ಎಸ್​ಪಿಗೆ ಮತಹಾಕಿದರೆ ಗೂಂಡಾರಾಜ್​ ಬೆಂಬಲಿಸಿದಂತೆ : ಮಾಯಾವತಿ ಆರೋಪ

ಸಮಾಜವಾದಿ ಪಕ್ಷವನ್ನು ಜನರು ಚುನಾವಣೆಗೂ ಮೊದಲೇ ತಿರಸ್ಕರಿಸಿದ್ದಾರೆ. ಸಮಾಜವಾದಿ ಪಕ್ಷವೆಂದರೇನೆ ಗೂಂಡಾ ಪಕ್ಷ. ಈ ಪಕ್ಷಕ್ಕೆ ಮತ ಹಾಕುವುದೆಂದರೆ 'ಗೂಂಡಾರಾಜ್​, ಮಾಫಿಯಾ ರಾಜ್​'ಗೆ ಮತ ಹಾಕಿದಂತೆ ಎಂದು ಬಿಎಸ್​​ಪಿ ನಾಯಕಿ ಮಾಯಾವತಿ ಆರೋಪಿಸಿದ್ದಾರೆ..

ಲಖನೌ(ಉತ್ತರಪ್ರದೇಶ) :ಉತ್ತರಪ್ರದೇಶ ವಿಧಾನಸಭೆ ಚುನಾವಣೆಯ 4ನೇ ಹಂತದ ಮತದಾನ ನಡೆಯುತ್ತಿದೆ. ಬಹುಜನ ಸಮಾಜವಾದಿ ಪಕ್ಷದ(ಬಿಎಸ್​ಪಿ) ನಾಯಕಿ ಮಾಯಾವತಿ ಅವರು ಲಖನೌದ ಮುನ್ಸಿಪಲ್ ನರ್ಸರಿ ಶಾಲೆಯಲ್ಲಿ ಮತದಾನ ಮಾಡಿದರು.

ಬಳಿಕ ಸುದ್ದಿಗಾರರ ಜೊತೆ ಮಾತನಾಡಿದ ಮಾಯಾವತಿ ಅವರು, ಸಮಾಜವಾದಿ ಪಕ್ಷವನ್ನು ಜನರು ಚುನಾವಣೆಗೂ ಮೊದಲೇ ತಿರಸ್ಕರಿಸಿದ್ದಾರೆ. ಸಮಾಜವಾದಿ ಪಕ್ಷವೆಂದರೇನೆ ಗೂಂಡಾ ಪಕ್ಷ. ಈ ಪಕ್ಷಕ್ಕೆ ಮತ ಹಾಕುವುದೆಂದರೆ 'ಗೂಂಡಾರಾಜ್​, ಮಾಫಿಯಾ ರಾಜ್​'ಗೆ ಮತ ಹಾಕಿದಂತೆ ಎಂದು ಟೀಕಿಸಿದ್ದಾರೆ.

ಸಮಾಜವಾದಿ ಪಕ್ಷದಿಂದ ಮುಸ್ಲಿಂ ಮತದಾರರು ದೂರವಿದ್ದಾರೆ. ಈ ಪಕ್ಷ ಅಧಿಕಾರದಲ್ಲಿದ್ದಾಗ ಹಲವಾರು ಬಾರಿ ಕೋಮುಗಲಭೆ ನಡೆದಿವೆ. ಮತ್ತೆ ಅವರು ಅಧಿಕಾರಕ್ಕೆ ಬರುವುದಿಲ್ಲ ಎಂದು ಭವಿಷ್ಯ ನುಡಿದಿದ್ದಾರೆ.

ಪಕ್ಷದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸತೀಶ್ ಚಂದ್ರ ಮಿಶ್ರಾ ಮಾತನಾಡಿ, ಬಿಎಸ್​ಪಿ ವರಿಷ್ಠೆ ಮಾಯಾವತಿ 5ನೇ ಬಾರಿಗೆ ರಾಜ್ಯದ ಮುಖ್ಯಮಂತ್ರಿ ಆಗಲಿದ್ದಾರೆ.

ರಾಜ್ಯದಲ್ಲಿ ಬಿಎಸ್‌ಪಿ ಸಂಪೂರ್ಣ ಬಹುಮತ ಪಡೆಯಲಿದೆ. 2007ರ ತೀರ್ಪಿನ ಮಾದರಿಯಲ್ಲಿ ಈ ಬಾರಿಯೂ ಪಕ್ಷ ಸಂಪೂರ್ಣ ಬಹುಮತ ಪಡೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಓದಿ:ಯುಪಿ ಚುನಾವಣೆ: 9 ಜಿಲ್ಲೆಗಳ 59 ಕ್ಷೇತ್ರಗಳಲ್ಲಿ 4ನೇ ಹಂತದ ಮತದಾನ