ಏಕಾಏಕಿ ಕೊರಳಿಗೆ ಹಾರ ಹಾಕಿದ್ದಕ್ಕೆ ಸಿಟ್ಟು; ವರನಿಗೆ ಕಪಾಳಮೋಕ್ಷ ಮಾಡಿದ ವಧು!

ವೇದಿಕೆ ಮೇಲೆ ನಿಂತಿದ್ದಾಗ ದಿಢೀರ್ ಹಾರ ಹಾಕಿರುವುದಕ್ಕೆ ಆಕ್ರೋಶಗೊಂಡ ವಧು, ವರನಿಗೆ ಕಪಾಳಮೋಕ್ಷ ಮಾಡಿರುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಹಮೀರ್​ಪುರ(ಉತ್ತರ ಪ್ರದೇಶ):ಮದುವೆ ಸಮಾರಂಭದ ವೇಳೆ ಏಕಾಏಕಿ ಕೊರಳಿಗೆ ಹಾರ ಹಾಕಿದ್ದಕ್ಕಾಗಿ ಕೋಪಗೊಂಡಿರುವ ವಧು, ವರನಿಗೆ ಕಪಾಳಮೋಕ್ಷ ಮಾಡಿದ್ದಾಳೆ. ಉತ್ತರ ಪ್ರದೇಶದ ಹಮೀರ್​ಪುರದಲ್ಲಿ ನಡೆದ ಘಟನೆಯ ವಿಡಿಯೋ ವೈರಲ್​ ಆಗಿದೆ.

ಸ್ವಾಸಾ ಬಡ್ಜ್​ ಗ್ರಾಮದಲ್ಲಿ ಮದುವೆ ಸಮಾರಂಭ ಏರ್ಪಟ್ಟಿತ್ತು. ಜೈಮಾಲಾ ಹಾಗೂ ರವಿಕಾಂತ್ ಸಪ್ತಪದಿ ತುಳಿಯಬೇಕಾಗಿತ್ತು. ವೇದಿಕೆ ಮೇಲೆ ವಧು-ವರರು ನಿಂತಿದ್ದರು. ವರ ತಾನು ಕೈಯಲ್ಲಿ ಹಿಡಿದುಕೊಂಡಿದ್ದ ಹೂವಿನ ಹಾರವನ್ನು ದಿಢೀರ್‌ ವಧುವಿನ ಕೊರಳಿಗೆ ಹಾಕೇ ಬಿಟ್ಟ. ಈ ವೇಳೆ ತಾನಿನ್ನೂ ಸಂಪೂರ್ಣವಾಗಿ ಸಿದ್ಧಗೊಂಡಿಲ್ಲ ಎಂದು ಕುಪಿತಗೊಂಡ ವಧು, ಎರಡು ಸಲ ಕಪಾಳಮೋಕ್ಷ ಮಾಡಿದ್ದಾಳೆ. ಬಳಿಕ ವೇದಿಕೆಯಿಂದ ಇಳಿದು ಹೊರಟೇ ಹೋದಳು.

ಘಟನೆಯ ಬೆನ್ನಲ್ಲೇ ಸ್ಥಳದಲ್ಲಿ ಕೆಲಹೊತ್ತು ಆತಂಕದ ವಾತಾವರಣ ನಿರ್ಮಾಣಗೊಂಡಿತ್ತು. ಈ ವೇಳೆ ಇಬ್ಬರ ಮನವೊಲಿಕೆ ಮಾಡಲಾಗಿದ್ದು, ಸುಮಾರು ಗಂಟೆಗಳ ಬಳಿಕ ಮದುವೆಶಾಸ್ತ್ರ ನಡೆಸಿದ್ದಾರೆ. ಯಾವುದೇ ರೀತಿಯ ಪೊಲೀಸ್ ಪ್ರಕರಣ ದಾಖಲಾಗಿಲ್ಲ.