ಯುವತಿ ಸ್ನಾನ ಮಾಡುತ್ತಿರುವ ವಿಡಿಯೋ ತೆಗೆದ... ಮುಂದೇನಾಯ್ತು !?

ಬಾತ್​ರೂಂನಲ್ಲಿ ಸ್ನಾನ ಮಾಡಲು ತೆರಳಿದ ಯುವತಿಯೊಬ್ಬಳ ವಿಡಿಯೋವನ್ನು ಪಕ್ಕದ ಮನೆ ಯುವಕನೊಬ್ಬ ತೆಗೆಯಲು ಯತ್ನಿಸಿರುವ ಘಟನೆ ತೆಲಂಗಾಣದ ಹೈದರಾಬಾದ್​ನಲ್ಲಿ ನಡೆದಿದೆ.

ಹೈದರಾಬಾದ್​: ಸ್ನಾನ ಮಾಡುತ್ತಿರುವ ಯುವತಿಯ ವಿಡಿಯೋವನ್ನ ಪಕ್ಕದ ಮನೆಯ ಯುವಕ ತೆಗೆಯಲು ಯತ್ನಿಸಿರುವ ಘಟನೆ ಇಲ್ಲಿನ ಜೂಬ್ಲಿಹಿಲ್ಸ್​ನಲ್ಲಿ ನಡೆದಿದೆ.

ಇಲ್ಲಿನ ನಿವಾಸಿ ಯೂಸುಫ್​ ಫಾರೂಕ್​ (19) ಪಕ್ಕದ ಮನೆಯಲ್ಲಿ ಕೆಲ ಯುವತಿಯರು ವಾಸಿಸುತ್ತಿರುವುದನ್ನ ನೋಡಿದ್ದ. ಮಂಗಳವಾರ ಯುವತಿಯೊಬ್ಬಳು ಸ್ನಾನ ಮಾಡುತ್ತಿರುವಾಗ ಕಿಟಿಕಿಯಿಂದ ವಿಡಿಯೋ ತೆಗೆಯಲು ಯತ್ನಿಸಿದ್ದಾನೆ.

ಫಾರೂಕ್​ ವಿಡಿಯೋ ಚಿತ್ರಿಕರಿಸುತ್ತಿರುವುದು ಯುವತಿಯ ಗಮನಕ್ಕೆ ಬಂದಿದೆ. ಈ ಬಗ್ಗೆ 100ಗೆ ಕರೆ ಮಾಡಿ, ಆ ಯುವತಿ ಪೊಲೀಸರಿಗೆ ದೂರು ನೀಡಿದ್ದಾಳೆ. ದೂರು ಸ್ವೀಕರಿಸಿದ ಬಂಜಾರ ಹಿಲ್ಸ್​ ಪೊಲೀಸರು ನಾಲ್ಕೇ ನಿಮಿಷದಲ್ಲಿ ಸ್ಥಳಕ್ಕೆ ದೌಡಾಯಿಸಿ ಫಾರೂಕ್​ನನ್ನು ಬಂಧಿಸಿದ್ದಾರೆ. ಆತನ ಬಳಿ ಇದ್ದ ಮೊಬೈಲ್ ವಶಕ್ಕೆ ಪಡೆದು ವಿಚಾರಣೆ ಕೈಗೊಂಡಿದ್ದಾರೆ. ಈ ಸಂಬಂಧ ದೂರು ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.