂಕಜ ಭಟ್ನಾಗರ್,ಮುಂಬೈ ಮತ್ತು ದಿಲ್ಲಿಯ ಉದ್ಯಮಿಗಳು ಆರೋಪಿಗಳಲ್ಲಿ ಸೇರಿದ್ದಾರೆ.

ಮನೀಶ್ ಸಿಸೋಡಿಯಾ ಮನೆ ಮೇಲೆ ಸಿಬಿಐ ದಾಳಿ: ಅಬಕಾರಿ ಹಗರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಶುಕ್ರವಾರ ಸಿಬಿಐ ಅಧಿಕಾರಿಗಳು ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಮನೆ ಮೇಲೆ ದಾಳಿ ನಡೆಸಿದ್ದಾರೆ. ದೆಹಲಿಯಲ್ಲಿರುವ ಸಿಸೋಡಿಯಾ ಅವರ ಅಧಿಕೃತ ನಿವಾಸ ಸೇರಿದಂತೆ ಎನ್‌ಸಿಆರ್‌ನ 20 ಸ್ಥಳಗಳಲ್ಲಿ ದಾಳಿ ನಡೆಸಿ, ತನಿಖೆ ಮುಂದುವರೆಸಿದ್ದಾರೆ.

ಇದನ್ನೂ ಓದಿ:ದೆಹಲಿ ಡಿಸಿಎಂ ಮನೆ ಸೇರಿ ವಿವಿಧ ರಾಜ್ಯಗಳಲ್ಲಿ ಸಿಬಿಐ ದಾಳಿ.. ಸ್ವಾಗತ ಎಂದ ಸಿಎಂ ಕೆಜ್ರೀವಾಲ್​