ಬ್ರಿಟಿಷ್​​ ರಾಜತಾಂತ್ರಿಕರಿಗೆ ಚಂಡೀಗಢದಲ್ಲಿ ಲೈಂಗಿಕ ಕಿರುಕುಳ.. ಪ್ರಕರಣ ದಾಖಲು

ಬ್ರಿಟಿಷ್​ ರಾಜತಾಂತ್ರಿಕರಿಗೆ ಚಂಡೀಗಢದಲ್ಲಿ ಲೈಂಗಿಕ ಕಿರುಕುಳ ನೀಡಿರುವ ಪ್ರಕರಣ ನಡೆದಿದ್ದು, ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಚಂಡೀಗಢ(ಹರಿಯಾಣ): 60 ವರ್ಷದ ಮಹಿಳಾ ಬ್ರಿಟಿಷ್​ ರಾಜತಾಂತ್ರಿಕ(British Diplomat)ರಿಗೆ ಚಂಡೀಗಢದಲ್ಲಿ ಬೈಕ್​ ಸವಾರನೊಬ್ಬ ಲೈಂಗಿಕ ಕಿರುಕುಳ ನೀಡಿರುವ ಘಟನೆ ನಡೆದಿದ್ದು, ಇದಕ್ಕೆ ಸಂಬಂಧಿಸಿದಂತೆ ಪ್ರಕರಣ ದಾಖಲಾಗಿದೆ.

60 ವರ್ಷದ ಬ್ರಿಟಿಷ್​​ ಡಿಪ್ಲೊಮ್ಯಾಟ್​​​ ಚಂಡೀಗಢದ ಸೆಕ್ಟರ್ ​​​-10ರಲ್ಲಿ ಕಿರುಕುಳಕ್ಕೊಳಗಾಗಿದ್ದು, ಟೆನಿಸ್​​ ಆಡಲು ತೆರಳುತ್ತಿದ್ದ ವೇಳೆ ಈ ಘಟನೆ ನಡೆದಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಬೆಳಗಿನ ಜಾವ 6 ಗಂಟೆಗೆ ಈ ಘಟನೆ ನಡೆದಿದ್ದು, ಇದಕ್ಕೆ ಸಂಬಂಧಿಸಿದಂತೆ ಚಂಡೀಗಢದಲ್ಲಿರುವ ಬ್ರಿಟಿಷ್​ ಡೆಪ್ಯುಟಿ ಹೈಕಮಿಷನ್​ಗೆ ಮೊದಲು ಮಾಹಿತಿ ನೀಡಿದ್ದಾರೆ.

ದೂರಿನ ಪ್ರಕಾರ, ಸೆಕ್ಟರ್​​​-10ರ ಡಿಎವಿ ಕಾಲೇಜ್​ ಬಳಿ ಇರುವ ಲಾನ್​​ ಟೆನಿಸ್​​ ಅಸೋಸಿಯೇಷನ್​ ಕಡೆಗೆ ತೆರಳುತ್ತಿದ್ದಾಗ ಬೈಕ್​ನಲ್ಲಿ ಬಂದ ಸವಾರನೊಬ್ಬ ಕಿರುಕುಳ ನೀಡಿದ್ದು, ಬೆನ್ನಿಗೆ ಹೊಡೆದಿದ್ದಾನೆಂದು ತಿಳಿಸಿದ್ದಾರೆ. ಈ ವೇಳೆ ಕೂಗಿಕೊಳ್ಳಲು ಆರಂಭಿಸಿದ್ದರಿಂದ ಸ್ಥಳದಿಂದ ಆತ ಪರಾರಿಯಾಗಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾರತೀಯ ದಂಡ ಸಂಹಿತೆಯ ಸೆಕ್ಷನ್​ 354-A ಅಡಿ ಪ್ರಕರಣ ದಾಖಲಾಗಿದೆ.

ಘಟನೆಗೆ ಸಂಬಂಧಿಸಿದಂತೆ ಇಲ್ಲಿಯವರೆಗೆ ಯಾರನ್ನೂ ಬಂಧನ ಮಾಡಿಲ್ಲ. ಆರೋಪಿಗಳ ಪತ್ತೆಗಾಗಿ ಪೊಲೀಸರು ಪ್ರದೇಶದಲ್ಲಿ ಅಳವಡಿಕೆ ಮಾಡಿರುವ CCTV ದೃಶ್ಯಾವಳಿ ಪರಿಶೀಲನೆ ಮಾಡ್ತಿದ್ದಾರೆ.