ಅಲ್ಮೋರಾ(ಉತ್ತರಾಖಂಡ) ನಗರದ ಭೈನ್ಸಿಯಾಚಾನ ಡೆವಲಪ್‌ಮೆಂಟ್ ಬ್ಲಾಕ್‌ ಬಳಿ ಕಾರು ಆಳವಾದ ಹಳ್ಳಕ್ಕೆ ಬಿದ್ದ ಪರಿಣಾಮ ನಾಲ್ವರು ಸಾವಿಗೀಡಾಗಿದ್ದು, ಇಬ್ಬರು ತೀವ್ರ ಗಾಯಗೊಂಡಿರುವ ದುರ್ಘಟನೆ ಶನಿವಾರ ಬೆಳಗ್ಗೆ ಸಂಭವಿಸಿದೆ.
ಕಾರಿನಲ್ಲಿದ್ದವರು ವರನ ಸಂಬಂಧಿಕರಾಗಿದ್ದು, ಢೌಲ್ಚಿನ ಜಮ್ರಾಡಿ ಬ್ಯಾಂಡ್ ಬಳಿಯ ಬಖ್ರಿಯಾತಾಂಡಾದಲ್ಲಿ ನಡೆದ ಮದುವೆ ಮೆರವಣಿಗೆ ಮುಗಿಸಿಕೊಂಡು ವಾಪಸ್ಸು ಬರುತ್ತಿದ್ದರು. ಮೃತಪಟ್ಟವರಲ್ಲಿ ಮೂವರು ಪುರುಷರು ಹಾಗೂ ಓರ್ವ ಮಹಿಳೆ ಇದ್ದಾರೆ.
ಪೊಲೀಸ್ ರ ಪ್ರಕಾರ, ಶನಿವಾರ ಬೆಳಗ್ಗೆ ಕಾರು ಕಾಫಿಗೈರ್ ರಸ್ತೆಯ ನೌಗಾಂವ್-ಬಖಾರಿಯಾ ನಡುವಿನ ಆಳವಾದ ಕಂದರಿಗೆ ಬಿದ್ದಿದ್ದು, ನಾಲ್ವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಇಬ್ಬರು ತೀವ್ರ ನೋವಿನಿಂದ ಕಿರುಚಾಡುತ್ತಿದ್ದನ್ನು ಕಂಡು, ಸ್ಥಳೀಯ ಸಮೀಪದ ಗ್ರಾಮಸ್ಥರು ರಕ್ಷಣಾ ಕಾರ್ಯಾಚರಣೆ ಆರಂಭಿಸಿದ್ದಾರೆ. ನಂತರ ಪೊಲೀಸರಿಗೆ ಮಾಹಿತಿ ಒದಗಿಸಿದ್ದಾರೆ.
ಪೊಲೀಸರು ಆಗಮಿಸಿದ ಬಳಿಕ ಗಾಯಾಳುಗಳನ್ನು ಚಿಕಿತ್ಸೆಗಾಗಿ ಸಮೀಪದ ಕಾಫಿಗರ್ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. 4 ಜನರ ಸಾವನ್ನು ತಹಶಿಲ್ದಾರ್ ಕುಲದೀಪ್ ಪಾಂಡೆ ದೃಢಪಡಿಸಿದ್ದಾರೆ.
ಇದನ್ನೂ ಓದಿ:ದಟ್ಟ ಮಂಜಿನಿಂದ ಅವಾಂತರ.. ಮರಕ್ಕೆ ಕಾರು ಡಿಕ್ಕಿಯಾಗಿ ನಾಲ್ವರು ದುರ್ಮರಣ
